شي بنات كيقولو معندناش الزهر كنقولكم انا لي سرقتو ليكم , قصتي قصة شحال من بنت لعب بيها القدر وحكم عليها بحياة لي هي مابغاتهاش , لي كيسمع قصتي كيقول ليا باز ليك ملي ماحاولتيش تنتاحري ههه (ضحكة استهزاء) واش عمركم شفتو شي ميت كينتاحر , نعرفكم براسي انا سميتي ليلى 20 سنة من تازة عندي 3 اخوة ذكور ,محطمة لأقصى درجة وخا بقات فيا غير السمية والجسد حيت روحي طفات و بردات. انا كبرت عادي بحال اي بنت ولكن الحاجة الزوينة ديما كتسالي دغيا حياتي غتبدل ملي غتولي عندي 5 سنين وتما غتكون بداية البئس ديالي ملي بابا غيتصاب بمرض نفسي خطير وكما كتقولو بدا كيحماق بسبب الضغوطات لي كانت عندو فالخدمة والكريديات لي عليه ملي مقدرش يخلصهم جات البنكة وخدات لينا كولشي , هادشي لي خلاه يدخل لمصحة عقلية , خويا الكبير خرج ماعرفناهش فين مشا وخوتي الاخرين معرفتش اش وقع ليهم اما انا صيفطوني لدار الايتام بصح انا يتيمة حيت حتا ماما تخلات عليا ومابغاتش نبقا معاها من بعد بشوية عرفت بلي خرجت للدعارة و ولات عاهرة وبالدارجة ديالنا ق.. كتبيع لحمها للرجال مقابل الفلوس تلقائيا كان خاصني نحقد عليها و نكرهها ولكن فداك السن ماكنت فاهما والو , دازت ايام وشهور وسنوات فالخيرية حتا خديت الباك كانت عندي 19 سنة كبرت وليت فاهما الدنيا وهمي تبدل فين ديك الكتكوتة الصغيرة لي كتفكر غير تلعب وتاكل وتنعس , اييه كبرت وبديت نحس بالالم والجراح لقيت راسي بوحدي حتى خوتي معقلوش عليا ولا جاو يزوروني بحال الى انا غير شي لقيطة وحتا ماما ماعمرها قالت عندي بنت خليتها بوحدها يمكن شي نهار تبغي تعنقني ولا تشكي عليا , حتا القحاب كيشدو ولادهم وكيبيعو لحمهم على قبل ولادهم ولكن ماما على ما كيبان خرجات للدعارة على قبل باش تجمع خنز الدنيا وعلى قبل متعتها الشخصية .
