Sarab
حاولت كلش وياه حتى يرجع لكركوك واني گلبي عاصرني...وبداخلي اتمنى يتمسك بيا ..
_جان يكلي يعني انتي بكل عقلج تحجين ولج امان انتي روحي اكو احد يتخلى عن روحه ...لا لا لا الحل الوحيد تجين ويايا هسه..كومي
وكام وكف لزم ايدي
_كتله حسام وين وين نروح
_ كال وين يعني تجين ويايا اخذج نتزوج ونطلع للخارج...كتله يكفي شقى مو وقتها ابدا
_,كال والله مو شقى اني مرتب كلشي انطيني اوراقج اكو من يطلعلج جواز
_حسام روح ولاتخليني اغير الصورة الحلوة عليك الي بعيني هاي مستحيل اسويها...روح وخليني ذكرى بحياتك
ظلينا نحجي هو يريد يقنعني واني اريد اقنعه...وماوصلنا لحل..خلص الدوام كتله حسام اني لازم ارجع مايصير اتاخر...ارجوك طلعني من بالك وحاول تتأقلم..وماانطيته فرصة بعد ..عفته ورجعت للقسم....واليوم الثاني هم اجا لان ماراجع لكركوك بايت بالفندق... ولكيته اباب الكلية ينتظرني واني وياي صديقاتي كلش ارتبكت.....
_كتله مااكدر احجي وياك الله يخليك روح.
ماقبل اشترط عليا ان
_شرط نكعد بعد الدوام نحجي
_كتله الله كريم ودخلت ...
طلعت من المحاضرة بدل حسام لكيت ايهم وغزوان ابن عمي ينتظروني وياريتني ماطلعت....سلمت عليهم غزوان كالمعتاد كبل بدأ تصنيف حجي وضحك هذا طبعه كلما نلتقي بس ايهم وجهه ماجان يتفسر....ومن سألته
_ ايهم حياتي شبيك
_ كال ماكو شي شلونج
_ زين وحدك جاي لو اهلي هم كال لا اجيت ويا ابويا بشغلة بالوزارة كلنا نمر عليج نرجعج ويانا
_ كتله بس هسه مو وكت نزلتي ...
_لا ابويا كال لازم تنزل للبيت هالأسبوع.مشتاقيلها..
_زين وين ابويا
_ عفته بالوزارة واجيتج
اني كبل گلبي انقبض حسيت صاير شي....ومنا ظل بالي حسام ع اساس ينتظرني بعد الدوام ياترى وين اختفى ..
المهم اجا ابويا سلمت عليه وبسته بس حضن ابويا هالمرة جان بارد كلش مو مثل كل مرة يحضني ونظراته بيها شي...خفت كلش...طلعنا من الجامعة رحنا اتغدينا ابيت عمي وابويا ساكت كلشي ماحجا ...وراها ابويا كال يلا اتحضروا حتى نطلع...سلمنا ع بيت عمي وطلعنا قبل مانصعد السيارة رجعت سالت ايهم شكو...كالي اصعدي بالبيت تعرفين...وضحت الشغلة اكيد واصل خبر الهم ....والله اعلم شراح يصير...
الطريق كله ابويا ساكت. ايهم ملهي روحه يباوع من الشباك ...ساعات الطريق محد نطق ولاكلمة..واني مرة افكر بروحي ومرة افكر حسام شصار منه
وصلنا البيت نزلت من السيارة امي جانت بالمطبخ سلمت عليها حضنتني بس هم مو طبيعية...بيدي اغراضي كلت اصعد لغرفتي بعدين هي تبين...وبعدني دأصعد او درجايه صاح بابا
_امان ذبي الغراض وتعالي...
صوته جان يهز الجبل بنبرته كلش خفت انداريت وعفت الغراض ورحت عليه وكفت كدامه
_ كتله اتفضل بابا .....
_ هو هذا الوعد الي وعدتيني بيه هي هاي التربيه الي ربيتج عليه .....
عينه تذب شرار ولاول مرة ضربني راشدي خلاني افر بمكاني الا جاب الدم من خشمي ووكعت.....مسحت الدم بذراعي وكمت ع حيلي ووكفت كدامه ...
_كتله بابا اني مااعرف بالظبط شوصلولك حجي بس بداعتك وبداعة امي واخوتي اني ظليت ع وعدي...
