امس من الماضي يعود

الجزء السادس//امس من الماضي يعود

#Sarab

نجحت صرت رابع واني الحمدلله كلش مرتاحة ويا غزوان
يحبني ومدللني وسراوي مغركيها حب وحنان اهلي وبيت عمي لان اول حفيدة ....وخطبنا بأن لايهم فدوة لعينهم شكد جانوا فرحانين بس مامحددين العرس بعد....
بعد فترة حسيت غزوان مضغوط بالشغل ياعيني عليه واني صار وقت التطبيق مالتي جنت فرحانة راح اخلص واتخرج وغزوان واعدني أن يساعدني بالبحث بس اشوفه مشغول هالفترة مااكدر اطلب منه وصار ينسى يكلي اوديج لأهلج ومن أكله ياخذني مايقصر بس مو مثل قبل حتى طباعه تغيرت صاير عصبي وما يحجي هوايا واسوء شي بدأ كلبه يتنحس عليا باللبس والطبه والطلعه مااعرف ليش بس اني كلت اكيد من الشغل ومن جنت اسال والح يزعل ويتعصب ويعوفني ويطلع...هم صبرت كلت الا عنده عذر
هالفترة كله رغم ابد مانسيت حسام بس جنت احاول قدر الامكان اصير زوجة صالحة ارضي ربي وزوجي غزوان للاسف صار بمرور الايام حتى مع سرى مو زين مرات يمد أيده عليها وعمي مايقبل فيتناكرون...واني أظل ساكته
اخر مرة رحت بيها لاهلي ظل يدردم بالطريق دوخني بس اني متحملة واكول اكيد حالة مؤقته...اهناك كلت لأمي ماماتي اني هالمرة راح اتاخر شوية مااجي شهرين او اكثر...احس غزوان حيل تعبان وضايج هالفترة مااريد اضغط عليه...
غزوان باليومين اهناك اكل گلبي ع كلشي وحسيت عبالك عنده مشكلة ويا اهلي وويا ايهم بالذات المهم رجعنا وضعه أطور صار هواي يستعمل الموبايل وينشغل عني وعن سرى..
ومن احاول اعرف شبيه يتعصب ويصيح ويطلع اني كأي زوجة بالي راح يم مرة ثانية ربما بحياته
قررت احجي مع عمي مو شكوى لاوالله بس اخاف عنده مشكله ومايكول ونفس الوقت احافظ ع بيتي....عمي
_كال اني احاجيه بالليل ....من راجع من العيادة بالباب ابوه منتظره وحاجين ...
يوووومة فجأة دخل عبالك بركان كام يحجي عليا.ويصيح
و_انتي شلون تشكين لابويا ...
_كتله اني قصدي جان اساعدك
_كال عود من اشكيلج عتبي عليا ...
بقيت حايرة هذا شبيه وليش شسوي جنت اكضي يومي بالدوام واشتغل بالبحث وعمتي الله يسلمها تهتم بسراوي وتساعدني صار وكت الإمتحانات النهائية...فجأة غزوان قرر ماكو طلعة من البيت وماكو امتحانات وبدون اي مبرر خلص امر واني لازم انفذ طبعا مارضيت حاولت اناقشه وهو سد باب المناقشة نهائيا ادخلوا عمي وعمتي واجوا اهلي عرفوا وهو حالف اذا امتحن يطلكني ...كبرت عقلي كالعادة كلت بنفسي
_يلا امان انتي من يوم يومج تكبرين عقلج حتى لو ع حساب نفسج هالمرة هم مايضر...
وأخذته ع كد عقله وأجلت امتحاناتي للدور الثاني كلت بلكي يتغير......وهذا يوم بعد يوم يتجاوز اكثر...صارت اموره مخربطة وملابسه وستايله كلها ع بعضه تخربط ومنعني من الطلعة نهائيا واذا كلش كلش طلعت وياه لازم البس نقاب رغم بصراحة مااحبه مكتفية جنت بالحجاب الحمدلله بس هم كلت ميخالف .شافني سكتت هالمرة أطور صار يمد أيده عليا بكل صغيرة وجبيره.....اتحملت ماطلعت اسرار بيتي لأحد...صار يدخل بين بأن وايهم ويحاول يفركهم شفت هذا كلما أكله ع شي تدلل وانفذ يطلع بشي اكبر منه فقررت اعرف لازم اعرف شبيه دورت باغراضه مالكيت شي يثير الشك بالسيارة بالموبايل ماكو...
لحد ما فد يوم سمعته يحجي بالتليفون يكول هذا اول صيده الي وراح انفذها واخلص من الي الله بلانا بيهم.....كلمات غريبة جنت اسمعها اول مرة ماافتهمت معناها ...أجلت التفكير بالموضوع لان ايهم بالطريق خابر كال اجي واني حيل مشتاقتله صار فترة مارايحة لاهلي
اجا وياه احلى مفاجأة اهلي كلهم جايين كلش فرحت بيهم ونسيت ذاك الكالب وجهه......وسهرنا للصبح نحجي ونضحك...واكثر شي ضحكنا عليه من سرى جلبت بأيهم ماتقبل تروح لاحد وحتى ماتقبل يكعد قريب من بأن..واحنا ناصبين عليهم ونصنف
جنت افرح من اشوف ايهم وبان فرحانين ابعض جنت اكول يمكن الحلم الي اني وحسام حلمناه هم يحققوه...ايهم جان جايب هدية سلسلة ذهب نص قلب لبان والنص الثاني فضة هو لأبسها.... بداخلي جنت ضايجة من تصرفات غزوان واداري لحد يحس....
الصبح كعدنا متاخرين من السهر واتفاجأت غزوان يكول اروح اجيبلكم كيمر وعسل وصمون حار فرحت كلش كلت اي يا الله بلكي أزمة وعدت ....و اذكرت امتحاناتي كلت بلكي الحك امتحنهن بالدور الثاني..جان يكول لايهم تسحب سيارتكم حتى اطلع سيارتي لو نروح بسيارتكم طبعا ايهم كال لا لا عليمن نروح بسيارتنا ماكو فرق.....طلعوا راحوا... اني كمت احضر الجاي والموجود بالبيت خير من الله ولان جنت فرحانة كلتلهم راح اسويلكم كعدة بالحديقة وخابرت عمتي كتلها تعالوا اتريكوا ويانا واجوي...والتمينا سوالف وضحك من الصبح وننتظر ايهم وغزوان يرجعون وابويا وعمي كالوا بعد الريوك نرجع نحاجيه علمود امتحانج. فرحت كلت ان شاء الله .....شوية اتاخروا رحت اخابر غزوان قافل جهازه ومصعب يدك ع ايهم ما يجاوب كلنا يلا بلكي انشغلوا بشغلة او ازدحام الطريق...بس اني بصراحة ظل بالي وتخربط تفكيري ياترى وينهم ليش اتأخروا.....