كشف المستور

الجزء1

nada hs

الساعة 6 الصبح.. صباح ربيعي حلو.. اطفالي ال2(روان واسعد) نايمين بالكاع واني وابوهم ع الجربايه..
كعدت ع صوت المنبه بكسل وملل من كعدة الصبح.. الفراش دافي والجو مال نوم ..رحت للمطبخ وحضرت الريوك لعمتي ام زوجي ولبيت حمايه هم عدهم دوام وعلتي اقصد حماتي الي ممزوجه..
كملت الريوك وخليت اللحم ع الطباخ حته عمتي من تكعد تكمله.
كعدت روان واسعد حته اوصلهم للمدرسه..
طول الطريق نمشي اني واطفالي وابوهم نكر سويج سيارته وراح بدون ميكلف نفسه ويوصلنا.. بعدين كلت اووو واني ع شنو اعتب هو صارله 11 سنه ع هل حال..
وصلتهم وبوستهم مثل ما كل يوم معودتهم ورحت لدائرتي الي هي مديرية التربية.. بالمناسبه اني خريجة محاسبه واشتغل بالحسابات حاليا...
طبعا جانت مسافه طويله ولازم اصعد سيارة يله اوصل فجنت اوصل الاطفال واصعد باصات(كيات) يله اوصل..
هوايه جنه نعاني اني واطفالي من هل سالفه .. يوميه اضطر اوصلهم من وقت حته الحك ع دوامي وخاصه مديرة الحسابات فد وحدة قنقينه وبس تريدلها مشكله ويايه.. شكد جنت ادعي الله يخلصنا منها.. عجوز البين..
اوصل للدوام يستلموني تدقيق مراجعه وجيب وودي وكلها تخاف من المديرة فجانت اي شغله يدزوني اني عود اني الاكبر بينهم
وبنظرهم المديرة تحترمني بس هو الصح حالي حالهم .. هوايه جانت ترزلني واصير بوجه المدفع...
بكل مرة ترزلني بيها اكول هسه اني ع شنو متعبه نفسي وهاينه كرامتي واداوم مو المفروض غصبا ما ع زوجي يصرف علينا!
ماادري شلون جنت اتحمل واني بطبعي عصبيه وافقد اذا عصبت..
دوامي جان يخلص ب2 وولا مرة طلبت منها اطلع وقبلت كله لا لا لا .. هي جانت ماعدها اطفال ومتعرف شنو مسؤوليه وخوف عليهم ومنو جابهم ومنو غداهم وووو كل هذا افكر بي ..
ارجع منتهيه من التعب والكه الشغل كومة.. مواعين الغدا بحجة ها ذولي مال زوجج واطفالج انتي تغسليهم.. وياريت بس هيج الكه مواعين وجداري كومه عبالك مسوين ثواب..حته مرت حمايه الي ماعدها شي وكاعده بالبيت تعوف مواعينها هي واطفالها وزوجها.. اما حماتي فهاي بحث اخر شكو مصيبه وعركة صارت ويايه بالبيت هي سببها..
عينك عينك اذا انظف تدخل الحديقه وتترس نعالها طين وتظل تتمشه.. اذا اجيت اسوي اكله معينه لازم تجي توكف ع الطباخ تسوي نفسها تسولف ويايه وتاكل الاكو والماكو .. اسكت وارجع اسوي من جديد.. لو شغله الغده من ارجع الكه بس الجداري تصوفر ولانقطه مرك ولا حبايه تمن لذلك لغيت فقرة الغدا بالبيت وتعودت ع اللفه يوميه بالدوام ...
عمتي نوعا ما زينه بس لازم فلوس يله .. كل شهر الها راتب مني بالرغم ولدها خير من الله وحته بناتهه المتزوجات من يجن كل شهر ينطنها .. بس اني حته استمر بدوامي ومحد يفكً حلكه ويايه لازم ادفع.. حته مسواك اتسوك وارمم البيت واسوي سلف واصرفها عليهم ولافلس لميت من راتبي وصارلي سنين عود..
