واختارك ثلج نارك

البارت 5..نظرات مسروقه

واختارك ثلج نارك
البارت 5
بقلمي روسكان
لبيج قصص روسكان
بسمه..يله لمار خلي نرجع لكليتنه احس روحي غريبه هنايه والكل تباوع علينه.
لمار ..يله امشي .
باوعت لساعتي ..الساعه 9:30..
اكولج ترة بعد وكت خبصتيني تره بعد ساعه كامله ياله تبدي المحاضرة الثانيه.
بسمه..غير انتي لزكتي هناك ..
لمار..لعد منروح للقسم نروح كبل للنادي.
هايعني نروح نتريك ؟
اي واريد افعل نت ع مبايلي ع الخط.
شنو ماعندح مجاني ؟
لاماعرف شلون افعل.
جيبي مبايلج اني افعللجياه.
هااج.
بالطريق للنادي فعلتلي بسمه النت المجاني .
شكرا حبي ..
اي بس لاتورطينه تصرفي بعقل .
بس ماكلتيلي شناويه تسوين يعني شعجب تريدين تستخدمين النت هسه؟
راح اراسله بس نكعد بمكان.
اوك بس خليني اقرة شتحجون.
طبعا اكيد.
دخلنه النادي ..
دروحي هسه اكعدي بمكان وحجزيلي وياج راح اجيب ريوك واجي.
حاجتني بسمه وراحت تجيب ريوك واني كالعاده اختار الميز البعيد الي بزاويه النادي ..بعيد عن العين بس خوش مكان للمراقبه ههههههه اشوف الجاي والرايح .
اووك.
سحبت كرسي وكعدت ومثل ماهو معروف سحبت الكرسي الثاني وقربته لي يمي وحجزته بجنطتي وعيوني مشغوله بالمبايل..
بعد المتابعه دزيتله طلب صداقه وكتبت مرحبا..
راسا طلع عندي تم العرض ..مرئي..شاف رسالتي..
فتحت عيوني ع وسعهن..
حجيت ويه نفسي ..
هستوني قبل ساعه شفته دخل محاضرة.
معقوله فاتح نت بالمحاضره لو خلص محاضرته.
كتب..
مراحب..منو ويايه ؟
كتبت ..
دزيتلك طلب ممكن توافق؟
كتبلي ..
ماوافق ع احد ماعرفه .
استفزني جوابه وهو عنده 1495صديق بالصفحه.
كتبت..
عندك 1495 صديق تريد تقنعني كولهم تعرفهم؟؟
بالجانب الثاني محمد كان كاعد بالمحاضرة وعيونه بمبايله ومبتسم من جوابهه ..مبينه وكحه..حجاهه ويه نفسه ..
كتبلهه..
هسه يعني مراح تكولين منو ويايه ؟
تحديته وخليتله شرط..ودزيتله..
سويهم 1496صديق واكولك منو اني .
ضحك محمد ..قبل التحدي..
راح ع طلبات الصداقه ويمكن من فرط الارتباك والتشويق العاش بي من اسلوبهه وياه رفض الطلب بالغلط ومامنتبه ع نفسه وكتب..
اوك تم.
رحت اتاكد هو قبل صداقتي لو لا لكيته رافض الطلب ..
استغربت ..رجعت كتبتله..
ماكو ..رفضت الطلب انت.
بسرعه رد..
شنو شلون ؟؟؟
يمكن راح تاكد من الموضوع ورجعلي ..
اي صح رفضته بللغلط.
وهسه شلون ؟
ك بادره مني ع الاعتذار راح ادزلج  اني طلب .
وصدوك دزلي طلب بدون تردد ..
كتبتله من بعد ماشفت انو وصلني طلب صداقه منه..
وك دليل ع قبول اعتذارك راح ابقي الطلب معلق..
وضحكت ويه نفسي ..احس الشغله صارت لعبه وحسيته مشدود اليه وحبيت العب ع اعصابه ..الادرنالين يقرة الف عندي وكلبي يدوك دوم دوم دوم سريع احس روحي دا اعرك من كثر ممتحمسه والضحكه تارسه وجهي ..
سالني ..
يعني متقبلين اعتذاري ؟
لا ..يعني افكر ..
احس دا عذبه مثل واحد حاط طبخه ع نار هاديه ومنتظرهه تتهدر ع اقل من مهلهه وصح اني دزيت طلب بس ثكلت حييييل ماريده يحس اني ذابه نفسي عليه.
حسيته ضاج..كتبلي..
اني بالمحاضرة ممكن نتراسل بعدين ؟؟
رجعت شديته اليه ماردته يفقد هذا الارتباط والغموض والفضول الصار بيناتنه غضيت النظر عن كلامه وكتبتله ..
اسمي رفل.
رد راسااا ..
اهاا عاشت الاسامي ..اسمي محمد .
اعرف ..جاوبته بثقه ..
شلون عرفتي ..جاوبني بغباء ..
مكتوب اسمك بالفيس مالتك ..
حس بسؤاله الغبي اليه ..
ااااا .. صح.
صدوك انت بالمحاضرة ؟
اي،صدوك ..ليش؟
هيج مجرد سؤال .
شكد عمرج ؟
19سنه وانت ؟
23سنه .
اهاا طولة العمر يارب.
تسلمين ..طالبه انتي ؟
اي مرحله اولى.
اي كليه ؟
هندسه .
اي قسم ؟
مدني.
اي جامعه ؟
هوبك هوبك ..احس روحي بتحقيق.
هههههه لامو هيج بس دا اتعرف عليج .
ع اساس اني الي جايه اتعرف عليك.
يله لعد شحابه تعرفين عني اسالي .
بهالاثناء رجعت بسمه.
كعدي كعدي ..
شكو لمور؟
راسلته وراسا جاوب ..فاتح نت بالمحاضرة .
يااا والاستاذ ؟
شكدريني ..
شحجيتي وياه ؟
هاج اقري ..
طيتهه المبايل واخذت منهه اللفه وكلاص الجاي وكعدت اتريك وهي لفتهه بيدهه وتقرة .
ثواني وعيون بسمه تعبر ع الكلمات المكتوبه والسطور بسرعه بسرعه ..
هااا شنو رايج ؟
حلوو ..ولج طلعتي مو هينه .
لعد شعبالج .
بسمه رجعتلي المبايل .
هاج هاج كتبلج.
اخذت المبايل منهه وبيدي لفتي والجاي كدامي..
شنو مشغوله ؟
هيج كتبلي..جاوبته..
لا بس دا اتريك .
اهاا عوافي.
ع كلبك .
شنو اليوم ممداومه؟
لامداومه بس عندي ريست اول محاضرة وهسه اني بالنادي .
اهاا كملي لعد.
لاعادي اكدر اراسلك.
انت اي كليه ؟
كليه صيدله ..مرحله ثالثه .
حلووو..
شنو الحلو بالموضوع ؟
صيدلاني وكذا .
وانتي هم مو قاصرة ..مهندسه وكذا ..
ضحكت ..
اي صح .
سكتنه شويه عبالك خلص الكلام.
فجاة كتبلي محمد.
اني المحاضرة الثانيه عندي ريست.
هنيالك اني قرب يخلص الريست مالتي.
يله خيرهه بغيرهه لو عادي اضربي المحاضرة.
لاشلون اضربهه ..لاطبعا.
عادي اضربيهه علمود

