واختارك ثلج نارك

البارت الاخييير..زواج

البارت 26
بقلمي روسكان
الاخييير
صار ثاني يوم العصر ورحنه اني وماما ومحمد علمود نختار غرفه نوم وصدوك اختاريت غرفه ع ذوقي صاج تركيه تجنن لونهه جوزي فاتح والشقه تقريبا جهازهه كوله كامل وبقت بس النواعم واشتريت الفرشه البيضه واصر محمد يشتري البدلات مو نأجرهن  واشتريت 3بدلات والبدله البيضه الرابعه وبدله العقد الخامسه وحجزنه القاعه لبعد اسبوعين واخذلي ملابس نوم ع ذوقه وكولهه فاضحه تفضح اكثر مماتستر واني اجرجر بي اطلعه من المحلات فشلني كدام امي ميستحي وماقبل يشتريلي بعد وهو يكولي معليج انتي وامي تضحك علينه ..
وبالاسبوعين وسام اخذه الواهس وخطب بسمه ولبسوا الحلقات ومنتظريني ازوج علمود يسوون عقدهم .
مرن الاسبوعين ركض بركض رغم اني جنت مخلصه كل تحضيراتي وخدمني محمد هواي من هو اصلا مجهز الشقه جان وصار الوكت المنتظرينه ع احر من الجمر ..وسوينه الحنه والعرس بيوم واحد بالقاعه والقاعه الحاجزيهه جبيرة وفخمه ومختلطه بس قبل يوم خالاتي وعماتي وبنات خالاتي وصديقاتي سوولي حنه ومحمد هم سووله حنه بالبيت اصدقائه وكرايبه وبالليل اجه حناني بيدي هيج العاده عدنه وكالي شطالعه ..كتله شكرلمايه ..كال لامو جوعان هستوني اكلت لفه طالعه گمر وغمزلي وكالي باجر الموعد شكد ميستحي .
اجه يوم العرس ..كعدت متاخر طلعت من غرفتي لكيت البيت يرروووش كولهه تفتر وتركض كالو العروسه كسلانه ..ضحكت ع الكلمه ..اي اني عروسه ..عروسه محمد اليوم ..فاتت خالتي يمي صبحت عليهه كالتلي فوتي اسبحي بين ما احضرلج الريوك دخلت سبحت بسسرعه وطلعت تريكت وبدلت ووسام وداني للصالون اجتي وياي خالتي الصغيره وبنات عمي 2وبعدين لحكتني بسمه ..
كعدت ع الكرسي وغمضت عيوني وسلمت نفسي لام الصالون بدون ماعترض ع شي كتلهه كولشي ع ذوقج اعتبريني بنتج اختج الصغيرة وزوجي حلو واريد اطلع گمر بعينه ..
غمضت عيوني ورجعتلي ذكريات ليله البارحه ويه بنات خالتي وبنات عمي والسهرة الصباحيه والركص والردح الزين بعدين استلمني محمد غزل وغراميات لاساعه ولاساعتين وكل شويه ابتسم وام الصالون تكولي ها اجاج الغزيل وتزيد ابتسامتي .
صح كعدت متاخرة بس هم منايمه هواي واحس بروحي متكسرة شلون راح اقاوم لليل اكيد اول مانوصل للفندق انام احاجي نفسي واضحك بس رغم هذا التعب اني فرحانه حيل وكل شويه ادعي ربي يتمم فرحتي عليه ..تعذبت هواي بغياب حبيبي عني ..
تذكرت امي الصبح كل شويه احضن بيهه والفجر اجيت نمت بحضنهه وكل شويه تغرغر عيوني بالدموع وخالاتي يكوللهه لاتبجين خليهه تفرح لاتخربين هذا اليوم عليهه وادعيلهه الله يسعدهه وكل شويه هلاهل وركص خوب اني شبعت ركص من البارحه وشكد مصوريني اتمركص ويريدون يفضحوني يم محمد يكلوله مامصدكه واحد مكلبهه طبعا هاي سوالف وسام الخبيث سوااني سينما من التصنيف وطبكو وياه اولاد عمامي واني اسوي روحي مااهتم بس ودي اخنكهم واشلع شعرهم نتف شعرايه شعرايه ماردت هاليوم يخلص من كد الضحك والتحشيش فرحت فرح بعمري مفرحته .
