وقفت لحظة وبديت كنتخيل كل السيناريوهات الممكنة , واستغربت من نظرات ديال البقال (مول الحانوت) ملي سولتو على دار (" واش كتعرف دار مليكة بنت الهاشمي ") جاوبني بلكنة شمالية وهو كيشير ليا للعمارة (" واش نتينا خدامة معاها ??") قولتليه لا انا بنتها , خليتو كيطلع ويهبط فيا واتجهت للدار صونيت وقلبي باغي يخرج من بلاصتو شوية كنسمع صوت من مور الباب ("شكووون تما ") هادا صوت ماما اه مستحيل يخفا عليا صوتها دخل لاعماق قلبي شوية حلات الباب كنشوف مرأة فالاربعينيات كتحمق بالزين مابقيناش بزاف حتا عرفنا بعضياتنا هي ماتبدلاتش براف ولكن انا كنت بنت صغيرة عندها 5 سنين ودابا شابة فعمرها 19 سنة و زوية واي شاب يتمناني نكون مولات دارو , عنقاتني ماما كما توقعت ولكن ماحسيتش بداك الشوق وداك الحضن لي كنقلب عليه حرارة اللقاء كانت باردة وحتا دمعة ماهبطات من عينيها , ااااه انا لي مسكينة ظنيت غنلقا داك الحضن الدافئ لي غينسيني فهمي وسنوات المعاناة وغينسيني الم الصفعات لي كليتها من يد الدنيا بسبب التفكك الاسري , كمدتها فقلبي وقلت يمكن مصدومة وصافي راجلها ولدها حماقو ولدها الاخر ماعارفاه حي ولا ميت وبنتها دوزات عمرها فالخيرية ... سولتها على خويا امين حيت ماشفتوش فدار قالت ليا بلي كرا دار بوحدو ولا مدمن على المخدرات وكيتعرض للكاميونات لي غادا الخارج
