جا الوقت فاش نخرج للعالم الخارجي لي هو عالمكم معرفتش علاش خرجت نزاحمكم فالمشاكل والمعاناة , جمعت باليزتي العامرة بحوايج جادو بيها المحسنين عليا وخا انا ماكنت باغا ناخد تا حاجة من حياتي القديمة ودعت صحابي وناسي لي كانو عائلتي ولقيتهم فجنبي مابغيتش نوصف ليكم عالم ديال دار الايتام حيت قصة اخرى , هزيت الباليزة وبديت رحلة البحث عن الدات رحلة استكشاف للعالم اقسى من رحلة كلومبس لاكتشاف امريكا او رحلة ابن بطوطة وما شاف من عجائب اما العجائب ديالي لي غنحكي ليكم فكتبكي ليها العين و كتبقى بصمة عار فالانسانية , اول مافكرت فيه نقلب على عائلتي الزوينة اب مريض نفسيا والام مولات الحسب والنسب و خوتي رشيد غاتكون عندو 25 سنة كان هرب ومعرفناهش فين مشا و امين 22 سنة ومراد 21 سنة خرج من القراية بسبب داكشي لي وقع لبابا وبالصدمة حتا هو تعقد وتصاب بالاكتئاب ولا غير كيدور فالزناقي.
