امس من الماضي يعود

الجزء الرابع//امس من الماضي يعود

دك الباب سمعت بابا يكول تسمحيلي ادخل مسحت دموعي وركض رحت للباب فتحته لكيته واكف يباوعلي
_ يكلي تقبلين ادخل
_يووووومة فديت عيونك بابا شلون تستأذن
حضني بقوة ورجعت احس بالدفا الي افتقدته باخر مرة
_كال بابا اني اسف صح اتسرعنا بس والله مااتقبلت فكرة أن بنتي الغالية الي اثق بيها اول فرحتي تخون الوعد...
بجيت بحضنه
_كلت بابا انتوا اغلى شي بحياتي مستحيل اسوي شي يزعلكم مني لا هسه ولا بعد ميت سنة..
_مسح دموعي ومس ع راسي
_كال بابا يكفي الي صار ننساه و هسه لازم نعرف شنسوي بالأيام الجاية انتي اول شي لازم تعوفين القسم وتستقرين ابيت عمج ابو غزوان بما انه هو اصلا جان شايل ع خاطره لان مابقيتي يمهم تعرفين شكد يحبوج...ويوميا لو هو لو غزوان يوصلوج للكلية...وخاصة انتي ع درب المستشفى الي يداوم بيها غزوان...لان ذاك الولد ..وطبعا يقصد حسام..اندل طريقج هسه يومية ناطلج اخاف يجي يوم اباب القسم ويحرجج...باباتي احنا مانكدر نتحكم بمشاعره هو بس انتي ان شاء الله اعقل منه وراح تعدين هالازمة وتشوفين حياتج...
_كتله اي بابا مثل ماتكول راح اسوي
.طبطب ع ظهري بابتسامة خفيفة
_كال هاي هي حياتي لعد ارتاحي ولو احب تنزلين ع العشا وتنورين السفرة حتى ترجع البسمة ع وجوه اخوتج خطية حيل انقهروا ويمكن زعلانين مني ...
_وي لا بابا شحدهم بس خلي ريم تصيحلي من يجهز العشا انزل طيارة
ضحك بابا وطلع وسد الباب .....
اوووووووف اوووووف اخاف صدكتوا اني بهالسهولة اتخليت عن حسام والله داشوف الموت بعيوني كل يوم بفركاه بس شسوي ذولي اهلي داحمل نفسي فوك طاقتي
شلون انسى اول واحد حبيته اول واحد كالي احبج اول واحد يخاف عليا ويسميني حبيبتي شلون ياربي ساعدني
بس شسوي لازم اكون قوية لخاطر مااكسر اهلي...
ورا شوية اجت ريم
_تكول العشا جاهز حياتي نزلي ويانا أمانة
نزلت شفت كلهم وجههم يبجي عبالك..دست ع گلبي وكمت احجي واتشاقه هم شافوني هيجي اطمانوا كلشي تمام وعدا اليوم بخير وسلامة وسهرنا اني واخوتي للفجر حجي وضحك ومصعب جابلنا نمنمات...التهينا بيها بس رغم كلشي بالي وروحي يم حسام....خلصت الليلة بقيت وراها هم لان صادف جمعة والسبت رجعت لبغداد مثل ماكال بابا بيت عمو حيل فرحوا بيا ..وبقيت يمهم ومن نزل لاهلي نفس النظام ويا الولد والبنات جماعتي فعلا مرتاحة جنت ونفس الوقت داتعب روحي واجبرها انسى حسام ...وماادري ياترى اني صح لو غلط ياترى صح اني اعوف حسام واتخلى عنه لو جان المفروض ادافع عن حبي ...الله اعلم بس كان دائما عندي امل الخيرة فيما اختاره الله ....
وبيوم جنا دنسافر لبغداد بالسيارة عبدالله كعد يمي
_ شلونج وشخبارج
_ كلت الحمدلله بخير
_كال امان اريد انطيج شي وكلش مستحي بس هوايا حلفني وانتي..
.اني عرفت شي من طرف حسام...ظليت ساكته مااعرف شاكول طلع رسالة انطاني
_كال اقريها وراها ذبيها حركيها بكيفج...بس هو لان حلفني والا اني اعرف اذا ايهم عرف يزعل مني وشرف ايهم هو شرفي
اخذت الورقة خليتها بالجنطة ابد مافتحتها جنت خايفة اضعف....المهم وصلت لبيت عمو محمد كعدنا حجينا وسألني ع اهلي وشكو ماكو ...وراها رحت لغرفتي ارتب اغراضي....
وعيني ع الجنطة ....مترددة افتحها لو اذبها..بالاخير قررت افتحها....