_كال اي والدليل اليوم مو ؟؟؟اصلا انتي مال ذبح..
_كتله انت ضربتني راشدي ولو ذابحني هم مااشيل عليك بگلبي بس اموت واني مقهورة لان ماصدكتني
صح حسام اجاني اكثر من مرة بس والله العظيم كل مرة يجي أكله روح شوف حياتك احنا ماكو قسمة بيناتنا وكلام ابويا اني مااكسره...
طبعا اخوتي وامي واكفين اباب الصالة وخطية كلهم خايفين عليا وامي تبجي بلا صوت..عدا ايهم الي نظرته جانت حيل قاسية واني اعرف بعد روحي شكد حنين ويحبني
جان يدخل ايهم بيده الموبايل يشوفني صور
_يكول وذني شنو ها شنو فهمينا....
اباوع الكى الصور ماخذيها من جنا كاعدين بالكافتريا وطبعا ظهري ع المصور ووجه حسام واضح...
_كتله حياتي الجابلك الصور وهو اعرف رامي ماكو غيره ليش ماصورني من كدام حتى تشوف وجهي شلون جان ...لا ايهم مو اختك الي تنزل راسكم وتعرفني كلشي الا سمعتي وسمعة اهلي
_جان يكول لاوالله الظاهر احنا وثقنا بيج زايد...
حسيت عبالك ضربني سجين بأسلوبه هذا واعرف من ورا گلبه يحجي ظليت اباوع عليه ودموعي تنزل بلا صوت ماكدرت ارد ..اهنا اختي ريم ماأتحملت دخلت تصيح ع ايهم
_ انت لو كايل رامي هو الي صور جان كتلك ليش...رامي مو حبا بيك يراقب امان ويا حسام...لا والله بس حتى ينتقم منها لان هي هددته اذا اتحارش بيا راح تكلك عليه...وهو بطل بعد ماجان مطلع روحي بطريق المدرسة....
اهنا بابا نظراته ماتنوصف متعجب منصدم مايتفسر بس اتمالك نفسه وبس يباوعلي و أيهم فدوة لعينه ظل يباوع مرة الي ومرة ل ريم جان
_يسألني بصياح احجي صدك كلام ريم احجي لاتظلين ساكته
اني جنت ملتهية بدموعي ودرت وجهي عنه لان عبالي ماراح يصدك شماحجيت ... مااتحمل انهار واجاني بصراحة اني خفت عبالي راد يضربني خليت ايدي ع وجهي لكيته حضني وكام يبجي فدوة هو هذا اخويا الي اعرفه اني هم حضنته اعرف هالبجي معناه اسف اخويا هذا طبعه من يغلط ويريد يتأسف مايكدر غير يبجي...
_كتله ميخالف يبعد عيني اني مازعلانة منك بالعكس انت حزام ظهرنا احنا البنات وواعرف اشكد تخاف علينا ...
امي اخذتني
_وكالت اصعدي ارتاحي ماماتي
وعيونها مورمة من البجي...عفتهم ورحت اصعد واسمع امي _تكول بصوت ناصي مو كتلكم لاتستعجلون انطوها فرصة تدافع عن نفسها...بس انتوا ماصدكتوا...
دخلت غرفتي وسديت الباب....صرت ابجي بحركه ضغطت ع نفسي فوك مااتحمل ودست ع گلبي حتى أبقى قوية ومحافظة ع وعدي وتاليها هيج يصير...ظليت بالساعات بغرفتي ودوموعي مانشفت...وخطية ريم كلساع تجي
_ فتحي امان الباب خلي اكعد وياج
_اكللها ريوم اعذريني اريد ابقى بوحدي...
لحد مااجا ابويا ودك الباب
؛
أنت تقرأ
امس من الماضي يعود
RomanceSarab Alaga عندما تقرر الابتعاد وتدعي انك لاتعرف السبب عليك ألابتعاد اولا عن اقرب الناس اليك لأنه الوحيد الذي سيكشف انك تكذب... وانك تعرف السبب الذي اثار فيك رغبة الابتعاد لكنك ترفض الاعتراف به حتى مع نفسك....لأنك مقيد بوعد... خاص بصفحتنا ع الفيس بو...