واختارك ثلج نارك ..
تكمله البارت 5 :
عادي اضربيهه علمود الكبل .
ماعندي كبل.
قصدي اني ..دا اتمازح وياج يعني .
انحرجت من شقاه حسيته جرئ ..حسيت بخجل رغم هو مو يمي ولا كدامي بلحظتهه بس احمرن خدودي وحاجيت نفسي ..شنو هالثقه الزايده وشبسرعه هالميانه صارت هستوني كوه قنعتك تحجي وياي.
غيرت الموضوع..
شلونهه دراستك ؟
اكيد صعبه بس يعني شي ع شي مدبرهه ماشي حالي وانتي ؟
مرحله اولى اني وماصارلي اسبوع من داومت وكولشي مافتهم ومبين كولشي صعب والمواد همين .
يمعوده المرحله الاولى كلك يعني يساعدوهم وينجحوهم  كولهم كلاوات يعني .
اهااا طمنتني .
عادي لتشيلين هم .
انت من بغداد؟
اي نعم وانتي ؟
اي همينه.
اهلا بيج.
وبيك اكثر .
بيا منطقه بالضبط بيتكم ؟
بالزعفرانيه وانت ؟
بالمنصور.
اهااا.
اييييي.
صارت ساعه 10:00وفجاة دغتني بسمه ونبهتني ع شي ممتوقعه يصيير..
شوفي لموش.
شنو شكو ؟؟
انتبهت ع باب النادي ..بين وجهه بابتسامه عريضه مثل الافلام حسيت الثواني دتمر ع البطئ والتصوير ومنظر دخوله النادي صار تصوير بطئ بعقلي وحركاته ثكيله وموزونه واني ماكدرت اضم ابتسامتي الي ترست وجهي حسيت مشاعري انفضحت ..شنو هالرابط الي بيني وبينك محمد شنو هذا الي يشدني الك بدون سابق انذار وبدون ماشوف منك ولا اعرف عنك اي شي ..عبالك روحي ارتبطت بروحه ..عيوني فاضحتني.. دكات كلبي طبل ..
كان محمد يمشي وكانه ممهتم باي شي داير مدايرة لابناس ولاطلاب ولا اي شي بين عليه الغرور.. يبراله ويحلاله ويلوكله .
دخل للنادي وعينه بمبايله ..اييي هاي اني اراسله وشاغلته ..شاغله هالكمر ..صرت اتغزل بي بيني وبين نفسي وصار عندي شويه غرور لان شاغلته عن الناس وملتهي ومتفرغ بس اليه ..
كتبتله سؤال بسرعه ..
انت وين هسه ؟؟
خلصت محاضرتي واجيت للنادي مال جامعه اريد اتريك .
اعوفك يعني تتريك ؟
لاعادي ظلي ..نتراسل .
اوك شراح تطلب ؟
بس جاي مو جوعان .
لا اني سبقتك وتريكت لان اطلع بدون ريوك .
عافيات .
ع كلبك.
اني عكسج ماعرف الا اتريك ياله اطلع..لازم.
جنت كل شويه ارفع راسي اشوفه اسرق نظرة لعيونه وهو يباوع بمبايله وميرفع عينه بس من يريد يشرب جاي واني اكتفي بالابتسام..