#زهره-وحارث

الجزء 2

#قصه_زهره_و_حارث
للكاتبه فردوس عبد اللطيف
الجزء   2
تغيرت حياتنا المحافظه تغيرت السكن ببغداد بالبدايه كان صعب الحياه مختلفه بالموصل علاقاتنا مع اقاربنا وزيارات وتاديه الواجبات الحياة هناك اكثر التزام وروابط اسريه اكثر ببغداد مانعرف احد الا اصدقاء بابا نعرفنه على عوائلهم وزياراتهم بالمناسبات
باشرت بالدوام حياة الجامعه مختلفه اختلاط بنات وشباب يعنى تقيد والتزام قبل ما اداوم بابا كلمنى
زهره بنتى من بكره راح تدخلين مرحله جديده بحياتج مجتمع الجامعه يختلف عن مجتمع المدرسه والبنات والصديقات خلى كلامى دستور وامشي عليه انى انطيتج الثقه حتى تداومين ولازم تكونين بكد هذه الثقه من البيت للكليه وبالعكس..يعنى مو صديقتج تريد تروح للسوك لو معزومه لو ما اعرف ايش كل هذا ممنوع وماتتكلمين مع الزملاء الا بحدود ترى المجتمع هنا مختلف
حاضر بابا
بنتى اريدج ترفعين راسي
بوسته من راسه
بابا انى تربيتك ولا تخاف
بس انى ارجف وخايفه من كلام ابويه حسيت بمسؤليه تجاه عائلتى ولازم ارفع راس ابوى
داومنه الاسبوع الاول كان تعارف وبعدنه جدد وطلاب المرحله الاولى يكونون بالبدايه مثل الطفل من يداوم اول يوم بالمدرسه ويتفاجئ
كنت عازله نفسي عن الكل وكلام بابا يرن باذنى اخاف اتكلم مع اى طالبه
بس لازم نتعرف على بعض ونتعاون احتجنا خط سيارة يودينه ويرجعنه لان تعبت بالكيات
شفت اعلان بالكليه على خطوط اتصلت على رقم التلفون اسم صاحب الاعلان حارث
انى حارث طالب مرحله ثانيه رياضيات اسكن الدورة  الميكانيك هوايتى السيارات اشترى السيارة واصلحها وابيعها اربح لى كم فلس بيهه وعندى برازيلي اشتغل بيهه تكسي بعد الدوام واخذ خط من الكليه حتى اطلع مصرفي نزلت اعلان بالكليه عن خط توصيل اتصلت طالبه وسالت عن الخط
الو مرحبا
اهلا تفضلي
اكو اعلان عن خط توصيل
نعم اختى وين بيتكم
باليرموك
اكو وياج بعد احد
لا ما اعرف احد
طيب مو مشكله اشلون اعرفج
انى قسم رياضيات مرحله اولى شعبه ب
اسمج اختى
اسمى زهرة محمد
باجر امر على قسمكم ونتفق
بنفس الوقت حصلت طالب وطالبتين يعنى كمل الخط باجر اشوفهم واتفق وياهم
اليوم الثانى
صباح الخير... اكو طالبه اسمهه زهرة محمد
اى زهرة تعالى
العفو تفضل
حارث.....صفنت بوجهه تلعثمت شنو هالجمال شكد حلوة هالبنيه مع العلم لا مكياج ولا زروقه ملابسهه انيقه صوتها ناعم جذبتنى من اول نظرة تؤمنون بالحب من النظرة الاولى
كلبي رف عليهه
العفو منو حضرتك شتريد
انى انى حارث البارحه اتصلتى بي
ها علمود الخط اى وينهه سيارتك
اى اى شوكت تخلصين محاضراتج
ب2 اليوم
طيب ب2 انى انتظرج والزملاء هم كلهم ب2
حتى اندل بيوتكم
طيب
زهره....اشو هذا اشبي صفن بوجهى وتلعثم
كملت محاضراتى وطلعنه صعدنه ويه حارث..هوايه اجتماعى ويسولف ويضحك مرح
بس انى ما اتكلم ساكته
حارث...هاى اشبيهه لا تشارك ولا تسولف لو ما حاجيه وياي كان كلت خرسه حتى من اسولف نكته يادوب تبتسم
مبين عليهه مصلاويه ومتتحاجه بس دخلت بكلبي ولازم اتقربلهه
زهره انت من الموصل
نعم
شكد صارلكم ببغداد
كم شهر
يوووو هذا ليش يسال
هاى اشبيهه تجاوب على كد السوال سولفى احجى
استمر حارث يوميه يوصلهم ودائما يحاول يمشي الوقت بالطريق بالنكات والضحك
بدت زهره تلين ويه حارث لكن داخل الصف وبالكليه علاقتهه محدوده عدهه صديقات 2 ايمان تسكن بالمنصور وسهير تسكن بالعرصات
حارث مرتب وانيق ودمه خفيف اعتيادى اى بنت يعجبهه لكن زهره طموحهه تكمل كليتهه وما مفكرة بالحب والغرام
لكن حارث يحاول بكل طريقه يتقربلهه ويخليهه تحبه
بدء يغار
بدء حارث يلاحق زهره من بعيد ويغارعليهه اذا حس اكو طالب يحاول يتقربلهه
كان طالب اسمه عمر بنفس المرحله ويه زهره يلاحقهه ويريد يكبل وياها لكن زهرة ملتزمه بكلام ابوهه ومخليه تفكيرها بس بالدراسه
عمر...زهره عندى كلام معاج خاص ممكن
شنو قصدك بالخاص احنا زملاء بنفس القاعه واى شئ ثانى ميصير
ميخالف ممكن اعزمج على عصير بالكافتريا واسمعينى وراها قررى
زهره هذا شيريد منى خلى اروح للكافتريا وافتهم
عمر... هم من الموصل ولد مرتب ومعجب بزهره
عمر....زهره من اول يوم داومنه كانت عينى عليج وانى اتمنى اتقدملج اذا توافقين
شوف عمر انى جايه ادرس مجايه احب رجاءا لاتكلمنى بهيج موضوع
انتى رافضتنى شخصيا لو مو ضوع الخطوبه
الاثنين
شافهه حارث كاعده ويه عمر ضاج وظل يدخن جكاير من غير شعور
اشلون يحسسهه اذا هو ما مفاتحهه بحبه الهه باى حق يكلمهه
بقت حسرة بكلبه وميكدر يسالهه بس ضايج ومتنرفز لاشقى ولا سوالف مثل كل يوم
زهره هم استغربت من تصرفه
سالو الزملاء اشبيك حارث اليوم
لا ماكو شي شويه تعبان
بس يباوع عليهه بالمرايه مامبين عليهه تحب عمر لعد ليش كاعده وياه بالكافتريا...خلى اصبر وتالى تبين
للحكايه بقيه   f