بقينا شهرين ع هالحال اني رغم حبي لحسام بس كلام ابويا سيف ع ركبتي مستحيل جنت اسمح لنفسي اوكف بوجهه واعارضه...من شفت ماكو امل وحسام سوا الي عليه واكثر واهله هم ماقصروا قررت اكبر واصير مسؤولة عن اهم قرار أخذه بحياتي قررت اني من يمي انهيها....من جهة حتى مااخلف وعدي لأبويا ومن جهة حسام هو هم يروح يشوف دربه كافي ليش يربط نفسه بيا وماكو فايدة...قررت حتى إذا كان قراري ع حساب گلبي وسعادتي مرات الحياة تخلينا كدام اختيارات صعبة لازم نختار الصح مهما كان صعب... ..خابرت حسام
_ كتله حسام الشغلة مبينة وصلت حدها للنهاية ومابقى امل.
_كال امان لاتخافين حياتي اني ماابطل ابد
_ ياابن الناس الي بينا قدر و الله مامقدرها النا سويا...انت ماقصرت وعدت ووفيت بس ماكو امل عوفني وروح عيش حياتك انت من طريق واني من طريق
طبعا اني محروك گلبي واحجي مجبورة وهو يكلي
_انتي جبانة تتخلين عن حبنا من اول شي يعترض طريقنا لا امان اني مستحيل اعوفج .....
_كتله حسام انت حاولت وسويت الي عليك بس ماكو قسمه
_كال وانتي لعد شسويتي شنو جان موقفج غير انج خذلتيني واستسلمتي هذا الي الله كدرج عليه والله عفية
_ ..كتله حسام اكيد تحجي هيج بس بداخلك متاكد اني اشكد احبك وانت اول واخر انسان بگلبي اني تعلمت الحب ع ايدك بس الموضوع اكبر مني
_لا امان لا حبنا اكبر من كل موضوع حبيبتي بس لاتضعفين انتي والله اخذج اخذج وبرضا اهلج واسويلج احلى عرس بس انتي...
_حسام حساااااام يكفي اصحى الحلم انتهى ولازم نرضى بالواقع ونعود روحنا ع الفراك آسفة....آسفة كلش
سديت التليفون....و ع اساس حسمت امري خلص لازم اعود روحي
حسام هم مااستسلم هالمرة راح لابويا بالمدرسة وحجاله بصراحة عن مشاعره وبابا احترمه كلش بس هم بكل صراحة انطاه اسباب الرفض..ورغم حسام هوايا حاول يقنعه انه هو ماأله علاقه بطبع اهله وراح يحاول كل جهده يخليني اعيش بنفس المستوى بس بابا أنهى الموضوع وياه ....ومااقتنع
ليالي هوايا مرت صعبة عليا بين بجي وقهر من جهة ولازم امثل اني عادي مامهتمة كدام اهلي من جهة ثانية.... محد جان يحس بيا غير امي حبيبتي بدون ماتسأل جانت تعرف ان الوعد الي انطيته لابويا دمر حلم بگلبي وخلاني التزم واني مجبورة...
اجا وكت الدوام طلع اسمي بكلية التربية قسم تاريخ ابغداد طبعا بسبب الظروف الأمنية ووضع البلد جان صعب اروح من كركوك لبغداد نفس الوقت جان لازم ابعد حتى اساعد نفسي واساعد حسام نتخطى الأزمة وننسى بعض واهلي مايريدون ينقلوني لكركوك اني فاهمتهم حتى يبعدوني نهائيا بفكرهم هاي لمصلحتي.. ...طبعا الشغلة صعبة جانت اول مرة ابعد عن اهلي عن اخوتي عن حسام ....
بيت عمي محمد ابغداد وعلاقتنا وياهم كلش قوية وحلوة عنده بنت بكد ريم اختي اسمها بان وولد اكبر مني ب ٧ سنوا ت اسمه غزوان من الصغر نحب نلتقي ونلتم وجنا هواي نتناكر....
بابا كال بكيفج تريدين تبقين ابيت عمج لو قسم...اني فضلت القسم مهما يكون اخذ راحتي اكثر..وطبعا عمي زعل بالبداية لان جان يحبني كلش ابقى يمهم. رضيته كتله والله عمو هواي اجيكم لحد ماتضوجون مني... .المهم رحت اول اسبوع شوية صعب جان عليا لحد مادبرت مكاني بالقسم الداخلي ...اتعودت ع الوضع بيه بسرعة وصرت اني مااريد ارجع للبيت جنت حابة ابقى وحدي بعيد عن ضغط اهلي من جهة وضغط حسام من جهة....داومت والحمدلله كدرت اكون صداقات بالقسم والكلية واموري احاول ارتبها وجنت من اسافر لبغداد اتفق ويا اصدقاء ايهم..جانوا هم طلاب اهناك..حبابين كلش وارتاحلهم جنت اعزهم مثل اخوتي عدا واحد بيهم جنت اضوج منه اسمه رامي ..بس شعليا المهم مااحتك بيه الطريق جان ونسه حجي ضحك ولو مرات الوضع جان يخوف ..
بعد شهر ونص تقريبا من الدوام...فد يوم اتفقنا ويا بنات صديقاتي بعد ثاني محاضرة نروح نتريك سوا بكافتريا الكلية...
طلعت من الشعبة احجي واضحك مع البنات لكيت حسام كدامي ...ياااااا ماتتصورون شصار بيا شكد مشتاقتله ....گلبي يريد يركض عليه متلهف بس عقلي يرفض واذكر وعدي...
قررت امشي واخليه لازم ابقى ع وعدي لابويا......مشيت من كدامه وعديته بخطوتين عبالك روحي بقت يمه لحكنى
_امان امااااان
جرني من ايدي كدام الطلاب..صرنا وجه بوجه يااااااه طول فترة علاقتنا ماصار هيج شي....تخبل عيونه..
_ هيج امان هيج قررتي ونفذتي وماحسبتي حساب گلبي صرنا اغراب تمشين وتعوفيني وكأنما ماتعرفيني..
_كتله حسام عوف ايدي عيب من الناس..
_كال لازم نكعد نحجي ..
رحنا سوا لكافتريا الكلية كعدنا بالبداية كلشي ماحجينا اني مدنكة وهو صافن عليا
_يعني اني جنت اخاف عليج من نفسي وضميتج الي بالحلال تاليتها حتى اعوفج لو تتخلين عني...
_ كتله حسام ادري انت تلومني وتظن اني اتخليت عنك ...بس والله اني احبك واظل احبك نفس الوقت مستحيل اوكف بوجه اهلي. افهمني..ارجوك خلينا ننهي الموضوع وروح عيش حياتك وطلعني من بالك...
_كال زين طلعتج من بالي لعد گلبي شلون شسويله
_ كتله القدر اقوى مني ومنك
_كال لا حبنا اكبر ..
_ارجوك لاتجيني بعد لان راح تأذيني هاي اذا هسه مااذيتني من يوصل الخبر لاهلي ....
....
أنت تقرأ
امس من الماضي يعود
RomanceSarab Alaga عندما تقرر الابتعاد وتدعي انك لاتعرف السبب عليك ألابتعاد اولا عن اقرب الناس اليك لأنه الوحيد الذي سيكشف انك تكذب... وانك تعرف السبب الذي اثار فيك رغبة الابتعاد لكنك ترفض الاعتراف به حتى مع نفسك....لأنك مقيد بوعد... خاص بصفحتنا ع الفيس بو...