ورة 5 ساعات خلصت ام الصالون شغلهه وياي لان مرافقاتي هم سون مكياج وتسريحه وشسوار خطيه بس هي تشتغل وحدهه ..باوعت لروحي بالمرايه وشفت نفسي غييير وحده ماعرفت نفسي ..
ب 2:30 اجه عليه وسام ووداني للقاعه جنت لابسه اول بدله مقرره البسهه بالحفله الي راح تبدي ب 3وجان لونهه سماگي ويه بياض جسمي طالع فد شي خيالي ..
بدت الحفله والكل تعجب شلون طالعه وماما تكولي اقري ايات ليضربوج عين.
هذا يوم ميتكرر بالعمر بس مرة كلت لبنات عمي هنه يلزمن الدي جي والتصوير لان اعرفهن مطربكات وجريئات هههههه وكلت لبنات خالاتي اليوم لاتخلني اكعود وفعلا ذبيت لحم مو بس ركصت شبعت رجليه راحت هاي من غيرلابسه كعب وكل شويه اروح اغير بدله وبسمه تصور وامي همين ركصناهه ويانه وكل شويه تكولي وج كافي ركص اثكلي عيب واني اكوللهه هو اني شكم مرة راح اتزوج بعمري بس هاي وللموت يمه اسم الله تكولي لاتجيبين طاري الموت .
صارت الساعه 5:00 احنه حاجزين القاعه للساعه 6:00 بس ب 5موعد جيه محمد ..خففوا الاضواء بالقاعه وصارت شويه ظلمه وجنت لابسه بدله جويتي من كدام قصيرة ومن ورة طويله وذيلهه يسحل ع الارضيه ومن فوك جانت البدله بتعلاكه وحده تصميم اغريقي وبنص القاعه ممر عرضه متر متروس اوراق مال ورد احمر ويبدي من باب القاعه لحد القنفه التخم الي جنت كاعده عليهه والمفروض اني امشي لمحمد من اول مايفوت للقاعه ونلتقي بالوسط نتحاضن وينفتح الضوة وتنزل علينه نفاخات واوراق زينه فضيه وصدوك صار هيج ..
ومن وصلنه واحد للثاني بنص الممر محمد حضني وباسني من كصتي وهمسلي ..وج هاي شطالعه ..
ويباوع ع جسمي عبالك يريد ياكلني بعيونه كتلكم البدله فضيحه ..
كتله ..عينك عيييب .
شنو عيب ؟والي لابسته مو عيب ؟
هسمت باذنه ..
مو اني عروسه ..
رجع همسلي ..واني العريس ..يعني مو عيب .
نظراته موتتني ..
شبيك ماشايف ؟
كلتهه بدلع ..جاوبني ..
تكمله البارت 26
بقلمي روسكان
ولج مو بس ماشايف محروووم .
رجع باس كصتي وطوّل بالبوسه والتصفيق والهلاهل طرشتنه واتفشخنه بالجكليت كل شويه يطشون علينه طن جكليت ..
وبدت الموسيقى هادئه وبدينه نركص سلو سويه ع اغنيتنه ..
شخبارك ..عساك بخير ..يالمالي الكلب والعين ..اموت اني ..وتعيش انت .. مثلك انه اجيب منين ..جنت موزين بغيابك ..بس وياك كولش زين ..احبك حيل ..واتمنه اعيش وياك احلا سنين ..وحتى ذا متروح من بالي وتطلع الروح ..اموت لخاطرك مسموح ..حضنه وحده تكفيني ..
اي هاي اغنيتنه ..هاي حبنه تجسد بيهه عبالك غنّاهه النه والكلمات علمودنه صارت .
اخذ روحي وكل حبي امانه عليك لاتنساني ..
حضني من خصري وقربني لصدرة ويهمس باذني كلمات الاغنيه ولمن وصل لهذا المقطع  ..اخذ روحي ..باوع بعيوني وخله كصته ع كصتي ..وهمسلي ..
واختارك ..ثلج نارك ..تحرگني .اصيح الله ..
احبج يابعد عمري ..وفيت بوعدي وياج ..
اموت عليك ..ماشكيت لحظه بيك ..

النهاااااايه ..
اتمنه تكونوا استمتعتوا بالقصه لاني اكتب لغرض امتاعكم لان الكتابه شغفي ومكاني الامن الي اهرب بي من ضغوط الحياة ومن كل شي مؤلم واتمنه خلقتلكم هيج جو ووصلتلكم احساسي ..
دمتم في عنايه الله ..

انتهى في
الاثنين 23/10/2017
الساعه 11:49 مساءا .