المراهقة الفاتنة

البارت 14

كملت الماعن وجات عندي خالتي ..
خالتي : فرحة، اليوم غاندير أنا وياك الرفيسة باش تعلمي ليها حتى هي
أنا : واخا ا خالتي
بدينا فيها ودرت العجينة أنا وجاتني صعيبة مع غير الفورص بوحدو صعيب يتجمع بقيت مدابزة معاها جاب الله الظفار مابقيتش طولتهم من نهار هرسهم ليا الغول، جمعتها وهي جالسة حدايا وكاتوريني وشادة بيديا وأنا كاندير واللي خسرتها كاتقادها هي ورايا، جابت البوطة والمقلة قدامي وشعلات العافية وبديت نطيب فيهم وهي كاتقلب حتى كايطيبو وتنزلهم فواحد الحاجة كايسميوها الطبg مقادة بالقصب، كاتقطعهم وهي كاضحك معايا، عجبني الحال معاها بزاف وحنيتها أسراتني وشادة ليا الخاطر كون شب وحدة اخرى كون دغيا تعصبات وضرباتني بداكشي ههه ولكن خالتي نفسها واسعة، بقينا هاكاك والعرق نازل مع جبهتي وهي مرة مرة تمسحو ليا بكسوتها 😂، سالينا المسمن ديال الرفيسة ودزنا للنصيب، حطينا كاع اللي نحتاجو قدامنا وبدينا فيه عاوتاتي وهي كاتوريني وأنا كانقاد، رديناه فوق الكانون يطيب ووقفت غسلت يديا والماعن فاش خدمنا وجففت الكوزينة ويديا بيديها ماخلاتنيش بوحدي واخا عارضت فاللول ولكن هي عاندات وبقات معايا وكاتعاود ليا شي طرائف وقعو معاها هي وعكوزتها وأنا كانضحك وشوية نشفق عليها حيت مسكينة دوزاتها عليها بالمعقول، كاتعاود على قوتها وجبروتها وطغيانها ولكن في اللخر مدات وجهها للتراب وبقاو أعمالها اللي كايتجبدو ياربي السلامة 😑 رجعو البنات وطرفو حالتهم وفرشنا وسط الدار واحد الحصيرة وجلسنا مجمعات حتى يجيو البقية ونتغداو مجموعين ..
فوزية : ففف اليوم غاترجع ديك الشوكة 😡
رابحة : ياختي حتى تهنا دماغنا هاد اليومين
خالتي : وشغانديرو؟ الصبر وصافي على وجه داك المسخوط ديال راجلها
خدوج : واخا هاكاك خويا بدا يتبدل شوية، ماشفتوش نهار دابزات مع فرحة وسلخاتها عصا بقا هو كايتفرج وكايضحك بتخبية
فوزية : حتى أنا حصلتو، كون رباها من اللول ماطلعش ليه فوق راسو
خالتي : كلشي من الاصل ا بنيتي، اوا كل واحد يخلصو الله على فعلو
أنا ماشاركتهومش هاد الحوار حيت ماكايهمنيش من أصلو، بقيت غير كانسمع ليهم وصافي، هزات خالتي فيا عينيها ولقاتني ضاربة الطم وهي دوز يديها على راسي بحنية ..
خالتي : بنيتي مالكي ساكتة؟
أنا : والو ا خالتي
خالتي : ولدي مرضي داكشي باش الله سيفطك ليه
اكتافيت بابتسامة، شوية دخل مراد وباينة فيه ماشي هو هاداك، لقا علينا السلام وحجبانو معقودين وعينيه حمرين ..
مراد : فرحة سخني ليا واحد المقراج ديال الما بغيت ندوش
أنا : واخا
وقفت بزربة مشيت عمرتو وحطيتو فوق البوطة كايسخن، وجبدت ليه الصابونة وكيسها ومشط وشامبوان حطيتهم ليه فطاسة وسط السطل، سخن الما وهزيتو ليه، شد من عند داكشي ودخل للطواليت وتبعتو ..
أنا : مراد تسنا نبرد ليك الما
مراد : لا صافي أنا نبردو راسي
أنا : اوك، نمشي نجيب ليك فوطة وحوايجك
مراد : جيبي غير الفوطة بوحدها، وحوايجي حتى للبيت ونلبسهم
أنا : لا ماتخرجش عريان، غايضربك البرد مايغركش هاد الجو
بقا شحال كايشوف فيا، ومافهمتش دوك النظرات، قرب عندي وباسني فجبهتي وهمس بين عينيا ..
مراد : الله يخليك ليا
أنا : مراد واش بيك شي حاجة؟ حيت حالك من الصباح ماعاجبنيش
مراد : لا مابيا والو غير تهناي نتي، يالاه سيري دابا
أنا : واخا 😕
دخل هو يدوش وأنا مشيت للبيت جبدت ليه الفوطة ديالو وحوايجو اللي كانو عبارة على سروال كيطمة رمادي مفتوح وتيشورط بيض مخطط بالرمادي وسليب بيض 😂، شديتهم فيدي ومشيت جلست حدا البنات وخالتي مشات تصلي، حتى سمعت سميتي ونضت عندو، حل ليا الباب دخلت حداه (ضورو وجهكم نتوما لهيه 😂 هو كلو ديالي مابغيتكمش تشوفوه ااو مابقيتوش تحشمو 😉) عطيتو الفوطة نشف راسو ولحمو وبدا ياخد من عندي الحوايج حتى لبسهم، باسني فحنكي وخرج وأنا طرفت تما وجمعت ماعن الدوش ونشرت الكيس والباقي رجعتو لبلاصتو، دخل خوه ومرتو وولادهم بصداعهم عاوتاني، كاتسمعيه من باب الدوار، دايرا هي وياهم الشوهة والدعاوي غير مشتتين، وراجلها مسيكين غير حادر الراس ولسانو سارطو، خنزرات فيا وسلمات على الاخرين ودخلت حيدات جلابتها وربعات قدام الطبلة، طلع ليا الدم من تصرفاتها دايرانا خدامات عندها 😡 صبرت راسي ومشيت مع خالتي سgات فالgسرية وهزاتو رابحة حيت ثقيلة عليا، حطاتها قدامهم وتغدينا وأنا وياها ماحاملينش بعضياتنا وهي ضور ضور وتبدا تمعني عليا وأنا مسكتة راسي بزز حيت مراد كاين ومابغيتش نزيد عليه وأنا عارفة باللي عندو شي مشاكل، كملنا وجمعنا داكشي وهي مسرحة بقا لينا غانجيبو ليها الطاس تغسل مكافشها، الخوت خرجو وحنا بقينا فالدار جلسنا فبلاصتنا نيت
خالتي : عييتي ابنيتي اليوم نيت، نوضي ارتاحي شوية فبيتك
أنا : لا غير خليني معاكم، كانقنط بوحدي
خدوج : مامزيانش ليك تعبي ا فرحة وخاصة دابا، صاحبتي رحمة ولات فرملية وهي اللي كاتعاود ليا على داكشي ديال الحاملات نادية(بصدمة) : حاملة 😨..