اما زوجي فهذا مصيبتي وسبب بلائي الاكبر.. اول شهر من زواجي هو بس حسيت بي نفسي صدك متزوجة وعايشه بظل رجال.. جان يوصلني لدوامي يخاف عليه نسولف ليليه ونكعد سوه وقت النهار.. وحته من حملت بروان جان زين نوعا ما بس بعدين بده شويه شويه يتغير بحيث محسيت ع التغير الصار بين ولاده وملتيهه بروان وبين شغل البيت ومجازة من الدوام.. انتهبت ماعاد يهتم مثل الاول ولايحاجيني واذا اوصي ع شي لازم يصيح عليه ويغلط شويه يله يرجع يهده وبالاخير ميجيبه..
دخلت بفترة اكتئاب فضيع .. وخاصه من صرت احس نفسي اني المقصره .. عاد رحت للسوك واشتريت سيتات كومه واخذت الوان حمر صارخه وغيرت بغرفتي وانتظرته بالليل ولا كأن شافني
افتريت كدامه رحت جيت ماكو..nada hs
كلت يحوز تعبان وهم انطيته وقت وايام وليالي اني احاول اتقرب منه وهو ولا يمي يدخل للغرفه فاصل بعالم ثاني .. يلزم الحاسبه حته اذا ماعنده شغل يبقه يلعب ولا يحاجيني..
بيوم جنت كلش طاكه روحي واريد اسمع منه حجايه حلوه لو يباوع بوجه بنته لو يكلي شبيج ضايجه ماكووو.. ومنا اخته البايره كملتها عليه وسوتلها هوسه ويايه شنو تشربين بنتج مي بالاستكان مال الجاي.. يابه اني مخليته بس الها وعازلته عن البقيه وجيب الي يقنعها ترد عليه تكلي وانتي من سمحلج تعزلين اسكتان لبنتج هسه هي تسوه عاد..
رحت ابجي بيومها للغرفه واباوع ع الغضب مالتي امدد ع الجربايه ورايح بعالم ثاني.. ركعت باب الغرفه حيل واصيح اكله انته ماعندك احساس! اني شنو هنا يمك ويم اهلك!
جابر:هي هي! شبيج شكو؟
حجيتله الصار بيني وبين اخته واني ابجي واعيط.
جابر:اهووو عبالي شو شكو ! هاي سوالف نسوان تردين اضرب اختي مثلا لو شنو؟
-اني كلتلك اضربها! حاجيها وكللها تفك مني ياخه تره اني مو خدامه هنا فوك الكرب تلزمني وتصيح!
جابر:كافي فريال كافي مليت منج ومن سوالفج!
طلع من الغرفه واني بقيت اصيح هو منو الي مل غيري منو الي طاح حظه غيري انته شنو سويت حته مليت!
عاد اجت مرت حمايه الي جانت ستوها عروس بوقتها وعبالي خوش بنيه وحجيتلها الصار عاد ثاني يوم شفت عمتي متخبله مني .. اثاري غيداء رايحه مسولفه وكيلتلها تتشكه وتكول اني شمبقيني هنا.. حته الي حجيته وصل بالمكلوب.. وتعال الي ريضي عمتي بس همزين اجه راس الشهر ولو هو جان مو راتب كامل لان ماخذه امومه سنه كامله بس انطيتها ورضت عني ..
يجوز تسألون شنو الي جابرها تبقه اذا هي تصرف ع نفسها وهي حايره بجهالها ومتحمله ضيمهم.. الي جابرني انه جابر ابن خالي.. وياريت لوجان خالي عايش يجوز جان مانذليت عدهم..
اما اهلي امي وابويه واخوني 3 وخواتي 5 كلهم مزوجين وكبار وحته من نروح اني واطفالي لازم يتكافشًون وتصير عركه ونرجع
فبقيت 11 سنه بغرفة وحده اني واطفالي..
من صار اسعد محد دره عني ولا سأل لا اهلي ولاعيالي ع كد اخذوني للمستشفى جبت ورجعت.. ونفس الكرب معبالك نفسه واذا اكول لعمتي اسوي فلان طبخه تكلي لا سوي غيرها وهي تعرف نفسي بيها عاد انجب واسكت..
