كشف المستور

الجزء2

2
كل يوم الصبح اروح كيات والجو حار وحضرة جابر ميكلف نفسه يوصلني ابد.. طول الطريق ابقه احرك بدمي واحجي علي..
اوصل اشربلي كوب جاي حته اصحصح شويه..وابلش شغلي.
ام ايهم الي ويايه جانت مجازة امومه.. وكريم ولد شاب يسخت بالشغل ومكضيها بس تلفونات.. بس غزوان يشتغل وجان كل الشغل براسي وراسه واحنه المسؤولين ..
بيوم دخلت لغرفة المدير وبيدي اوراق تحتاح توقيعه سمعته يحجي بالتلفون ويكول(ماشي.. من اجي اجيبه.. محتاجين شي بعد؟ يله عندي شغل هسه العصر نحجي ..مع السلامة..)
دكيت الباب ودخلت-استاذ ..(وخليت الاوراق كدامه)..
عمار:اشكرج..شنو بس انتي موجودة ليش وين غزوان وين كريم
-لا استاذ موجودين وديشتغلون ويايه..
عمار:لا مو داشوفج بس انتي تركضين بالشغل وهمه اشوفهم مرة باليوم..
صح جنت شايله ع كريم بس مردت احجي كدام المدير هم يكول فتنت بيهم وياخذ نظره فسكتت وطلعت..حته غزوان الي جان يتشغل ميكمل دوامه ل1 هو طالع ونبقه احنه نسدسدله .. بزمن ست سهيله جان حته ب12 يطلع وسهيله متكدرله لان اكثر من مره يتعاركون وتصير هوسه كوه نفكهم كل هذا ومحد كدر يشيله من مكانه مااعرف شنو السر..
شوية ودخل المدير علينا ورزلهم رزاله ناشفه وكللهم اني مو مثل القبلي كبل اكتب مطالعه بي وانقله الي مشتغل زين.. وين رجولتكم! يعني ام روان تتعب اكثر منكم وانتو مصفطين وكاعدين
من جاب اسمي رفعت راسي واجت عيني بعينه هو باوعلي ودار وجهه.. حسيت بي صدك رجال.. وكلت لو يدري بمسؤوليتي بالبيت شيكول!
من بعد ذاك اليوم صارو شويه يشتغلون عدل وهم فترة وبندو..
جنت ارجع للبيت بس لخاطر شوفة اطفالي ويوم عن يوم اكره بيتهم واشكالهم كلهم.. اجي من الدوام جابر ستوه كاعد من النوم ويريد ريوك مدري غده حسب مشتاهته.. يكعد ياكل وجهه بي عشر لطامات وبس يزمخ من صدك طلعت روحي منه . اكمل شغلي واروح عود اخلي راسي انام يجي جابر يطرد الاطفال وتعالي اتصلخي وخليني بحضنج ويبدي مثل المتوحش عض وضرب مااعرف شنو الي يخلي هيج يسوي بيه.. فد يوم انفجرت بوجهه وكلتله كوم مني موتتني شنو مطي عندك وتضرب بي!
عاد هو جان بعزة النشوة ومخليته يكمل شبعني دك ومااصرخ اخاف يسمعون اطفالي .. ريح كلبه وعافني كمت سبحت ولبست ثوبي ورحت اشوف الجهال وين.. لكيتهم كاعدين بالحديقه يلعبون بالطين كعدت ابجي والعب وياهم والدنيا عصر وبعدها حارة بس صايرين بالفيه.. يسألوني شبيج ماما ع شنو تبجين واني اكلهم لا هيج عيوني تحركني .. بداخلي صرخه ومااكدر اطلعها..
بعدها كعدنه بالصاله ورادو كيك اجيت اسوي طلعتلي حماتي الخبله تكلي ها شعندج جنكم شواذي انتي وجهالج..
ذبيت حسرة بملل وكلت:اريد اسوي كيك للجهال!
ضمياء:يااا عشتو.. ديله سويلي وحده وياج وجيبيها لغرفة امي
نفذت وسويتلها سم وحدها ووحده لاطفالي وهل حجي شنو كل المواد لازم اني اشتري ومااخذ حته لو موجود مدام لاطفالي..
عاد خليت الكيكه كدام اطفالي اجه عمهم وجهاله 3 بلشو بيها ومابقه منها شي.. نوب ياكل ويكول شو مو كلش منفشه ..شعجب لا ببسي لا جاي لا عصير.. صدك فار دمي وتمنيت عندي بيت واخلص منهم..
بقينه بالصاله لليل واطفالي نعسو فانجبرت اروح للغرفه.. نامو واني جبل مال هم نزل ع كلبي وبقيت ابجي وجابر يسمع صوتي ولا تقرب وكلي شبيج ولا اعتذر عن الي سواه.. واصلا ملازم انتظر منه هيج شي ..
نمت وهم نفس الروتين الصباحي تريكت بدلت ومشيت للدوام هلمره مشي وكلت وين متوصل توصل عسى ما اوصل ب10
جانت حارة بس مو مثل حرارة هاي الايام .. وصلت ب8ونص واصلا اني طالعه من وقت.. بس دخلت لكيت المدير كاعد بمكاني
والكل موجودين..
عمار:ست فريال ليش هل تأخير مو تعرفين عدنا لجنة اليوم!
-اسفه استاذ اخر مرة ان شاء الله..
جنت احجي والهث كلهم كلولي بيج شي مريضه؟ جاوبت بالنفي
كملنا شغلنا واحت اللجنه من الوزارة وانعجبو بشغلنا وتكرمنا كأحسن قسم بالتربيه..
بعدها المدير دز علينا وكال ع هذا الانجاز الي مجان يكمل بدونكم باجر الغدا بمطعم فلاني...
تفاجئت بي! لا وخارج التربيه؟ ردت ارفض كبل كال وكأنه عرف بداخلي رفض(ورجاءا لحد يعتذر ترا اشيل بخاطري عليكم)
يالله شنو هل الانسان جنت اكول بداخلي ! يهتم بابسط تفاصيل
يتبع..

الي تشوفون ومغلسين شوفوني تصويتكم مرة ع الاقل وفرحوني☹️😞