صديقتي & حبيبي

المقدمة

تنويه هام : القصة لا تراعي المنطقية في اختيار الاسماء يعني هتلاقو سونجمين ابن شاكر وسعاد ام دونجهي :D

المقدمة

في يوم من الايام في مكان في الدنيا مش لازم تعرفوه , اسرة سعيدة مكونة من ام واب وولدين زي القمر ( سونجمين و دونجهي ) اتربوا في بيت هادي نسبيا واحوال مستقرة أينعم وجود شابين اخوات في اعمار متقاربة ده مصيبة في حد ذاتها انما أحسن من غيرهم , واهي مستورة < دول الكلمتين اللي كانت الام بتقولهم دايما , لحد ما جيه اليوم ده , يووووم هيقلب الامور ويغير الاحوال يووووم هيـ - طب ما تيجو ناخد لمحة سريعة عن الاسرة المذكورة الاول .....

الاب # ميكانيكي - ايوة ميكانيكي الشغل مش عيب وعم شاكر ده ايديه تتلف ف حرير ده اللي قاله كل زباينه , تعب وطلع لوحده ومن غير ذرة مساعدة من حد , من الواد بلية لحد الاسطى شاكر اكبر ميكانيكي فيكي يا بلد , ربا عياله وصرف عليهم دم قلبه , كان عنده عشم يكبرو ويشيلو عنه , لكن ان جيتو للحق هم كبرو اه بس بدل ما يشيلو عنه شيلوه كمان وكمان , ومفيش نطع فيهم رضي يقف مع ابوه في الورشة ويتعلم منه الصنعة .

نيجي للأم # ترزية - ابلة سلوى تاخد حتة القماش وتخرجها من المكنة فستان ولا اجدعها بوتيك - شغلانة كويسة لواحدة ست متقدرش تعيش عاطلة وف نفس الوقت معاها قردين مش مخليينها تقدر تنزل تدور على شغل , حبايبها كتير وزباين بتجيب زباين او الحقيقة حاجات تانية اللي بتجيب زباين ~

سونجمين و دونجهي # سونجمين الاخ الاكبر مش اكبر اوي يعني هم سنتين وياريته فلح وكان قدوة لاخوه عاد الثانوية مرتين لحد ما اتساوى مع اخوه في االمرحلة الدراسية ودخلو الجامعة سوا , وشكلهم مش ناويين يخرجو منها , سونجمين سقط سنتين وفي المقابل دونجهي سقط سنتين مش عشان فاشل زيه انما شكل عيشة الجامعة عجباه ومش عايز يسيبها , خلاصة العبارة هم دلوقتي ف تالتة جامعة , وسونجمين اكبر من زمايله ببتاع اربع سنين - فاشل فاشل يعني مش اي كلام , بس نيجي للاخلاق ...

سونجمين بيمثل الملاك وعكسه دونجهي اللي لولا المنطقية كنت قولت انه فعلا عنده قرنين حمر , من ناحية البنات سونجمين كله لباقة وحسن تعامل مع البنات بالأمارة اما بيخرج من اوضته يلاقي زباين بنات تبع مامته بيقول بكل تلقائية وبساطة : يــع , اما دونجهي فالعكس برضو يعتبر من مصادر دخل والدته عشان 99,9 % من الزباين البنات هو مظبط معاهم وبييجو يفصلو هدوم عشان يشوفوه بس , حلاوتك يا ابلة سلوى ~

خلصنا اللمحة السريعة عن اسرتنا الكريمة , نكمل اللي كنا بنقوله ~ يووووم هيقلب الامور ويغير الاحوال يووووم هيكشف المستخبي ويخبي المنكشف

يوم التلات الساعة 4 ونص العصر

التليفون رن الاب رد سمع اللي سمعه بانت على وشه تعبير الفزعة , جري قال للأم شهقت رئعت على صدرها وبكده نبتدي نحس ان الاخبار اللي وصلتهمnot nice at all

** اللي حصل ان المكالمة دي كانت من خال الاسطى شاكر اللي كان بيتصل بيه يحذره ان عيلة الرشيدي احد عائلات الارياف اللي جاي منها الاسطى شاكر فجأة ظهر فيهم فرد جديد وحرضهم على اخد تار ابنهم اللي مات من عشرييييين سنة , طب ايه علاقة الاسطى شاكر بالحوار ده , الابن اللي مات ده - مات على ايد ابن اخو الاسطى شاكر الكبير - كانت خناقة على بنت وكان ابو الواد مدلعه وجايبله طبنجة يتباهى بيها ويوم ما طلعها من جيبة عمل بيها جناية وقتل واحد - اخده ابوه ( الاخ الاكبر للاسطى شاكر ) وسافرو بلاد برة ومن ساعتها محدش عرفلهم طريق ونام موضوع التار ,

ودلوقتي جيه اللي يصحيه - واللي حرض على موضوع الاخد بتار فاهم ان الاب وابنه هربوا هو المرادي قاصد الاخ التاني وابنه - زي مابنهم قتل ابننا الكبير هنقتل ابنهم الكبير او ما ينوب عنه , واكبر شباب العيلة بعد الواد الهربان سونجمين .

زغرطي يا ابلة سلوى !

ومن هنا هتبتدي قصتنا