واختارك ثلج نارك
البارت 11
بقلمي روسكان
لبيج قصص روسكان
مرت ايامنه بسعاده وكل يوم يزيد حبي لمحمد وهو هم هيج احسه من كلامه من دلاله اليه من تلميحاته ..احسه حنين حتى بالكلام وياي ..احس كلماته بلسم لكلبي من مشتاقه من تعبانه من ضايجه ..حلكي ميبطل ضحك من نكول الوو لحد منكول مع السلامه ..
احبه واحس بي يحبني بس ممعترفين بهذا الشي ..مستمتعين بايامنه واتصالاتنه المستمرة وكلامنه والمغازلات وخوفه عليه وغيرته من كل شخص يكولي هلو او يباوعلي..
جنت يوميه اروح لكليه الصيدله اشوفه وهو لسه ع الوعد ابد ماشفته بكليتي ابد ماحسيته يحاول يكسر وعده اليه من ورايه بس دائما من نتخابر يحاول يقنعني انو اخليه يشوفني لان تاكدت من مشاعري تجاهه وبديت اقتنع وارضخ لطلبه برضاتي مو اجبار ردت افتح الحصار واخليه يشوفني جنت بكل مخابرة استدرجه بالكلام اريد اسمع منه كلمه احبچ اريد اتاكد.. تصرفاته تاكدلي حبه بس ليش ميكول ليش بس يغازل ويغار ويخاف عليه ..شنو معناتهه هاي ..الطريق المشيت بي خليته يحبني واني همت بي وبقت بس خطوة وحده واعترفله بس يكولي احبج وينوي ع خطوبه افتحله كلبي ..
مرت ايامي وياه واني حته بنظراتي اله وفيه اروح اسرق نفسي من دراستي ومحاضراتي اروح اشوفه وهو دائما كاعد بنفس المكان ويه صديق يمكن هذا اقرب صديق اله اسمه مصطفى.
مصطفى هذا احفظوا الاسم زين راس البلاوي الي راح تصير هو سببهه ..
كمت اشوف مصطفى يوميه بكليتي يباوعلي نظرات مارتاحلهه ..كلما اصد عليه الكاه يباوعلي ومينزل عينه مني ..
حتى من اقلل روحاتي لكليه الصيدله لان وجود مصطفى ويه محمد يخلي محمد ينتبهلي ويجوز يشك عندي شي وياه ..وحتى من ماروح لكليه محمد ابتعادا عن عيون مصطفى الكاه بوجهي بكليتي وماجنت غلطانه بشكي لان بسمه هم لاحظت هالشي ..عينه مني .
بده يخوفني الموضوع ..مو عن شي عندي عندي اذا جانت نيته يجي يصارحني يجي وينرفض بكل بساطه بس انتباهه عليه يخلي عين محمد عليه ..اني ابد مو بعيني احد غير محمد.
مرت الايام وفد يوم جانت الدنيا مطر ومغيمه وصديقاتي اكثرهن جانن ممداومات فتقريبا ظليت وحدي افتر بعد المحاضرات .
مصطفى ماجاز مني دوم عيونه عليه وبذاك اليوم شافني وحدي وصارتله فرصه يحجي وياي الموقف هزني ..ليش هزني ؟؟ مو اول مرة يجي ولد يصارحني لو يحجي وياي بخصوص موضوع معين بس الي هزني جان محمد واكف بعيد عنه شويه منتظر صديقه يحاجيني .
موبس اني جنت ارجف من هالموقف صوتي هم جان يطلع برجفه من جنت احجي ويه مصطفى.
تصورت انو اني ارجف من البرد بس ابدا ماجنت بردانه بس خفت ..خفت حيييل ..لان شفت نهايه حبي لمحمد ..شفته يتركني ..شي جان نذير شؤم عليه .
اجه مصطفى عرفني ع نفسه اسمه عائلته مرحلته والكليه واعترف بحبه اليه ونيته شريفه والنهايه زواج بالوكت الي يناسبني وبالي ابد مو يمه يم الواكف بعيد ..يم الي كلبي دك له ..
خلص كلامه واني ببساطه رفضته ولسبب روتيني انو اني مافكر بموضوع الزواج كال انتظرج تتخرجين كال ماكو داعي كال اني رايدج بالحلال وراح انتظرج كتله براحتك وعفته ومشيت ..
لو شكد اسولف عن الرجفه الي صارت بجسمي ما اوفي حقهه .
بس واحد يكولي هلو انفجر بجي .
وصدوك رحت للمصلى وطكيت بجي ..خفت .. حيل خفت ..احس الوكت فات عليه جان لازم اعترفله قبل وقت جان لازم اكوله اني منو وهاي مرت اشهر ع علاقتنه شلون بعد يصدك ماعندي شي ويه مصطفى شلون يصدكني بعد وهو شافني بعينه.
تمنين بسمه يمي تحضني تنصحني شاسوي احس روحي ضايعه وماعرف شلون اتصرف .
مرت فترة اسبوعين امتحانات الفاينل ومخبوصه بالدراسه خففت روحاتي ع كليه الصيدله وخففنه مكالمات علمود دراستنه وامتحاناتنه وبعدنه نفس حبنه .
قبل الامتحانات بيومين هم اجاني مصطفى وحاجاني ع نفس الموضوع بس هالمرة جان متغير شكله تعبان وضعفان الولد مبين متوتر ويدخن هواي وهو يحجي وياي وهالمرة راد مهله شكد ينتظرني ..راد مني امل ..وجان ردي نفسه الرفض وماتبدل بس هالمرة رفضي قاطع قطعت امله لاينتظرني اتخرج ولاهاويته ..
اعرف ردي جان قاسي وياه بس لازم يوكف عد حدة لان جياته ومراقبته اليه زادت عن حدهه وكامت تجيب لسمعتي الحجايه المو حلوة.
ماهتميت كولش للموضوع لان محمد مجان موجود وياه مثل ذيج المرة وهمين جنت ناويه بس اخلص امتحاناتي اخر يوم اروح اعترف لمحمد بكولشي وارتاح ..
الي صار...
باجر تعرفون الي صار ..
اعرف البارت قصير بس صبركم عليه اتفقنه ماكو بارت اليوم واني لعيونكم نزلت .
شاركوني توقعاتكم شراح يصير بلكي يفك دماغي من افكاركم واكمللكم القصه .
أنت تقرأ
واختارك ثلج نارك
Roman d'amourلمار بنيه تنعجب بشاب وياهه بالجامعه وتتعرف عليه ع الفيس بدون ميعرفهه وشاءت الصدفه انو صديقه للشاب يحبهه تتعقد القصه وتتشابك الاحداث ويفترق الحبيبين ويستمر الغموض لان الشاب لسه ميعرف شكلهه . سوء الحظ وسوء الظروف كوله راح يلعب دور بفراقهم هل يرجعون ين...
