:::: ملي كانت كتجي عند ماما ويجلسو يشربو اتاي ويشدو الهضرة وانا معاهم كنلعب مقديتش نصبر غلباتني البكية عنقتها بجهد شوية دفعاتني وبقات تحقق فيا حتا شداتها البكية حتا هي وعنقاتني وهي كتقولي بنتي العزيزة, دخلت عندها وعاودت ليها كولشي قالتلي بلي ماما مشات مع خويا امين لطنجة وعطاتني عنوان ديالها سلمت عليها باش نمشي ولكن ماخلاتنيش طلبات مني نبقا حتا نشرب معاها اتاي داكشي لي كان بقيت وكل جغمة ديال اتاي كتهبط فحلقي بحال شي جمرة ودمي كيغلي بغيت غير امتا نسافر . دوزت معاها الليلة والصباح بكري عطاتني شي فلوس ودعتها , مشيت المحطة شديت الكار لطنجة وكل ثانية كدوز كأنها ساعات والكار غادي بشوية بحال الى كيمشي على القلب ديالي واول مرة تمنيتو يولي صاروخ يوصلني فرمشة عين ولو كنت عارفة اش كيتسناني كنت غنتمنا يدير كسيدة و يوقف , وصلت المحطة نزلت حسيت براسي صغيييرة فمدينة كبيرة كولشي كيتحرك ناس هضرتهم زوينة وحلوة والبحر اول مرة غنشوف البحر واو ماتيقتش راسي , بديت رحلة التقلاب من دار لدار ومن حومة لحومة دوزت ايام وانا مجلية كندور ونقلب وكل مرة نبات ف اوطيل فشكل وحتا من العنوان لي عطاتني مي عيشة لقيتها انتقلت منو بقيت كنسول حتا تلاقيت بسي عبالسلام فقيه كان كيعرف ماما ملي يالله وصلات لطنجة عطاني عنوانها الجديد و حكيت ليه معاناتي وبقيت فيه اقترح عليا ندوز الليلة عندو ولغدا نمشي العنوان لي عطاني., هو مزوج ولكن معندوش ولاد هيا هاديك فالصباح فطرت وخرجت نقلب على العنوان وصلت للحومة لي ساكنة فيها قلبي بدا كيضرب بجهد