ومرت الايام وكبر اسعد وجابر ع كد حاجته ويايه مااطخ بي بعد بغير وقت حته من جان يتقربلي مااحس بشي احس نفسي اخلص واجب عليه وخلص..
يوم عن يوم وجابر يبتعد عني ودخلت التلفونات وحسيته ضاع مني فد نوب حاولت هوايه بكل الطرق الي تكدر المره ترجع زوجها بيها بس مكدرت .. دورت وراه هوايه ملكيت شي كل طني جان عنده وحده .. بس ملكيت شي..
عدت ايام واشهر وسنوات وتعودت ع وضع جابر ومانلتقي ع كد الفراش ..
جنت اشوف بيت حمايه واخواني ويه زوجاتهم واموت قهر واكول كلها الناس مرتاحه اله اني ...
حته اطفالي محاسبين نفسهم عدهم اب .. دراستهم ،مشاكلهم ، لبسهم اكلهم كله اني مهتمه بي وهو شغله بس يعيط عليهم ومره حاول يضربهم صرت بالنص وفقدت اعصابي علي تالي اني الانضربت  ..
من الظاهر اني مرتاحه والناس تحسدني .. عيالي زينين وزوجي موظف واني همين واطفالي شطار بالدراسه بس الحقيقه عكس
ليالي طويله قضيتها واني اباوع ع جابر الي منطيني ظهره لو يبقه سهران ع الحاسبه لو يلكي اي شي يلهي بس كون ميوصلي..
البعض من راح يقرون راح يكولون كل اثنين متزوجين بعد فترة من الزواج هيج يصير وياهم .. بس احب اكول انه مو كل النفسيات سويه وتتحمل .. اني عاطفيه كلش واقل شي يجرحني ومن اتزوجت تمنيت احصل ع الحنان والحب وعائلة هادئه بس كله اجاني بالعكس..
المهم مشت الايام والمديرة كالت انها راح تقدم استقاله وتريد تروح حج وبعدها عمرة وعدها هوايه مشاريع..
من صدك فرحت من سمعت هل خبر كلت واخيرا راح نخلص.. وماادري كل هذا راح ينكلب ضدي وهسه شتوفون شلون..
من بعد ماراحت ست سهيله (المديرة) جابو مدير جديد.. فد شي مرتب ومهتم بنفسه اخر اهتمام وكأنه مو جاي ع دوام لا جاي لمناسبه رسميه.. اذا اجه عطره قبله يوصل الغرفه .. كعدته ابد ميثني ظهره.. الميز لازم مرتب ومبي ذرة تراب او شي غير الاقلام والكتب الرسميه الي يوقعها.. شكد جانت ست سهيله متشدده بهل شي هذا المدير جان اضبط منها.. اول يوم اجه عرفنه ع نفسه ويحجي بأنفه وتكبر نوعا ما..(اني مديركم الجديد اسمي عمار تكدرون تتفضلون كلمن ع شغله وياريت لو احد يجيبلي كتب الترقيه)nada hs
الكل رحبو بي ونفذنا بدون نقاش.. وكلعادة اني لازم اودي الي طلبه .. خليتهن كدامه ولفتت انتباهي الحلقه الي لابسه واتذكرت جابر الي لبسها ع كد فترة الخطوبه.. خليت الاوراق كدامه وكعدت بغرفتنا الصغيره الي تصير بصف غرفته.. كل شوي بقه يدز ع احد من عدنا ويسأل.. هو جان مدير غير قسم وجابو النا
جنت اتمنه اني احصل الادارة صح هي متعبه ومسؤوليه بس جان عندي المنصب اهم..
مرت الايام ونجحو اطفالي روان للخامس ابتدائي واسعد للثالث..
واجت العطله الصيفيه وتعرفون احنه ماكو عدنه عطله.. جابر جان مدرس والعطله يقضيها نوم  وطلعات وميدري شكو بالدنيا...
يتبع...