#الوجه_الأخر
همس القوارير
البارت الثالث
ريم
ماما والله يصنفن ويحجن عليه هاي تگولي شنو رايحه للقرايه وهاي تگولي معقده والله مليت
ماما
بنتي انتي رايحه تدرسين لو تعرضين نفسج للشباب وصديقاتج الي تگولج هذا الكلام كولهم فاشلات هذن جايات للونسه مو للدراسه
ريم
ماما كولها هيج الكليه والله اربعه وعشرين حبايه اخذيها وزفيها
ماما
ماما احنا معلينا من الناس الي تقبل تصادقج مثل ما انتي اهلا وسهلا بيها والي معاجبها طبها مرض وهي الخسرانه هذه الي متريدج تريد وحده منحله مثلها
ريم
اوووف يعني ماكو فايده
ماما
هذا الي عندي وبعد سديه للموضوع لان ما اقبل نقاش بيه
وفعلا بقى الحال مثل ما هو وبقيت مثل ما اني جنت اگدر اخلي مكياج والبس بكيفي ومن ارجع للبيت اغير وامسح بس محبيت اخون ثقتهم بيه وبعدين گلت خلاص كلام ماما منطقي وصحيح اني رايحه ادرس واكون نفسي شعليه من البنات ولبسهم جنت ارجع الضهر من الكليه اوصل بالثنتين للبيت وجنت ارجع ميته تعب يا دوب اغير واتغدى وانام شوي وبعدين اگعد اساعدهم بشغل البيت وادرس هذه حياتي هادئه وحلوه فد يوم من الايام اني اداوم بالكليه اجتي صديقتي المقربه تهاني
تهاني
لج ريم باعي ذاك الولد صارله يومين مراقبنا يمكن معجب بيج
ريم
وينه لالا معوده عوفينا من هالسوالف
تهاني
شبيج باعيله والله معجب بيج
ريم
شسويله معوده خليني اكمل دراستي والله لو وصل خبر لأبويه واخواني يگعدوني بالبيت
تهاني
ومنو راح يگلهم مثلا اني لو انتي
ريم
الدنيا صغيره والخبر بسرعه ينتشر واني ما اريد اخون ثقة اهلي خلينا هيج احسن
المهم سدينا الموضوع ومحجينا بيه بس كول ما ارفع عيني اشوفه يباوعلي من غير مينزل عينه هو اسمر وعيونه سوده ووساع وشكله مرتب وحلو صدك عجبني بس اخاف وگلت اهتم بدراستي احسن بقينا يوميه احنا نگعد بالكفتريا كراسينا معروفه مرات نلگه طالبات گاعدات بمكانا ومرات لا والله احنا نگعد بيه اشوفه دائما يراقبنا ويگعد نفس المكان هو واصدقائه مرات اثنين ومرات واحد ومرات شله يسولفون ويضحكون بس عنده صديقه دائما اشوفه وياه مره كنا گاعدين واسمع صديقه يناديه عبد الله عرفت اسمه عبدالله فعده شهر كامل واشوفه يراقبني مره دامشي واشوف شخص يصيح وراي
ريم ريم التفت عليه وشفته عبدالله
ريم
نعم اخي شرايد خير ان شاءالله
عبدالله
اني اسمي عبدالله زميلج مرحله ثالثه واحب اتعرف عليج
ريم
اعذرني اني مو من الي ابالك وعيب لا احد يشوفنا شيگول علينا
عبدالله
شيگول علينا خلي يگول متشوفين كل واحد هو وحبيبه
ريم
اخويه اني ما احب هالسوالف وجايه هنا ادرس مو حب وغرام
وعفته داروح
عبدالله
بس لحضه اخذي رقمي اخاف تحتاجين شي
سحب موبايلي من ايدي ورن لنفسه وخزن رقمي اني سحبته لموبايلي ومسحت رقمه گتله عيب عليك هالسوالف انت ما عندك خوات عفته ومشيت صرت كولي ارجف اول مره بحياتي انحط بهيج موقف محرج ضليت اتلفت يمنه يسرى اخاف احد شافني جنت كولش جبانه وخوافه بهيج مواقف وما احب اتورط بيها هسه اني منين اجتني هالسالفه رجعت للبيت تغديت وكملت دخلت اريد انام مگدرت ضليت اتگلب بفراشي مرات من اتذكر الموقف اضحك وابتسم ومرات اضوج معقوله عجبتني السالفه معقوله يحبني من صودگ وليش ميحبني اني شنو ناقصني لو شنو افرق عن البنات اوووف شلون سالفه هذه تعبت من التفكير محسيت على نفسي اله اني گاعده وقت المغرب
ريم
السلام عليكم ليش خليتوني نايمه هيج وقت
امي
شفناج تعبانه محبينا نزعجج گلنا خليها ترتاح
ريم
شنو عدكم اكل ميته جوع
امي
اكو عندج عالكاونتر فطاير وكيك واذا معجبج فواكه بالثلاجه
ريم
لا راح اكل فطاير واسويلي جاي
هاا اشو البيت هدوء ماكو بنتج ام لسان
امي
راحت لبيت خالتج ويه سلوى تدرس
گعدت متكسره واحس تعبانه من التفكير يمكن بس ولا راحت السالفه من بالي انام اتذكره ادرس اتذكره اكل اتذكره اوووف شلون اشيله من بالي ضليت احاول اتناسى الموقف بالرغم من هو عجبني ضليت اداوم طبيعي رحت للدوام يوم ثاني
همس القوارير
