السلام عليكم ؟😊
احم احم نبي ندوي على عادتنا و تقاليدنا الجميله🙃
حني الليبين عندنا عادات تخليك تدير هكي 😕
(المرض)😷
اي مرض في العالم ليه علاجين بس يلي هما
الليم القارص و زيت الزيتون
هدا دوا كل شي زكمه كحه حرار راسك ودنك ايدك عينك كل شي كل شي ليه علاجين بس
1اشرب ليم 2ادهن روحك بزيت،ارقد ،نوض و معاش فيك حتى حاجه و هادي ليبيا و هدا دواها و الوضع هدا عند الليبين كلهم بشكل عام و عند العزايز بشكل خاص
ريلكس يا حمبي😕
~~~~
(الشبشب)👡
في ليبيا الشبشب يستعملو فيه لكل شي الا انه يكون شبشب
و حي عليك كان خطمت من جنب شبشب مقلوب و ماساويتاش يفتحولك عليه محضر و مالا كان في بجنبك عزوز تديرهولك عيب و حرام غلط و مش كويس لسمعه للعيله و كل شي يخطر في بالك
ولما نقوللها علاش ؟؟
تقلك👵: هكي يقولو. 😩
ريلكس يا حمبي 😕
~~~~
(الكنادر)👞
و حاجه تانيه ع الاحديه بصفه عامه
لما الكندره تركب فوق بعضها
حي و حي مسافر انا خلاص و يمشي يوتي شنطه و فلوسه و مع من بيسافر و هوا اصلا مش عارف لا امتى ولا وين ولا كيف ولا حتى هل هوا حق بيسافر ولا لا
و خاصه عاد لو جاته سفره بعد 5 ، 6 ، 7 ، 8 ، 9 سنين
حييي مش قتلك انا زمان لما كندرتي ركبت فوق بعضها اني بنسافر😎
ريلكس يا حمبي 😕
~~~~
(العراس)💥
و في العراس هادي كلنا نديرو فيها 😅
الاخ او الاخت العزيز/ه يلي شاد/ه السفره
و انا دايره روحي ما نندريش عليها ولا على بالي الا انا في الحقيقه لو تسألني عالسفره نقلك شن فيها بالتفصيل
20 طرف عبمبر و 30 طرف بكلاوه 25 طاسه رزاطه
بالتفصيييل لين تجيني تقولي تفضلي
و ندير روحي تفاجأت و اوميكاد و شن فيه
ما تقولوليش ما تديروش فيها كلنا نديرو فيها
ريلكس يا حمبي😕
~~~
(امنيه)💬
و موضوع انك تقعد مقعمز في امان ربي و سارح بأفكارك في عالمك الخيالي الخاص يجيك واحد يقلك
تمنى امنيه☻
انت تسحاب انه لقي كنز ولا مصباح علاء الدين و بيحققلك امنيتك و تقعد تفكر و تتمنى
بعدين يقلك اما عين؟؟
شني اما عين؟؟
الرمشه في اما عين؟؟
ريلكس يا حمبي 😕
~~~~
