ثمن عمري

8

#ثمن_عمري
الحلقه الثامنه
بقلمي(ام آيه)

سحر:بدت تسوء احوال البلد وصار السقوط ودخلوا الامريكان والناس خافت كلش من هتك الاعراض
وكلمن عنده بنيه خاف عليها
اخذت بناتي وسلمت بيتي للمشتري ورحت كعدت بيت ابويه لان اخاف عليهن بين ميكمل بيتنا واتحول
سحر:انكطعت عن بيت الدكتوره وكمت اروح مرتين بالاسبوع ..
سحر:مرت ابويه طلعت روحي ونحسه وابويه حيل تعبان رجال جبير والمرض هده ،
سحر:ابو احمد اني راح اكعد بالبيت حتى لو بعده مكامل المهم بي سكف لان تعبت من وره خالتي بشرى والبنات كبار وكاموا يتحسسون..
ابو احمد:اصبريلي اسبوع اطلع ابو الجام ونشيل احنه هم وياكم لان ميصير انتي تكعدين وحدج،وبعدين نكمل البيت شويه شويه
سحر:كعدت بالبيت وجان صبه خشنه ماكو كاشي بس الحياطين مبيضه ومن بره بعده طابوك بس ارحم من الذله وتجريح خالتي..
سنه 2004 جنت رايحه لبيت الدكتوره وفتت لكيت البيت مكلوب ياستار وتلكتني سالي حظنتني وتبجي
سالي:خاله امي ماكو من البارحه وبابا مخلى مدور وبلغ وماكو خبر عنها
سحر:قهرتني بنت بطني شلون كلبها مفرفح ومحترك
على امها..
سحر:اسبوع والدكتوره ماكو مختفيه
واخر شي كالوا روحوا دوروا عليها بالطب العدلي
سحر:راح الدكتور يدور عليها ولكه اسمها موجود
وكالوله بالمستشفى الثلاجات بعد متستوعب وكمنا ندزهم للنجف ندفنهم
سحر:من عرفنه الخبر جانت صدمه للدكتور ولسالي وبقيت وياهم معفتهم بس اروح بالليل ابات وجانت خطوره كلش بس مجبوره وكم مره الدكتور سمحلي اخذ سالي تبات ويايه لان يعرف اني امها
سحر:الدكتور قرر يسافر لان يخاف على بنته وعلى نفسه لان صارت بذيج الفتره تصفيات على الدكاتره والاساتذه
اني مربطه ومابيدي شي ومااكدر امنعهم
سحر:اخ ياوجع كلبي شوكت راح ارتاح،
صار الوداع واني حاسه بروحي دأموت لان راح ارجع افارك حبيبه كلبي..بس الظروف تحكم بالقساوة دائما عليه
سحر: اخذت مني سالي رقمي لان صارت عدنه تلفونات
والله علمودها سجلت على تلفون واخذته وجان بوكتها طابوكه وسعر 100$ كلش غالي بس ضغطت على نفسي واخذته..
سالي:خاله والله انتي بكلبي وماانساج واول ماارجع ادز عليج لان اكو شي بداخلي يشدني الج
سحر:هيه تحجي واني ابجي
سافرت سالي وراحوا للاردن وظلمت الدنيا بعيوني وتعبت من فراكها..
ومرت سنين وماكو منها خبر
رجعت اخيط بالبيت وكملنا بيتنا وعندي كم فلس بقت انطيتها لا ابو احمد فتح محل كهربائيات ويجينه منا هل الله قاسمه..
احمد انقبل علوم بايو وهسه مرحله ثالثه...ومها انقبلت تربيه بنات وهي ثاني
وبليله من الليالي صارت مداهمه مال امريكان وطلعت على صياح رقيه اختي ..
الامريكان اعتقلوا حمودي لان جانوا يلمون الشباب بذاك الوكت..
مها انهارت وهنا عرفت هيه معلكه روحها بي..
رقيه ادمرت 4 اشهر معتقلي ومخلينا مكان مدورنا اخر شي عرفنا ذابي بسجن بوكا بالبصره وكدرت رقيه مره وحده تزوره
كمل سنه بالمعتقل وطلعوا ،لان جانو مشتبهين بي
ولوهي صارت الاعتقالات موده بذاك الوكت اغلب البيوت عدها واحد معتقل،الله يلعن الحروب ودمارها وكل خاين.
سحر:طلع حمودي وهلاهلنا وصلت لسابع جار وشفنا بعيون احمد ومها الاشتياق والحب وقررنا نزوجهم..
رقيه:احمد سوده عليه راحت عليه سنه ورادوا يفصلوا من الكليه لان معتقل بس الحمدلله طلع ابن عم ابو برئاسه جامعه بغداد ورتبلهيا
بس ضاعت سنه عليه ،يداوم بالنهار والعصر لازم محل ابووو
ومها صارت رابع وبدت ترتب بامور زواجهم
وتزوجوا وراحت مهاوي ومكانها خالي ولو بصفي بس حسها جان مالي علينه البيت..
وهداوي انقبلت معهد نفط وهاي اخر سنه
سحر:جنت يوميه اكعد اباوع على التلفون من الصبح بلكت رساله لو اتصال من سالي
صار 4 سنين مسافرين وماكو عنها خبر وكلبي مثل النار عليها
سحر:جنت يم بيت رقيه لان مها متخربطه وجايبيها من الطبيب
رحت اشوفها وكالولي طلعت حامل
حبيبتي صارلهم 3 اشهر مزوجين..فرحت وطاير عقلي لان راح اصير جده
وجنا كاعدين ونسولف وفرحانين و ودك تلفوني رقم غريب راسا ولعب كلبي

🌸🌸🌸🌸🌸
مساء الورد للورد