الجزء السابع عشر
بهذا اليوم سقطت كل محافظات العراق بيد الاحتلال بالبدايه كان يسموه يوم النصر ويوم تحرير العراق من نضام صدام
اكثر الشعب العراقي جانو فرحانين وبالاخص محافضات الجنوب لان همه اكثر المحافضات الي انظلمت بعهد صدام وبالاخص ايام الحصار
اول ما دخل جيش الاحتلال بالدبابات ووالارتال الناس طلعت بالشوارع تصفك الهم وفرحانين
قبل جنا نصفك لصدام ونكول نعم نعم للقائد وكلا كلا امريكا
هسه كمنا نكول نعم نعم امريكا كلا كلا ياصدام
سبحان الله من حال الى حال
بدت الناس تهجم ع موؤسسات الدوله وتنهب البنوك والدوائر والموسسات والمدارس والكليات صارت خراب بيد الشعب جانت امريكا تتفرج عليهم وتصورالناس وهمه ينهبون وفرحاين ويصحون كوود امريكا كوود وتنشرها ع محطات التلفزيون
العراق صار فوضى ودمار انطبق علينا المثل الضغط يولد الانفجار
طلعو السجناء الي عليهم تهم قتل ومخدرات وسرقه وغيرها من التهم
عم الدمار بالعراق كله
بعدها بدت مرحله السرقه والخطف والقتل
السلاح انتشر صار كل بيت عنده سلاح فكثرت العصابات والمجرمين
وبدت تطلع الاحزاب ورجعو العراقين الي جانو مهجرين الى العراق وبالاخص الي جانو بايران واجو كانما هم من حرر العراق
اجو خوالي مجيد وحميد وابن خالي المرحوم اسمه مهدي امي وخالتي جانو فرحانين خطيه اتلكوهم بالهلاهل والذبايح وجان مقرهم بيتنا
انه بذيج الفتره اشوف اهلي فرحانين وانه بعالم ثاني مااعرف اي خبر عن رائد ولا اهله اعرف رقمهم حته اتصل عليهم كلما اذكره دموعي تنزل بدون وعي لا اعرف هو الميت ولا هو العايش
بدو خوالي يحجون ع الي صار بيهم من شردو لايران شلون ظلو بالحدود الايرانيه العراقيه بالمخيمات لاماي ولا كهرباء والحر والبرد والجوع وبعدين يله خلوهم يدخلون لايران كعدو بالاهواز واشتغلو وازوجو وكونو عوائل وبت خالي ازوجت هناك ومهدي هم مزوج وعنده طفل بس ما جابو زوجاتهم كالو بعدين نجيبهم خلي نرتب امورنا اول
امي وخالتي سولفولهم عن الي صار بينا شلون الامن رادو ياخذون البيت لوما ابو وسام وشلون ازوجت وعيالي هددونا بيهم اذا ماتنازلنا عن الطفل بس ما حجو عن رائد شي بس كلولهم هو نقيب ومانعرف عنه عايش لو ميت
وشلون مصطفى راد يدخل كلية ضباط وما قبلوه بسبب خواله
خالي حميد كلي ابنج اجيبه واطلعه من عيونهم بس صبريلي جم يوم
جانو بالبدايه ملتهين بتشكيل مقرات حزبيه الهم وتوزيع المناصب خوالي جانو من الكبار بحزب الدعوى وراها بجم يوم جابو حسوني جان عمره بوكتها خمس سنوات
اول ما شبكته وشميته شعور جان صعب اوصفه جان ظايع مني ولكيته ااووف يااللهي ما قصرت يارب الك الحمد يارب اللهي بس بقى رائد ترجعه الي وما اريد شي بعد من الدنيا
جان مايريدني وبس يبجي ويكول رجعوني لبيبي ويكلي انتي مو امي ما احبج اكرهج
حقه لان كبر وهو محروم مني كبر وهو ماشبعان من حضني وحناني اكيد همه جانو يكرهوه بيه اكيد
التهيت وياه وحاولت بكل الطرق اكسبه لحد ما بدى شوي شوي يتعود علي وحجالي عن كل كلمه جانو يحجوها اله عني
يكلوله امك تكرهك وماتحبك عافتك وانته بالكماط وهواي حجي ما اكول غير حسبي الله ونعم الوكيل
بس خوالي ما قصرو سوو الواجب
خوالي قررو يفلشون البيت ويبنون مشتملات اللهم لان جان البيت جبير والمنطقه حلوى وهادئه علما يجبون عوائلهم . بس مهدي ما قبل يجيب مرته كال تظل هناك وهو بين فتره وفتره يروحلها
والسبب بده ينعجب بيه جنت احس بنظراته واهتمامه الي مو طبيعي ظليت اتجنب اكعد بمكان هو موجود بيه لان ما اريده يتامل اكثر وانه بعدني ع ذمة رجال
بعدما بدت الاحزاب تشكل هنا بدت مرحلة التصفيات قامو يداهمون بيوت البعثيين وقتلوهم البعض انقتل والبعض كدر يشرد
رجل خالتي انشمل بالتصفيه دخلو عليهم احزاب وخذو ولما خوالي جان انقتل بعدها قرر يطلع خارج العراق لان الوضع صار تعبان كلش سافر لسوريا وبعدها دز ع عائله بنات خالتي اثنين كبار مزوجات ظلو ووسام واختي ماقبلو يسافرون لان جانو موضفين وخافو ع وضيفتهم بقت بس دينا واحمد ولد خالتي همه اصغر شي
امي ماخلت دينا تسافر خطبتها لمصطفى لان مصطفى جان رايدها وهي همين تريده قصة حبهم بدت من اجو عدنا بايام الحرب
صارت خطوبتهم وزواجهم باقل من شهر وبعدها سافرت خالتي هي واحمد
وانه ظليت انتضر خبر او اتصال من رائد او اهله بس رت اعرف اخباره عايش او ميت ماكو اي خبر
الى ان يوم اجانه رجال طلعواله خواني كلهم انه اقارب رائد ودزني ع زينب بيدي امانه الها
دخلوه خواني بالبيت وجان مهدي موجود اجيت انه والخوف حاد حيلي جسمي كله يرجف دخلت للدوانيه سلمت عليه وظليت واكفه كتله خويه احجي بس لا تكلي رائد مات
لا اختي عايش بس مسافر خارج العراق وحته اهله كلهم سافرو لان عليهم خطر بس يظلون ينكتلون كلهم وهو خابرني ودزني عليج انطيج هذا الظرف
شنو بيه هذا الظرف فتحت اول ورقه شفت بيها ورقه طلاكي انه ماحسيت اله انغمى عليه
فتحت عيني لكيت روحي بالمستشفى والكانونه بايدي واهلي ملتمين ع راسي
شوي واجت الممرضه للغرفه وكالت مبروك بتكم حامل
