اسمي امان بنت من عائلة محافظة والحمدلله عندي اخ اكبر مني بسنتين اسمه ايهم مراسل واعلامي مشهور والثاني اصغر مني بسنة اسمه مصعب واخت اصغر مني بتلث سنوات اسمها ريم
امي مدرسة عربي هي الي سمتنا هالأسماء الحلوة ...وابويا مدرس رياضيات..وهم متزوجين ع حب . واحنا ساكنين بكركوك ..
الحمدلله وضعنا العائلي جان بالبيت كلش حلو ومتفاهمين وماعدنا مشاكل
اني واخوتي اصدقاء اكثر من كونا إخوة كلشي نحجي لبعض طبعا قدر الامكان هههه...
.من شفت البنات بدوا يحررون مشاعرهم ع شكل قصص قررت اني هم احجيلكم قصتي...لان مهما كان الانسان كتوم لابد مرات يحتاج يفضفص ويرتاح....
من صف الخامس الادبي جنت ع علاقة بكرايب عبدالله صديق اخويا ايهم اسمه حسام شفنا بعض كم مرة من جان يوصل عبدالله مرات لبيتنا بسيارته... هو جان مخليني اباله من الثاني تقريبا بس بالخامس يلا صارحني..
حسام شاب حلو اسمراني خلوق يلعب حديد جسمه رياضي يخبل هوايا بنات جانوا مخلين عينهم عليه وهو خط الگلب جان مشغول بس وياي ...
جنت احبه كلش واثق بيه كلش لان جان غير عن باقي الشباب وحبه غير شكل غير عن الي جنت اسمعه واقراه...جان يخاف عليا من الهوا بحياته ماطلب مني شي غلط يسىء الي او لسمعة اهلي اني اصغر منه ب ٦ سنوات ومن جيلين مختلفين و كلش متفاهمين متفقين اخلص السادس ويخطبني احلامنا جانت بسيطة وصغيرة ومشروعة بيت بالحلال يلمنا وعائلة صغيرة وولد نسميه سند وبنت ههههه جنا مختلفين ع اسمها اني احب سرى وهو يحب امان اي اي والله جان يكول اسمي بنتي ع اسم امها حتى من تزعليني اضرب امونة الصغيرة واطلع قهري بيها....
راحت ايام واجت ايام . خلصت السادس جنا كلش فرحانين بالنتيجة واخيرا راح نحقق حلمنا
_حبيبتي سادس وخلصتي ماراح انتظر الانسيابية اجي الخميس اخطبج ومانطول نسوي العرس ومناك عود استمري بالدوام اذا كلية اذا معهد
_واي حسام كلش مرتبكة وفرحانة معقولة الخميس نحقق حلمنا
_ان شاء الله ياروحي بس كولي يا الله اني عندي امل محد يعترض من اهلج والشغلة تخلص بخير
ان شاء الله
وصار الخميس اجا حسام بقاط رصاصي اخر موديل ورباط جان طالع جنتل من صدك ماشايفته بهالستايل دائما جنت اشوفه بملابس الرياضة
كعدوا الزلم وحجوا وشربوا جاي
واني بغرفتي صعدت انتظر
ريم تتصنت وتجيب الاخبار ههههه ابويا
كاللهم
_انطونا فرصة نسال عليكم ولو انتوا ناس معروفين بكل خير وناخذ رأي بنتنا والله كريم...
اني كلش فرحت لأن حسيت مثل ما كال حسام الشغلة راح تخلص ع خير...
راحوا واني كعدت انتظر اهلي يجون يسألوني واتدرب شلون اجاوب شكول....بس اشو صار اليوم يجر اليوم واهلي لاحس ولاخبر واحنا ننتظر ....انتظر ابويا او امي يحجون ويايا يسألوني وهم ماكو ويوميا يخابر حسام
_هاحياتي ماكو شي ماسألوجً؟؟
_ أكله لاوالله بعد .. .
