واختارك ثلج نارك

البارت 17..حسابي وياج طويل

البارت 17
بقلمي روسكان
يوم عادي بالنسبه ل لماربس مو عادي بالنسبه لمحمد كوة طلع عليه الصبح بعد الي عرفه البارحه.
لمار..اجاني الخط الصبح كالعاده ورحت وياه سلمت وكالعاده سوالف ويه بسمه طول الطريق للكليه .
البارحه جنت طالعه من محاضرة وشفته ..شفت محمد ..بعد غياب 4اشهر عبالك صارلي دهر مشايفته
مو بس 4اشهر ..
توقعت نفسي نسيته توقعت بعد ماكسرلي گلبي كدرت اوكف ع رجليه مرة ثانيه بس لا من شفته انهاريت كل دفاعاتي الي بنيتهه حته احمي نفسي منه انهارت بلحظه ..بنظرة من عيونه الي شيبت كلبي ..
كلبي حن اله ..ورجع يدوك اله ولو هو مابطل بس حاولت اتناساه ..
نظرات عيونه حسيتهه غريبه حسيته يعرفني او يمكن هيج تهيألي بس اعرف اني بالنسبه اله البنيه الي ضحكت ع صديقه ..ويمكن نظراته اليه جانت مشمئزة لذلك حسيتهه غريبه..
نزلت دمعه من عيني ودنكت ماردته يحس بشي ومن دا ادخل لمحاضرتي لمحته يباوعلي ..
بسمه تحجي تحجي واني صافنه بغير عالم وبس اهز براسي ع اساس اني وياهه ومنتبهه عليهه الى ان خلص الطريق ووصلنه للكليه هي سبقتني هي بغير گروب وعدهه مختبر واني ظليت امشي ع كيفي وحدي ..
شفته ..اي شفت محمد واكف يم الشجرة الي شفته يمهه اول مرة من دخلت جامعه بس عيونه حمر ..انرعبت منه..
تذكرت بيوم من تعارك وياي هم هيج جان وجهه هم جنه واحد يتقدم للثاني بس اني مو متقصده اصير بدربه بس هو هذا طريق قسمي ..
الامتار الي جانت تفصل بيناتنه بدت تقل بخطواتي تجاهه وهو ماشال عينه عني .
ومثل عادته ماخلاني اتعداه باكثر من خطوة ووكفني بسؤال ..
اليوم عندج امتحان ؟
التفتت ورجعت خطوة ليورة ..
ليش تسال؟
حاجاني بنتر ..
جاوبي ..
ميانته ومن يتامر عليه خوفني حسيته يعرف شي حسيته عرف منو اني مادري ليش هيج احساسي نبهني ..
رديت بخوف ..
لاماعندي .
امشي وياي لعد .
فتحت عيوني ع وسعهن ..
شنو امشي وياي ..وين ؟؟؟
امشي وبعدين تعرفين .
ما امشي روح .
ماروح اذا انتي مو وياي.
روح منا محمد ..لتسويلي مشكله ..ييزي عاد كافي .
اذا متريدين مشاكل امشي وياي بدون ولا كلمه .
مثل الي استسلمت لان صوت محمد بدة يعله واني ماريد فضيحه ومشكله ثانيه بالكليه بس ردت احاول اخوفه كمحاوله اخيرة علمود يتركني ويتراجع ..
محمد الله يخليك روح لايجي اخويه ويشوفك ويسويهه عزة عليك.
جاوبني بثقه ..
حته بهاي تجذبين ..كولش زين تدرين اليوم اخوج ممداوم .
منو كلك شتقصد؟
مو صحيح ست لمار ؟لو اكول ست رفل !؟؟
اني هنا لو يذبحوني قطرة دم بجسمي ميلكون .
كمت ارجف مثل سعفه بيوم عاصف.
وجهي كام يطي الوان بين خوف وبين جزع تصلبت وتخشبت رجليه من الخوف احس بعد ماكدر امشي وهو لازم ايدي من رسغهه بقوة ويجر بيه ..
ششلون ععرفت ؟
كلتهه برجفه .
وكف والتفتلي انطاني نظرة بطرف عينه ..
كل همج هسه شلون عرفت ..
زفر هوا واتنهد ورجع يجر بايدي ..
امشي يله بدون كلام زايد.
طلعنه من الجامعه صعدني بسيارته بالصدر اعرف هاي سيارته لان كايلي عنده جكسارة وهم بالقوة وصعد هو وركع الباب ..جان عصبي كولش ايده نار تجوي من جان لازمني ومن هدني وبده يسوق كمت افرك بيهه لان تاذيني حيل .
يسوق سريع وبين كل فترة وفتره يباوعلي بنظرة بيهه معنى ويدير وجهه ينتبه ع السياقه واني جنت حاصرة نفسي ع الباب والجامه وشكد حاولت افتحه مقفوله ..
حاولت اتصل ببسمه شافني مدنكه وعرف بيدي مبايل دا اتصل باحد اخذه مني تلاويت وياه بس بعد اخذه ماكدرتله ..
سكتت شاحجي منتظرة شراح يصير بيه ..منتظرة مصيري ..
سالني ..خايفه ؟
وين رايحين ؟
رجع سالني ..
خايفه ؟
صحت بي لان يحجي ببرود ويستفزني ببروده ..
اي خايفه ..ارتاحيت ..وين موديني ..احجي !
صرخت بي..
هذا مو طريق بيتنه .
منو كال اني راح اوديج لبيتكم .
لعد وين راح توديني ؟
للشقه مالتي ..
فز كلبي بكلامه ..
ليش ؟؟
نحجي ..
وليش ماحجينه بالكليه لو بمكان عام ..؟
ميفيد حسابي وياج طويل .
ياحساب ؟
ماجاوبني بس ركز بالسياقه ..دقايق ووصلنه للشقه مالته .
نزلني من السيارة والشقه جانت بالطابق الثالث ..
صعدني بالمصعد ولازمني من ايدي بقوة خاف اطير منه ..
انفتح باب المصعد وسحبني منه وفتح باب الشقه ..
ادخلي ..
اول مافات للشقه سحب شالي من شعري صح مجان مربوط باحكام بس هم معتبرته حجاب لشعري ..
فزعت من تصرفه ..
هاي شسويت ..رجعلي الشال !!
كدامهم تتحجبين بس كدامي لاااء ماكو حجاب .
محمد بلاخبال جيب شالي .
تسمين هذا خبال ؟؟لسه ماشفتي شي .
محمد شراح تسوي اكثر ؟
لاتخوفني الله يخليك ..
قفل الباب مال الشقه وضم شالي مادري وين ..
كعدي هنا .
لزم ايدي جرني وكعدني ع القنفه وسحب كرسي وكعد كبالي قريب عليه كولش ..زفر الهوا وطلعه بقوة وسالني ..
لييش ؟
جنت كولش خايفه منه شراح يسويلي ..
شنو ليش ؟
لعبتي عليه وع صديقي .
انصدمت بكلامه ..
معقوله انت ..انت ..
اني شنو ؟
تفكر بيه هيج ؟
ليش هو انتي طيتيني مجال افكر بيج غير هيج ؟؟