الجزء الثامن
عينه صارت بعيني انه خفت بس هو تفاجئ ونظرته بيه حقد وغضب لان ما تصلت بيه
دخلت راسا للصالون وكلت لزوجته ينظروج زوجج بالباب
انه تخربطت ما اعرف شسوي من الخوف انتبهت علي ام ضحى وسالتني كالت شبيه زينب مو ع بعضج
لا ماكو شي وكملت شغلي عادي
الليل كله اتكلب وخايفه شراح يصير وجنت متردده احجي لامي لو لا
بس خفت وكلت احلها من يمي ما راح احجي لامي والليل كله اندعي ربي يحلها
الحب الي جان بقلبي اله تحول الى خوف .. خوف ع نفسي وسمعتي وسمعت اهلي وحجي الناس ما راح يكولون هو الغصبها لاحكها لا راح يكولون هي مطلقه ورادت رجل ثاني وخربت بيته
وسؤال يدور براسي شنو يريد مني معقوله يريد يكضي وكت وياي وياخذ حاجته ويعوفني ..
جنت هواي اسمع قصص بالصالون عن ضباط واعضاء بحزب العث ونزواتهمً ويه البنات وجنا نسمع عن عدي ابن صدام شلون جان يوكف باب جامعات بغداد ويختار احله طالبه يكضي وياها رغبته ودزها لاهلها وهواي قصص هواي
كمت باليل من الخوف والتفكير صليت لركعتين لوجه الله واندعيت يطلعني من هاي الشده
ثاني يوم رحت للصالون دك التلفون وشالته ام ضحى مرات الزباين يحجزون عن طريق الاتصال
شويه وصاحتلي ام ضحى .. زينب رجال يردج ع التلفون
انه الف حسبه بالي بهذيج اللحظه منو ياربي يردني كلت اكيد واحد من اخواني
المهم رديت ... الوو
بصوت عالي وبعصبيه ... ولج ليش ما اتصلتي ليش تحكرينب ولج انتي تعرفين انه منو لو تردين انه اعرفج بطريقتي انه منو اصبريلي جم يوم وانه اعرفج انه منو هسه ما فارغلج وراي سفر اسافر جم يوم ومن ارجع انه اعلمج وديري بالج ترحين لام سيف ( زوجته) وتكليلها اعدمج انتي واهلج..
انه انبلع لساني وظليت ارجف ما اعرف شرد
هو راسا سد التلفون بوجهي
ام ضحى .. شبيج زينب وجهج صار اصفر
كعدت بالكاع لان رجليني خدرن من الخوف وكلتلها مشكله بالبيت ولازم ارجع
رجعت للبيت وانه خايفه واتلفت ياربي دخيلك
مابيها مجال لازم اكول لامي
وصلت لامي جانو اخواني بالدوام بعدهم وتلكتني امي
ها يمه راجعه من وكت وشبيه وجههج مخطوف
سولفت لامي القصه كلها وانه بس ابجي دموعي ما وكفت
ظلت ادك ع راسها يبووي وين اودي وجهي ربي اخذ امانتك وخلصني من هالضيم من مصيبه للمصيبه فوك راس انه كتلج اثبري بالبيت وانجبي لا شلون اله تطلعين تغيرين جو وانتي حمره صفره احسلج هيج ام المصايب بس المصايب جايبتها الي شسوي ربي شسوي دخيلك ربي
زوجتج وما ظليتي وياه ولج شفنه الظيم ويه العيال وسكتنا وتحملنا بس لا شلون تتحملين وميت الف عيب طلعتي بيهم جان راحو اخوانج بالرجلين من وراج زنيبه
انوب اطلكتي وجبتيلي مصيبه اكبر
منو النه ما اتكلياي منو خوالج وماكو وعم واحد و عايش بليبيا هو مرته وعمتج هي مره شتصير ورجل خالتج ابتله بينا خوما ابتله وهو رجال غريب وعيونها مورمه من البجي
ضغطها ارتفع خطيه وظليت ابوس بها واحلفلها والله ما عندي شي وياه
نومتها بغرفتها وجبتلها دوى الضغط وكلتلها يمه ما اريد مصطفى ومرتضى يدرون بلي صار انتي نامي وانه هسه اكمل الغده
كلتلي بعد ما تطلين من الباب افتهمتي رجليج اكسرها والله
كتلها صار يمه
تركت الشغل وكلت لام ضحى مشكله صارت وخواني ماخلوني اطلع من البيت وكلتلي انه اجي وواتوسل بخوانج يرجعوج وياي تعودت عليج والزباين هم تعودو عليج كلتلها لا تحاولين ولا تجين الله يخليج كفيني من الشر
مر اسبوع وماكو شي هدوء بس امي انطت خبر لخالتي وزوجها وكلوها خلي تكعد بالبيت واذا صار شي احنه نحاول ونحجي وياه
اذكرت هو كال انه راح اسافر لذلك ماكو
بس التفكير ذابحني ذبح وامي كل شوي طن رزاله ترزني جان حجيها ثقيل وياي هي جانت توترني اكثر بحجيها
بعد الاسبوع الي مر بيومين اجت لبيتنا ام سيف ( زوجت رائد)
انه وامي وحده تباوع للثانيه