طولت الشغلة اسبوعين رجع حسام جاب أهله مرة ثانية عود ياخذون الجواب.....رجعوا الزلم كعدوا وفتحوا الموضوع هالمرة المفاجأة جانت من ابويا كاللهم
_والله ياجماعة بيت عمها يريدوها واني بس هالاخ الي فأسفين ماالكم نصيب ابنتنا....
شنو ..منو...اني من سمعت هالحجي من ورا الباب انصدمت صدمة عمري....طبعا خابرني حسام متخبل وعصبي
_ انتي شلون ماتكليلي عندج ابن عم يريدج .معقولة تخبين عليا هيج شي امان..معناها انتي راضية بيه احجي فهميني.....
_كتله والله حسام اني هم انصدمت اكثر منك هاي اول مرة اسمع هالحجي اي عندي ابن عم بس علاقتنا أخوية كلش هم بيت عمي محمد مو كل مرة احجيلك
صار الليل اني بغرفتي كاعدة اجتي اختي ريم كالت
_امان ابويا يريد يحجي وياج...
نزلت من غرفتنا غرفة البنات...لكيت ابويا وباقي اهلي كلهم كاعدين بالصالة ينتظروني...
_كلت هاخير بابا شبيكم خوما اكو شي هيج متجمعين ..
_.كال لا باباتي بس اريد احجي وياج كدام الكل وابري ذمتي نحسم الموضوع اخاف كسرت گلبج ....
فدوة لعينه بحياته مارفضلنا طلب ولاكسرلنا گلب ...
_كتله شتقصد بابا انت مستحيل اكو اب مثلك عمرك مازعلتنا ولا نقصت علينا شي...
_كال باباتي اني وامكم ربيناكم انتي واخوتج ابماي عينا وكل املنا نشوفكم سعداء وباعلى المراتب...بصراحة مامستعدين بعد تعب السنين نتلف حياة بنتنا..تعرفين شاقصد طبعا
طبعا اني بس اهز براسي...
_باباتي اهل حسام ناس عشاير هو والنعم منهم خوش ناس ومعروفين لكن طبعهم وأسلوب حياتهم يختلف كلش عنا اول شي راح يسووه من ننطيج يبطلوج ومايخلوج تكملين الكلية...لان هو حسام نفسه عنده بس شهادة ثالث...حتى إذا هو طبعه غير عنهم فيبقى مرتبط بأهله ويتاثر بكلامهم....فيا بنتي اتمنى اطلعين هالموضوع من بالج وتهتمين لمستقبلج والعمر بعده كدامج ان شاء الله تجيج قسمة احسن انتي بعدج صغيره.....
_اني اخرسيت كلشي ماحجي واصلا احجي شكول
_كال امان انطيني وعد تنسين الموضوع.
ماجان بايدي غير اني اوعده واطمنه..
._ كلت بابا انت ادرى اكيد واوعدك يصير مثل ماتريد
وكمت رجعت لغرفتي سديت الباب ....وظليت حايرة ابجي گلبي حسيته يريد يوكف خابرت حسام وحجيتله
_حسام شنسوي الأبواب انسدت بوجهنا واني كلش خايفة اخسرك
_ كال لاتكولين هيج امان لاتيأسين المهم يعني موضوع بيت عمج بس حجة مادام ماجابلج طاريهم...يعني بعد اكو امل ..
ورجع حسام يحاول اكثر من مرة بعدها وابويا قافل.
أنت تقرأ
امس من الماضي يعود
RomanceSarab Alaga عندما تقرر الابتعاد وتدعي انك لاتعرف السبب عليك ألابتعاد اولا عن اقرب الناس اليك لأنه الوحيد الذي سيكشف انك تكذب... وانك تعرف السبب الذي اثار فيك رغبة الابتعاد لكنك ترفض الاعتراف به حتى مع نفسك....لأنك مقيد بوعد... خاص بصفحتنا ع الفيس بو...
