#Sarab
بعد كم يوم الشركة قدمت تقريرها للشرطة وهنا كانت الفاجعة التقرير كشف النا المكالمات والرسائل وطلع الي ابد مفكرنا بيه غزوان منتمي لجماعة إرهابية تكفيرية والمصيبة الاكبر انه صار فترة ديخطط ويرتب لقتل ايهم سودة عليا لأن هو جان مراسل واعلامي....وبالفترة الاخيرة جان كل تقاريره عليهم وجان خايف لابالنهاية يكشفه..بصراحة اهنا خاني التعبير ومااعرف شلون اوصفلكم ...اوصفلكم صدمتي بزوجي وابو بنتي لو صدمتي بأبن عمي..البشوش الي عرفته من الصغر..اوصفلكم صدمة ابويا واهلي لو صدمة عمي وبان وامها...شحجي شكول ...معقولة جنت عايشة بالفترة الاخيرة مع قاتل والمن يقتل؟؟؟ اخويا الي هو ابن عمه ونسيبه
ليش ليش شلون كدروا يغسلون دماغه وهو انسان واعي ومثقف ودكتور....وشلون ماشكينا بيه وبتدينه المتناقض الي نزل عليه فجأة من جهة جان يضربني ويهيني ومن جهة يصلي ويغصبني ع النقاب شلون ماشكينا أن هذا مو تابع دين الله ورسوله هذا ضاحكين عليه المايخافون الله الي شوهوا الدين
المهم وراها الشرطة حققت مع كم صديق اله طلعوا اغلبهم مقاطعيه بسبب أفكاره وكلامه بالفترة الاخيرة
واتضح أنه اصلا ماجان يفتح العيادة اكثر الايام واحنا ماندري يطلع عبالنا يروح للعيادة واذا اتاخر نكول عنده مراجعين....
وطلع عليه امر القاء قبض وظلت الشرطة تدور وهو لاحس ولاخبر...اشكد تمنيت يخابرون من المركز ويبشروني أنه مقتول لو متكطع لو اي شي اسوء من هذا
طبعا اهلي رجعوا لكركوك بدون مايحجون او يودعون بيت عمي واني بقيت ابيتي لان ابويا كال فكري واتخذي قرارج ومثل ماتريدين يصير تبقين يمهم او ترجعين لكركوك ...
بقيت يومين مااروح لبيت عمي مااعرف اروح شاحجي وشاكوللهم....ورا يومين اجاني عمي دك الباب فتحته كال بنتي اكدر ادخل والله مشتاق لسراوي حضنته وبست أيده كتله عمي ليش هيج تحجي كعد ودمعته بطرف عينه كال مااريد ابجي اخاف عبالج ابجي ع ذاك الكلب بس والله گلبي محروك عليج وع بأن وع اهلج...كتله عمي انت هم مصيبتك جبيرة واحنا أهل والمصيبة عمت ع الكل....والله يعينا ع الجاي...
مسح دموعه وحضني كال بنتي انتي وبنتج اخليكم بنص عيني اذا قررتي تبقين واذا رجعتي لأهلج ماامنعج بس حيل اشتاقلكم ولو هم مااعوفكم أظل امرلكم انتي انظلمتي يمكن اكثر منا وصبرتي لهنا وبس شوفي حياتج ومستقبلج بعد اسبوعين ع الامتحانات مال دور الثاني شدي حيلج واحنا نساعدج كملي واتخرجي وشوفي دربج
كتله عمي اني راح أبقى اكمل امتحاناتي وراها ارجع لكركوك بس اوعدك مااحرمك من سرى ونبقى اهل ونتزوار انتوا ماالكم ذنب وانكسر ظهركم حالكم حالنا..واذا ع سفر اهلي بدون وداعكم اعذرهم الصدمة عكدت لسانهم لاتزعل منهم
كال والله مازعلان بس اخاف اخويا كرهني واني ماالي غيره وماالي ذنب بالي صار...
وراها خابرت ابويا بلغته بقراري ...
وفعلا بيت عمي وكفوا وياي وساندوني كملت امتحاناتي ونجحت واتخرجت..واجا الوكت الي اشيل غراضي واطلع نهائي من بيتي شكد جانت صعبة حسيتها فشلة رحت بوحدي ارجع بأثنين وويايا جرح مايشفى عمي بنفسه وداني لكركوك وراد يعوفني اباب بيت اهلي ماقبلت وخليته يدخل وحضنه ابويا واعتذر كال والله منك ماشايل بس المصيبة خلتنا كلنا نخرس..
اوووووووف اوووووف رجعتي يا أمان لنفس نقطة البداية ووياج حمل اثكل شراح تسوين وشلون تكملين......
وشضامتلج هالدنيا بعد الدنيا الي كلما رخيتيلها الحبل رجعت لفته ع ركبتج
تابع
يتبع..
..ابيت اهلي.ظليت اعيش روتيني انام اكعد العب مع سرى ...واسال روحي شأسوي .. قررت ابدي من جديد وأسند روحي واعيش بنتي...
ابويا صار مايفكر بشي بكد مايفكر بسرى جان يحس بذنب اتجاهي ع أن هو خلاني اعيش ابيت عمي وتطورت العلاقة انطاني لابنهم...بس اني اهونها عليه واكله لا بابا هي قسمه ...
