المراهقة الفاتنة

البارت 12

بقينا جالسين كانفكرو فشي حل ووالو مالقيناش ..
خالتي : غانعاود نمشي عندها وندي معايا شي كارطونة ديال السكر ونرمي عليها العار
فوزية : ويلا مابغاتش
خالتي : واخا نعرف نركع ليها عند رجليها، راه ولدي هاداك مانبغيش يدخل للحبس وشوف بشحال غايحكمو عليه راكم ماشفتوش حالتهم كي دايرا، شتتهم مزيان كلهم فاصمة ووجاههم مخسرين بالدق
رابحة : الله ياخويا الله وشنو درتي فراسك 😢
بداو يبكيو وكملو على مابيا، حتى أنا ماشعرتش براسي وبديت نبكي معاهم ونشهق وهوما سكتو وبداو يشوفو فيا معجبين من الحالة اللي دايرا وكانمسح فخايني، شفتهم كايشوفو فيا هاكاك وسكت وبقيت تانا نحنزز 😂 كثرة الهم ضحك حق الرب ..
فوزية : صافي ا مي غدا ونمشي معاك تانا ونطلبوها
خالتي : واخا ان شاء الله، المهم يلا ضور لينا ماتقولو ليه والو، مابغيتوش يرجع دابا ونصدقو فما كثر، داك الولد غايقتلني مافيهاش، ماعرفتش علاش ولا عصبي هاكا وديما مسبق يديه
أنا (بصوت خافت) : سوليني أنا اللي ذقت عصاتو
خدوج : نعام ا فرحة! قلتي شي حاجة
أنا : ا لا قلت غير الله يخرج هادشي على خير
كلهم : آمين يا ربي
أنا : جاني الجوع
البنات : 😨
أنا : مالكم؟ راه ماتغديتش معاكم، تسنيت خالتي وفاش ضرت لقيتكم سطو فالطاجين 😑
فوزية : واراه بنين
رابحة : شنو نقاد ليك؟
أنا : امممم بغيت هاديك اللي كاديرو فيها الخبز وكاتمعسوه فالمرقة
خدوج : التردة؟
أنا : اه اه هاااادييييييك
خالتي : وياك كانديروها وماكاتاكليهاش معانا؟ شنو جاك عليها دابا
أنا : تشهيتها ا خالتي 😢
خالتي :صافي ويلي ويلي غاتبكي كاااع، نوضي ا رابحة صاوبيها ليها سربيي
ناضت رابحة للكوزينة باش تقادها ليا وأنا كانطل عليها من عتبة البيت، سمعتهم كايوشوشو وضرت عندهم وهوما يسكتو، قادات ليا رابحة التردة وجابتها ليا فصينية، دارت طبسيل كبيير عااامر، حطاتو قدامنا وخشيت يديا فيه وأنا نطير حيت سخون
خالتي : ابشوية عليك ا بنيتي غاتحرقي راسك
ماجاوبتهاش وعاود خشيت صبعاني وكانهز بشوية واخا حرقاتني، بقيت هاكاك حتى بردات شوية ووليت نلكم ونخشي ففمي ونتبنن وهوما حاضييني، شهيتهم وبداو كاياكلو معايا وأنا ماكرهتش نطير عليهم باش يجمعو يديهم، كملنا داك الطبسيل وتوخرت فيه أنا لحستو كامل وكملت بصبعاني 😂 وأنا اللي كنت نعيف فاش يلحس شي واحد يديه قدامي ههه ودابا جربت البنة ديالهم، حسيت بكرشي تنفخات بالماكلة، شربت الما وتسرحت حداهم كانشوف فيهم كايهضرو حتى نعست، ماضرباتني الفيقة حتى للمغرب، نضت ومالقيت حد حدايا، خرجت من البيت وبان ليا الضو فالكوزينة عرفتهم كاينين فيها، مشيت عندهم كانتكسل ونتجبد لقيتهم كايصاوبو العشا ..
خالتي : فقتي
أنا : نعست بزاف، فففف ماعرفت مالي مع النعاس هاد اليامات
خالتي : داكشي عادي، وغير البدية مازال ماشفتي والو تولي تبغي النعاس وماتلقايه
أنا : مافهمتش ا خالتي
خالتي : دابا نفهمك ابنيتي، خلي غير حتى نحل مشكلة مراد
دخلات ليا الشك فراسي ولكن سكت ماحكرتش عليها، عندها الحق دابا أهم حاجة مراد يخرج من هاد المشكلة اللي تورط فيها بسبابي، تعشينا مجموعين وقصد كل واحد بلاصتو، هاد الليلة ماجمعتش مع خدوج كيف موالفة، حيت حسيت بعيا عجيب، غير دخلت بدلت عليا وسرحت شعري اللي هملت ودهنت وجهي ولحمي بشي كريمات، حيت مابقيتش ديتها فراسي من نهار مشا مراد، تخشيت فبلاصتي ونعست دك الساعة ..