#الوجه_الأخر
همس القوارير
البارت الثاني
هيج حياتنا بقت حلوه وهادئه وكبرنا وصرنا مراهقات الفرق بيني وبين ميسم ٣ سنوات حرصت امي ان تكون صداقه بينا اني واختي ودائما نسولف ونضحك مع بعض وصرنا متوسطه واحنا بالتزامنا جانوا كل صديقاتنا بالمدرسه كل وحده عدها حبيب اله اني وكم طالبه متكترين على صفحه معلينا بيهم نشوفهن يسولفن ويضحكن ويتهامسن بيناتهن بس احنا ولا بالنا يمهن ونحجي عليهن نگول هذن شنو ما عدهن اهل شنو ممتربيات بس من كبرت وفهمت التربيه مالها غرض بهالشي وانما رفاق السوء هم الي يجرفون الواحد والله نشوف بنات اهلهم قمة الاخلاق واول مدخلت المدرسه كولش حبابه وخلوقه بس رافقت بنات السوء نگلبت احوالها وصارت انسانه ثانيه وقشمرتها صاحبتها بان هذا يحبج ويريدج وتخليها تسولف وتضحك ويه الشباب وتنجرف لغير طريق مع الاسف والاهل ميدرون لان عبالهم بنتهم تروح وترجع للمدرسه وكولشي طبيعي جنا اني واختي نتجنب هيج نماذج من البنات وما نختلط بيهم كل همنا دراستنا وامنا وابونا وجانت امي ليل ونهار تنصحنا وتنطينا مواعظ وقصص على سوالف البنات وجانت تگول
ماما
حبايبي تعالو گعدوا يمي خلي احجي وياكم انتم كبرتوا وصرتوا صبايا حلوات وتخبلون
واني وميسم وحده تباع للخ ونضحك
امي
لازم تكونون حذرات ماما ترى الشباب يضحكون عالبنات ويحبون البنيه الخفيفه مو للزواج لا للتسليه ويكضون وياها وقت انتم كلما حافضتي على نفسج راح تجيج قسمه ترتاحين بيها واذا صرتي مو خوش بنيه راح يجيلج واحد مثلج مو خوش انسان وسوالفه كولها ويه البنات لو يشرب وميصلي وراح تعانين من هالشي
ريم
لا ماما اصلا احنا مبتعدين عن سوالف البنات وما نختلط بيهم
ماما
عفيه بناتي كونوا قويات وحريصات على نفسكم وان يكن وانتم غلطتوا بحياتكم لا سمح الله لازم تجون تگولولي حتى نگدر نحل المشكله اني وياكم قبل ما تكبر وتصير خارج قدرتنا ونطاقنا
ميسم
لا تخافين ماما بناتج قويات وما يهتمن هالسوالف لان يحبونج انتي وبابا ومراح نغلط لعيونكم
ماما
فديتكم والله ربي يخليكم ألي
من كلام ماما وكثرة ملاحضاتها ومراقبتها ألنا من بعيد لبعيد جنت احس انو تربية البنات حيل صعبه اصعب من تربية الولد بالاخص بوكتنا هذا عصر التكنلوجيا جانت الامور تزداد تعقيد كبرنا واحنا نستخدم النت اما للدراسه لو مراسلة صديقاتنا او نقره قصص بوقت الفراغ فقط وكل شويه حضر تفتيش من الوالده جنا عادي بالنسبه ألنا تعودنا عليها مرات اضوج
ريم
ماما شنو انتي ما تثقين بينا
ماما
لا ماما بالعكس ليش تگولين هيج
ريم
اشوفج دائما تراقبينا وكانما ماكو ثقه
ماما
بالعكس كولش اثق واعرف شنو مخلفه اني وشنو ربيت بس ماما مجتمعنا يخوف واولاد الحرام هوايه اني ما اثق بالناس مو بيكم لان الوكت اختلف واخاف عليكم
هيج جان ردها فديتها وصلت سادس واني عمري محاجيه ويه ولد بس اخواني واقاربي وامتحنت وتخرجت الحمدلله وداومت كليه طبعا بعد الحاح من بابا لان يخاف علينا فدخلت الحمدلله هندسه وجنت فخوره بهالشي هنا دخلنا عالم غير حياة غير الي جنت عايشتها بالمدرسه هنا تغيرت وتغير الي بداخلي احس كبرت وكتها ولازم اتحرر من ضغوط امي هنا الحياة اخلتفت حيل بالنسبه ألي اللبس هناك غير والمكياج والحريه وكانما عايشين بغير عالم ومو دولتنا يعني يعني عادي البنات يسولفن ويه الولد وعادي يشاقون ويضحكون وعادي وحده تحبلها واحد من الكليه وتمشي وتضحك وتاكل وياه وعادي مكياج وحفافه وعلى اربعه وعشرين حبايه عبالك عروس هنا غير لازم اهتم بنفسي لازم اهتم بلبسي وبشكلي حاولت اكثر من مره احجي ويه ماما
ريم
ماما اريد احف وجهي وحواجبي حالي حال البنات
امي
بدينا ريم بسوالفج من هالسوالف ابوج رافض الكليه اگعدي وسكتي لا يبطلج
جنت من اكعد ويه صديقاتي هن كوله خفافه ومكياج واني احس محلوه بالرغم شكلي حلو بيضه وعيوني مدوره وشفايفي مليانه وخشمي حلو وعندي شامه قريبه على شفتي ضايفتلي جمال وعندي غمازه بس مجنت مقتنعه بنفسي لان كولها مكياج واني لا ومرات اشوف البنات يحجن عليه اجتي المعقده وشايفه روحها ولبسي كوله عبايه اسلاميه ( كاب ) ومن يتعدن من يمي هاا وين رايحه للقرايه كولش انغث من كلامهم مرات اروح واشكي لأمي من سوالف البنات اگول عسى تغير رايها وتخليني احف لو اتمكيج
همس القوارير