واني افكر إبان خطية الي صار بيها مرض نفسي انعزلت عن العالم ماتقبل تحجي ولاتشوف احد
مرت الايام والشهور واجتني فرصة للتعيين بأحد المدارس الأهلية وقدمت اوراقي والحمدلله انقبلت وجان اكو حضانة بصف مدرستي ورغم معارضة اهلي بس اني سجلت سرى بالحضانة لان ردتها تتعلم تصير اجتماعية مو تكبر منغلقه ع نفسها ردت اهيأها للمستقبل لان الجاي اصعب...وصار عمرها سنتين تقريبا مرت سنة ع الي صار..حاولت بهالفترة انسى غزوان والمأساة الي سببها الي ولعائلتي ويومية ع الصلاة ادعي الله لاينطيه وين ماجان...
طبعا بهالفترة وبمساعدة عمي كدرت احصل ع قرار المحكمة بالطلاق وصرت حرة نفسي.....
.بيوم طلعت الصبح رحت لدوامي وأخذت سرى مثل كل يوم للحضانة وطبعا موصيتهم ماينطوها لاحد غيري ...قبل لايخلص الدوام خابروني
_كالو ابو بنتج جاي يريد يأخذها واحنا ماقبلنا ننطيها ...
اني اتخبلت منو ابوها وشنو وليش طلعت ع السريع دخلت الحضانة مالكيت سرى....سالت كالوا كاعدة ويا ابوها بغرفة الألعاب ركضت عليهم. اني افكر معقولة يجي غزوان بعد سنة يظهر واتخيل شراح اسوي اذا شفت قاتل اخويا ودخلت هم مالكيتهم اتهسترت كمت اصيح عليهم انتو شلون تنطون بنتي كالوا والله ماانطيناها كلناله اكعد اهنا وخابرناج وصفولي الرجال طلع بالظبط غزوان طبعا خابرت اهلي والشرطة سدوا منافذ الطرق وعمموا الصورة ع السيطرات كضيت ليلتين بلا بنتي شفت الويل بيهن...بس الله العالم بحالي واليوم الثالث صار طبعا اهلي خابروا بيت عمي واجوي ياربي اني بكابوس لو صدك عايشة هالاحداث هاي ليش هيج الدنيا معاديتني والظروف كلها ضدي رغم اني من اول ماشبيت رفضت الغلط ودست ع نفسي حتى الله يوفقني...وبعد كل الي شفته بست ايدي وجه وظهر كلت الحمدلله الله يحفظلي سرى واكدر أكبرها.... ياربي أظل اثق بيك اكيد الك بيها حكمة...
صارت ليلة تجر ليلة واني مثل المتخبلة ماعندي لانوم ولا اكل وكل ساع افز احس صوت سرى وهي تبجي لو تضحك لو اركض ع الباب اتخايلها تجي...بقيت ع هالحال شهر وحالتي تبجي الصخر مدرستي عفتها مثل ماعفت كل حياتي وبقيت بس افز واتخيل ابجي واصيح الطم واتهستر فعلا ايام سودة جانت ....
بعد شهر وبدون مقدمات انفتح الباب دخل مصعب وياه سرى ...اي والله دخلت سرى تركض عليا بس هالمرة اني ماكمت اركض عليها لان كلت هسه اكوم اركض واهلي يرجعوني ويقرون قران ع راسي وبالنتيجة ياأمان اتخبلتي مثل كل مرة.. اتقربت سرى وحضنتني واهلي حواليا يكولولي امان والله هاي سرى احضنيها والله هي....يااااااااه اي صح هاي ريحة بنتي وريحة ايهم اي حضنتها واني ابجي واشهك اختنك من البجي ياالله شلون شصار...وين ومنو جابها ...
مصعب
_كال الصبح خابروا من المركز وكالوا بسرعة تعالوا كال رحت بلا مااكول لابويا وعمي...
رحت لكيتها يم الضابط بحضنه سرى هي كبل ركضت عليا ...شلتها بستها واحضنها وابجي انطوني مي وراها سالت شلون وين ووين ابوها الأغبر
الضابط كال البارحة بالليل غزوان اتعرفوا عليه بالمطار ويا سرى بجوازات مزورة وحاول يفلت وقاوم الشرطة وهم رموا عليه وقتلوه...والبنت اتسلمت الهم وخابرونا ....جان يريد يأخذها مو حبا بيها بس لان وين مايروح ويطلب لجوء علمود الطفله يسهلوله شوية
طاح حظ الرجول اذا ديستعين بطفلة حتى ينهزم....
أنت تقرأ
امس من الماضي يعود
RomanceSarab Alaga عندما تقرر الابتعاد وتدعي انك لاتعرف السبب عليك ألابتعاد اولا عن اقرب الناس اليك لأنه الوحيد الذي سيكشف انك تكذب... وانك تعرف السبب الذي اثار فيك رغبة الابتعاد لكنك ترفض الاعتراف به حتى مع نفسك....لأنك مقيد بوعد... خاص بصفحتنا ع الفيس بو...
