#الوجه_الأخر
همس القوارير
البارت السابع
جنا كولش فرحانين بموافقة امي وابوي على خطبتنا وكلش اتحمسنا وفعلا حددنا يوم الخطبه ورحت أجرت بدلة حفله وحجزت صالون وجنت لأول مره احف وجهي واخلي مكياج طلعت مثل الاميره جمال ونزاكه وكعدت بصالة اهلي والكل منبهره بجمالي اجتي خالتي
خالتي
ولج عوبه ريمه وين جنتي ضامه هالجمال والبياض صايره كيكه
ريم
ههههه عيونج الحلوه خالاتي
واجوي كل صديقاتي وصارت حفله كولش حلوه واجه عبدالله ولبسني حلقه وخاتم وسوار وگلاده واحد يحجيها لله جانوا حيل كريمين يصرفون بلا وجع گلب وشنو اطلب منهم يقبلون بدون نقاش او تردد ارتاحيت من هالسالفه وعرفت نفسهم حلوه كولش تونست ليلتها وبقى عبدالله يمنا تعشى ويانا وضلينا نسولف بحضور اهلي وبعدين راح وهمين خابرني وضلينا نسولف للصبح من كثر ما فرحانين ونمنا الصبح وگعدت تقريبا الساعه ١٢ الضهر
ريم
صباح الخير
ميسم
قصدج مساءالخير يا عروستنا
أمي
تعالي ماما تتريکين لو تنتضرين الغدى فدمره
ريم
لا أمي انتضر الغدى اگولج ماما عبدالله يگول يصير اروح لبيتهم فد يوم اتعرف عليهم وعلى بيتهم وعائلتهم
امي
اي ماما عادي شوفي يا يوم وروحي بس كوني حذره تفهميني مو
ريم
بلي افهمج يالغاليه
وفعلا مر تقريبا اربع ايام على خطبتي واحنا ليليه نتخابر
فد يوم بليل
عبدالله
ريمه گليبي انتي باجر اهلي عازمينج عالغدى مسوين غدى تعارف شنو رايج
ريم
اكيد اجي حبيبي من عيوني
عبدالله
اوكي يروحي بالعشره ونص اجي عليج تمام
ريم
اي حبي اوكي انتضرك ابلغ اهلي واجي وياك
فعلا بلغت امي وحجيت وياها ويوم ثاني بدلت لبست بدي ربع ردن وبنطرون واكسسوارات وسويت شعري ولبست كابي وحجابي وتعطرت وانتضرته صدوك بالعشره ونص اجه عليه بسيارة نسيبه اني همين گعدت يمه بالصدر وهو جان فرحان بيه بس يباوع عليه وصلنا لبيتهم بيتهم كبير وحلو اول مدخلت اتلگتني ام عبدالله بالاحضان لابسه دشداشه ربع ردن وقصيره وبنتها المتزوجه لابسه برموده والبيت كبير وحلو واثاثهم راقي ومرتب ونضيف گعدت بالصاله اجه نسيبهم امجد ساكن وياهم سلم عليه وراد يصافحني بس اني مقبلت گوتله اعذرني حرام ضل يباوع على عمته ويضحك اني استغربت وعفت الموضوع گمت داجيب وياهم مواعين الغدى لگيت مره تشتغل عدهم بالمطبخ ووياها بنيه شابه تساعدها من سئلت عليها گالو هذه تشتغل عدنا هي وبتها بس اشو ميانه حيل ويه بتها وما ملتزمه لا حجاب ولا شي من گعدنا نتغدى
ام عبدالله
اگولج يوم دنزعي كابج ما عدنا احد غريب امجد ابنا منين انتي لابسه حجاب
ريم
لا ماما خليني براحتي هيج مرتاحه
ام عبدالله
بس يوم انتي راح تعيشين ويانا يعني وامجد همين موجود بالبيت تبقين بحجابج
ريم
اي ماما متعوده اني
ام عبدالله تباع على عبدالله
اوكي براحتج ماما
كملنا غدى وغسلنا گعدت على القنفه وصحت اخته لعبدالله الصغيره فروحه وگتلها اريد سجاده وتربه اصلي اشو هاي راحت لا ساعه ولا ساعتين تدور وكل شوي تجي لأمها وتسألها وتدور وماكو وگوه لگولي سجاده وتربه ورى نص ساعه گعدت عالسجاده هاي شنو معقوله ميصلون واني سئلت عبدالله وگال نصلي اني واهلي معقوله يكذب والله ما ادري يمكن اني متوهمه المهم بقينا يمهم وبعدين صعدت ويه عبدالله اشوف غرفتي كانت كبيره وواسعه وبيها حمام وبلكونه كولش عجبتني ومرتبه اجه عبدالله حضني وباسني
عبدالله
هذه عشنا الزوجيه شوكت تورينها وتنورين حياتي
ريم
مبقى شي يا روحي
عبدالله
مرتاحه حبيبتي
ريم
اي گلبي مرتاحه
عبدالله
شنو رايج الشهر الجاي زواجنا ريم اني احبج وبعد ما اتحمل
ريم
ليش نستعجل يا عيني بعدني ممكمله شغلي
عبدالله
وداعتي عليج تلحگين خلينا نستعجل
ريم
براحتك حبيبي
ضل يبوسني ويحضن بيه وبعدها ساعتين تقريبا سوالف وشقى هيج ونزلنا بقيت يمهم للعصر ورجعت للبيت طبعا مسولفت لامي على الي صار بالتفصيل خفت تاخذ موقف عليهم ومگتلها هم ميصلون بالعكس گوتلها يصلون وناس مرتاحه واسلوبهم حلو هم صحيح هيج جانوا بس بالنسبه لأمي عدها الصلاة والعباده اهم شي بالدنيا
همس القوارير
