المراهقة الفاتنة

البارت 3

الليل وصل عاد ماما بدات كاتفيق وهي كاتنين ، قربات عندي لقاتني حالة عينيا كانشوف فالسقف ، هزات ليا راسي بشوية من الأرض وعنقاتني وهي كاتبكي ..
ماما : الله يا بنتي وشنو درتي حتى خليتيه يجهل هاكا 😢
أنا : 😢
لساني ثقيل ماقادراش نهضر ، بقات معنقاني وكاطبطب عليا حتى غفيت شوية وسمعنا الساروت كايضور ، عرفناه غايكون صعصع اللي جا ، حل الباب ودخل وهو كايخنزر فينا ..
بابا : تهزو من قدامي الله يحفر ليكم الجذر 😡 بغيتي تشوهيني يا بنت الحرام الله ينعلك 😡 فاخر يامي نلقاك مع القوادة فالريسطورات ماحشمتيش ، وجهك هاداك ولا قفاك ؟ هادي هي اللي خارجة مع صاحبتها قولي نتي خارجة تسلكطي يا الحمارة ، خرجتي ليها ديريكت ينعل بوك ، ولكن أنا اللي درت فيكم راسي وخففت معاك على وجه ديك الكلبة اللي حداك ودابا غانجلس ليكم للأرض ، غانطرطقكم قبل ماطرطقوني نتوما ، غاتنوضو دابا تجمعو شراوطكم وغدا غانديكم للفيلا تما غاتبقاو حتى ترباو مزيان ، عمركم تحلمو بالمدينة هنا واخا تموتو سمعتوووو ، غانفيكم تما ، ونتي نساي شي حاجة سميتها القراية كنت باغي ندير فيك خير ونخليك ثقفي شوية ساعا اللي بغل راه بغل ، غاتمشيو تعيشو تما ونتي واخا يجيني خمال السروبا نعطيك ليه يا قليلة الحيا ، يالااااااه غبرووو عليا كماااامركم تكعدوووو 😡😡
وقفات ماما كاتعرج وعاوناتني نوض بزز ، شدات فيا داتني لبيتي ودخلاتني للدوش غسلات ليا حالتي بعدما حيدات ليا ديك الكسوة اللي تجرثلات وفينما تقيسني نغوت ، شدات معايا الخاطر وخرجاتني ملوية فبينوار ، جلساتني ففراشي وجابت علبة الاسعافات داوات ليا ، نشفات ليا شعري وأنا كانبكي جلدة راسي طابت ليا بالنتيف وعنقي عواج ، لبساتني سليب وكسيوة خفيفة ديال النعاس بلا سوتيان ، تكاتني ففراشي وغطاتني وطفات عليا الضو ومشات ، بقيت كانشوف فالظلام وكانبكي فصمت ، عمرني توقت يوقع ليا فحال هادشي ولا يجي النهار نتفضح فيه مع عائلتي ، كنت واخذاها لعب وشادة العكس وكاندير غير اللي قالها ليا راسي وضاربة الدنيا بركلة واللي بغيتها نوصل ليها ، عايشة حياتي كيف بغيت ومامخلية هضرة شي حد تأثر عليا ولا حكام بابا يمشي عليا ، ولكن هاني دابا جبتها فعظامي وخرجت على مستقبلي بيديا ، سمعت غوات والديا وزيرت على عينيا بألم ، أنا اللي تسببت ليهم فهادشي ، عاذرة بابا أي واحد غايشوف بنتو فداك المنظر ماغايصبرش راه شرافو هاداك وفاش ماقتلنيش راه تساهل معايا ، ولكن ماعرفتش شنو مخبي ليا من هنا للقدام ، الليل كامل مانعستش من جهة كانفكر فحريرتي وكيفاش غاتخرج ومن جهة أخرى عظامي اللي كايوجعني ولحمي اللي كايحرقني بالشحط ديال السمطة ، بقيت حالة عينيا ووذنيا مازال كايسمعو الصداع والسبان حتى أذن الفجر عاد سكتو ومابقيتش سمعت الحس ومع ذلك ماغمضتش عينيا ، كيفاش نعس وأنا دايراها قد راسي ، سمعت صوت الطيور وضوء الصباح بدا كايتسلل لبيتي معلنا على يوم جديد ماعرفتش شنو مخبي ليا فطياتو ..
سمعت التقرقيب فالدار عرفتهم فاقو ، حلات عليا ماما الباب ودخلات عندي ، كان وجهها كامل منفوخ وزرق ضرني خاطري فاش شفتها هاكاك ..
ماما : يالاه نوضي نعاونك تلبسي حوايجك 
ماجاوبتهاش ، مشات للماريو حلاتو وبدات تجبد حوايجي وتخشي فالشانطة والصيكان ، خواتو كامل من الحوايج ودازت للكوافوز حتى هو ، تما عرفت باللي نيت غانعيشو فالفيلا ، حطات ليا سروال كيطمة رمادي وتيشورط كم وردي بارد وكونفيرس ، نضت بزز من الفراش دخلت للحمام غسلت وجهي اللي غير شفتو فالمرايا وتخلعت ، خسرو ليا بالضرب 😢 خرجت ولبست دوك الحوايج وخليت شعري مطلوق مغطي وجهي ودرت نظاظر ديال الشمس ندرك عينيا ..
بابا (دخل علينا) : خرجو تسناوني فالطموبيل ، غايجي العساس يهز هاد الشوانط ونتبعكم
خرجنا بلا مانعاودو معاه الهضرة ، هبطنا وحنا مخشيات فبعضياتنا وكانعرجو تقول خرجات فينا رموك طحناتنا ، لقينا اللوطو محلولين بيبانها طلعت أنا اللور وماما القدام ، بقا العساس معاون مع بابا حتى هزو كلشي حطوه فالكوفر واللي بقا خشاوه حدايا أنا ، سالا وطلع لبلاصتو وقلع ..