المراهقة الفاتنة

البارت 4

أنا : أنا موافقة .. موافقة نتزوج 😢 غير بقا على خاطرك ا بابا ..
بابا (خنزر فيا وخرج)
ماما : شنو هادشي درتي نتي شنوووو ؟
أنا : درت اللي خاصو يدار ا ماما ، باراكا غير داكشي اللي تسببت ليك فيه ماغانقدرش باقي نشوفو كايضربك 😢 أنا اللي غلطت وأنا اللي خاصني نتحمل مسؤولية غلطي
دادا فاطمة : ماكانش عليك ابنيتي تدخلي ولا تسرعي فقرارك
ماما : اووووففف منك ا فرحة اووووووفف
أنا : بلا ماتفقسي راسك ا ماما ، وحسن نيت نغبر وجهي ومايبقاش يشوفو
ماما : وهاد الراجل اللي بغاك واش نتي كاتعرفيه شفتيه ؟ لا اوا دابا فكيها يا من وحلتيها ، كون خليتيني مني ليه يضرب ولا يقتلني كااع نتي ماتدخليش
أنا : ماما قراري خذيتو صافي
ماما : ضبري لراسك اختي ، ماغانبقاش نضيع الحجرة معاك ونهار تندمي ماتجيش تبكي عليا هانا علمتك (خرجات)
دادا فاطمة : ابنيتي الله يسر ليك ويسهل عليك ويدير ليك تاويل ديال الخير
أنا : آمين ا دادا آمين
خليتها كاتدعي معايا وطلعت لبيتي ، سديت عليا وتلاحيت ففراشي خاشية وجهي بين المخاذ وكانبكي ، داكشي باش حلمت كلو تبخر ، تفكرت هضرة صاحبتي نسرينا فاش كانت تقولي لا تحلميش بزاف وهاني وصلت لكلامها ، عضيت المخاذ وتجننت بالاعصاب ونتفت راسي وصرفقت حناكي وبكيت وندبت زهري المكفس ، عييت وطحت نعس ..

🌸أصبحنا وأصبح الملك لله🌸 ..
فقت على يدين كايدوزو على شعري من الريحة عرفت شكون ، ومن غيرها نبع الحنان ، حليت عينيا وشفتها كاتشوف فيا بحسرة والدموع مجمعين فعينيها ، تقلبت على ظهري وعينيا فالسقف ..
ماما : نوضي تفطري باش توجدي راسك
أنا : واخا
نضت نيشان للحمام دوشت وخرجت ملوية ففوطة وكانشف شعري ، لقيت ماما كاتحط ليا شي حوايج فوق السرير ..
ماما : هادو اللي غاتلبسي
دادا (دخلات هازة بلاطو فيديها) : فرحة صباح الخير ابنتي
أنا : صباح النور ا دادا
دادا : ها فطورك
أنا : ماعندو منين يدوز ا دادا
دادا : لواه ابنتي ، غاتجيبيها غير فكرشك ، كولي ومولاها ربي
حطاتو حدايا وهزيت كاس ديال العصير شربتو صافي ماقدرت نزيد والو ..
ماما : احم ، اليوم غاتعقدي
أنا : كيفاش 😨
ماما : مالك تصدمتي ؟ ياك نتي اللي باغا تزوجي ؟ اوا صافي ديري داكشي اللي كايتطلب منك ونتي ساكتة
دادا : باك مزروب واتافق مع الناس قبل وجمع ليك وراقك واليوم غاتعقدو وغايديك الراجل 😢
ياااااااه لهاااد الدرجة ضيقت عليه وثقلت عليه ، بغا غير ايمتا يصدرني ، بلعت الغصة ونضت نشفت لحمي ولبست دوبياس فالابيض ولبست القفطان اللي جابت ليا ماما كان خفيف فاللون البيض ومنبت بحجيرات فالغوز ، درت مشيطة سامبل ومايكاب خفيف وكلشي تحت نظراتهم ، وأنا مستحملة ومامبيناش النار اللي شاعلة فيا ، ياك أنا اللي اختاريت ؟ اوا صافي نواجه مصيري ونشوف شنو مخبي ليا مع هاد الانسان اللي عمرني شفتو ولا عارفة عليه شي حاجة ، ساليت وجلست فبلاصتي وخرجو هوما ودادا كاتبكي ، ماعرفتش شحال داز ديال الوقت وأنا فبلاصتي ماتحركتش حتى تفتح عليا الباب ودخلات عندي دادا لابسة قفطان كرونة ..
دادا : فرحة ،الناس جاو وجلال سيفطني عندك باش تنزلي
مانطقت بحتى حرف نضت معاها شادا فيا ونزلنا للتحت للصالون الكبير اللي مفرش ، وأنا كانقرب وكانسمع صوت الرجال ، دخلنا عندهم وعينيا فالأرض ، جلساتني حدا شي راجل شفت غير رجليه لابس سروال كحل ..
.......... : ها العروسة جات ، بنتي واش نتي قابلة تزوجي بمراد الساخي على سنة الله ورسوله
أنا (بعد تردد) : قابلة
............. : ونتا ا ولدي قابل تزوج بفرحة المحمودي على سنة الله ورسوله
مراد : قابل
عطاه وقع ودفع ليا الكتاب قدامي ورما ليا الستيلو ، هزيتو بيدي كاترعد ، كانوقع والدموع هابطين ليا ، ناضو اللي تما باركو لينا وكان بيناتهم السي العربي اللي عرفت صوتو ، والعدول مشاو بحالهم ..
بابا : خوذ مرتك ا ولدي وسيرو
قلبي تزير عليا فاش سمعت هاد الجملة ، باعني رخيصة ، غير قالها ومشا فحالو ، أنا بقيت جالسة وفين هوما الرجلين اللي غايهزوني ؟ مشات دادا وماما وخلاوني معاه بوحدي ، ماقدرتش نشوفيه ، بحال يلا جالسة على الشوك حداه .. شوية كانحس بنفسو كاضرب فعنقي ، همس ليا فوذني الجملة اللي صعقاتني ..
مراد : مبروك عليك العويقة ، ودابا نقدر نقوليك ولا عندي الحق نربيك ياك ؟
أنا : 😨
هزيت فيه عينيا وأنا مصدومة ، لقيتو هو اه هو نفسو مول اللوبيا الغول 😢 لقيتو راسم ابتسامة شر على وجهو ناوي على خزيت ، غمزني وضور وجهو كايضحك وأنا حابسة البكية بززز ، مامتيقاش باللي الصدف كاينين لهاد الدرجة !! ..