(((((حبيبتي شأتي ام ابيتي ستبقين حبيبتي اما بعد
بما انك كنت ولازلت كل حياتي واحلامي التي انتزعت من قلبي دون رحمة ....لذا أحببت أن اودعك لاخر مرة...
ضاقت الارض بي بعد تخليك عني فقررت أن أبتعد...اركب البحر وامضي...فأنا بكل الاحوال ميت لامحال...سواء كنت امامك اراقب فقدانك بتفاصيله الدقيقة ام ركبت البحر وغدرني ....او حتى إذا وصلت الى مكان بعيد... بكل الاحوال كنت روحا لي فأنتزعوك مني تخيلي مدى الكارثة..كنت لي الامان فماذا بعد
اتمنى لك السعادة من كل قلبي...ولن اطلب منك أن لاتنسيني فانا اخاف ع قلبك من التعب...والفقد الذي لاينسى يتعب القلب.......
سأترك العراق غدا.....
المخلص لك للابد .....حسام ....
احبك حد الجنون ياملاكي)))))

قريت هالحجي مااتمالكت روحي من البجي گلبي وجعني حسيت راح انجلط بس ماكدرت اسيطر ع روحي ابجي واداري صوتي ....لحد ماغفيت....صحيت ع عياط بأن تصيح بابا الحك امان مااعرف شبيها ما عرفت شكو ولا اكدر اتحرك عبالك مشلولة بس اسمع وراها فقدت...
وبالمستشفى فتحت عيني لكيتهم ع راسي سالت شكو شصار اني ليش اهنا
كالوا فجأة صاعد عندج الضغط ومن داخلة بأن شايفة دم من خشمي واذني صاير نزف من الضغط ...فلحكوا اسعفوني...كلت لعمو لاتكول لأهلي مااريد يظل بالهم عليا ...بقيت يمهم والايام جانت هادئة وشوية شوية صرت اساعد نفسي وأحاول انسى وجذب اذا كلت نسيت بس حاولت اتناسى
من شفت عبدالله مرة ثانية
_كتله اريد منك طلب صغير
_كال ادللي امان بعيني
_ كتله تسلم بس انطيني خبر حسام من يوصل بالسلامة...وراها اكطع اخباره اي شي لاتكلي عليه
_كال أن شاء الله....
بعد اسبوعين
_ كال امان حسام وصل لالمانيا ويسلم عليج كتله الله يسلمك ويسلمه....
هذا اخر خبر عرفته عنه.... مرت الايام واتقوت علاقتي بغزوان وبان اكثر واكثر .صرت صف ثاني...وبذيج السنة الاهل قرروا ......
..........امان تصير لغزوان .....

غزوان شاب مايتعيب دمه خفيف دكتور وعنده عدا الدوام عيادة واهم شي يصوم ويصلي انسان اجتماعي وعنده وقت يحدد لنفسه يتونس بيها مو بس شغل الحمدلله ابويا سالني جنت مترددة هو ديقنعني بان الي نعرفه احسن من الغريب اقتنعت ووافقت لان فعلا مابقى شي انتظره ومادام هذا يريح ابويا اني هم راح ارتاح .....وصارت الخطبة حفلة عائلية صغيره وليلة حلوة ....بيت عمي جانوا طايرين من الفرح وغزوان طلع حلو هاي اول مرة انتبه لملامحه تخبل