كشف المستور

الجزء3

3
رجعت فرحانه للبيت وكملت شغلي بسرعه ورحت للكنتور ادور شنو البس بالعزيمه .. بعدين حلت اوو واني ليش مهتمه لهدرجة خل اشوف جابر يجوز ميقبل .. طبعا اضطريت احاجي حته استأذنه خاف نتأخر ..كلتله كبل وافق بعدين كال..
جابر:منو يجيبج؟ وويامن ترحين؟
-كلنا راح نروح ويه المدير..
جابر:هذا الي جابو جديد ؟
-اي.
جابر:اي كلها تكول نزيه ومهني.. ماشي روحي..
اتمنيت يكلي لترحين .. او يكلي شي يحسسني صدك متزوجة وعندي رجال يغار عليه بس ماكو..
ثاني يوم لبست مانتو مرتب ملابسته قبل بس مرة.. وخليت مكياج خفيف كلش واني يوميه مااخلي بس اليوم حسيته مميز ولازم اخلي..رحت هل مرة بتكسي خفت تخرب كشختي والمكياج..
مجان عدنا شغل هوايه وصادف يوم خميس يعني ساعات دوام قليله ل12 ونص اجه المدير كال هاا جاهزين؟
غزوان اعتذر وكال خابروني من البيت ومدري شنو المهم حاول ويا المدير مراح ويانه.. صفينه بس اني وكريم والمدير..
كلش اختنكت بالسياره وبس اني وياهم تمنيت ام ايهم موجوده جان خففت شويه عني ..
نزلنا وجان المطعم راقي ومايقل رقي عن ذوق العازمنا..
نزل من سيارته وكله هيبه من نزلت اني ردت اسد الباب كال ولو ام روان .. طبك الباب هو .. يالله معقوله اكو هيج رجال؟
خجلت من تصرفه الي كله اكابريه ورجوله.. خلوني امشي كدامهم واشرلي ع الطاوله الي محجوزه النا..
كعدنا واجه الي ياخذ الطلبات.. وكلمن طلب ع ذوقه.. عمار جان كبالي وكوه جنت اكل اول مرة احس بخجل من احد بالرغم عادي اكل كدام غزوان وكريم والي قبلهم جانو ويانه..
جنت ارفع راسي اشوفه شون ياكل كله يمشي ع الاتكيت وبنظام وهدوء وحته مااكل هوايه وعرفت حته يحافظ ع رشاقته وميسمن..
ههه من صدك خجلت من نفسي واني كل ما اضوج اطلع حركتي بالاكل ومربربه واخر همي الضعف والرشاقه.
حسيته ميريد ياكل اكثر ومراد يحرجنه بقه ينقش شوي شوي..
لحد ما كام كريم يغسل.. رفعت راسي وهو هم ماادري شجان يريد يحجي بقنه صافنين واحد بالثاني وماكو حجي..
حسيت خدودي صارت نار.. مااتذكر شوكت اخر مرة باوع بيها جابر لعيوني..
بعدين ابتسم ونزل راسه واني هم.. اجه كريم واستأذنتهم اروح للحمام غسلت وكملنا طلب جاي وحجينا شوي بالشغل بعدين كريم كال بشقه شنو محد يريد ينام الظهريه اليوم خميس ونريد نسهر نطلع.. عمار ابتسم وهاي جانت اقوه ضحكه عود كال يله تفضلو.. وهم فتحلي باب السياره وصعدت ورا.. وكريم كدام..
طلبت يوصلني للتربيه بس هو رفض كال نوصلج للبيت..
اني هم مارفضت .. طول الطريق يسولفون هو وكريم وشويه اني ولحظه والثانيه اشوف عيونه بالمرايه الاماميه..
وكأن عيونه تسألني شبيج ليش متشاركين بالحديث..
وصلت ع البيت واتذكر كل اللحظات وكل نظرة منه..
بدلت ملابسي وبقيت اباوع ع جسمي واكول اي اني لازم اضعف وبعد اقلل اكلي .. وصدك سويت رجيم قاسي واشتريت جهاز مشي شو عمتي بس شافته كالت مايدخل للبيت وين احنه عدنه مجال اضطريت ارجعه وصرت العب بغرفتي تمارين ..
مرت الايام واني شيطاني ميفاركني وصرت حته احلم بعمار ..
الى ان بيوم من الايام جنت بس اني موجوده بالقسم وكاعده بالكرسي الي كبال المدير ونشتغل سوا.. خليت الاوراق بيدي كباله وجنت مدنكه اكمل غيرهن ماحسيت اله ايده ع ايدي...
رفعت راسي بقه صافن واني هم .. جريت ايدي وصخنت كلشش
مكدرت احجي حرف بعدين كال...
عمار:احم احم.. فريال؟ عندج مشاكل بالبيت؟
جاوبت واني مرتبكه:هاا لا من وين هل حجي استاذ؟
عمار:فريال عيونج فاضحتج ولمعه الحزن واضحه بيها.. احجيلي بلكي اكدر اساعدج..
نشف دمي من كلامه صح اني متعلقه بي بس متوقعت هيج توصل.. جاوبته:استاذ ماكو شي اني كلش سعيده بحياتي وعندي اثنين اطفال يخبلون وزوجي ممقصر علينا بشي..!
جاوبني بأستفزاز:ويضربج! وممهتم! وميعرف بأحساسج! وانتي مجرد شي يملكه حالج حال السيارة او التلفون ..وست نجلاء الي ويا بالمدرسه هي الماخذه عقله وكلها تعرف اله انتي!
-رجاءا كافي استاذ الي وصلك هل حجي كذاب..
كمت ورحت ع الغرفه الثانيه وسديت الباب حسيت نفسي اريد انفجر بقيت اروح وارجع
يتبع..