الجزء الرابع عشر
رائد .. يله زوزتي خلي انام وباجر اتصل بيج ماشي حياتي
ماشي حبيبي اعشقك
باي حبيبي
باي عمري
كل كلمة كالها الي حفظتها بكلبي واحس بشعور حلوووو من اذكر كلامه عمري ما حاسه بيه واطير بعالم غير عالمنه الي عايشين بيه
امي كامت تنتبه عليه اتسامتي تارسه وجهي وصفناتي واسمع اغاني كاظم الساهر ورائد جورج واسرح بخيالي وياه
جانت من تشوفني تضحك تهز بايدها وتكول الله هنيج
كلما تلفون يرن اروح ركض انه ادر
صار الليل وخابرني رائد
رائد ... شلونج حبيبي
احبك رائد
رائد .. ولج انتي خبلتيني شسويتي بحالي لا ليلي ليل ولا نهاري نهار شاغله كله تفكيري احبج زوزتي
اموت عليك يابعد عمري وروحي وهلي وناسي
رائد ... يابعد قلبي انتي
رائد كلي احبج بس تحلفلي بالعباس
رائد .. ولج احنه ما نحلف بالعباس حرام
لا حبيبي عفيه حته اتاكد انته تحبني
رائد .. والعباس ابو فاضل احبج ربي لا يحرمني منج ولا من طيبتج وحنانج شتردين بعد
امين
رائد ما كملتلي البارحه عن مرتك
رائد ... اهوووو هسه احنه وين اله تخربين علينه هاي اللحظات الرومانسيه
لا حبيبي الله عليك احجيلي
رائد ... ااووووف صار راح احجي الج
جنت معزوم انه ومجموعه من الضباط بيت ابوها ومن طلعنا جانت جايه من الدوام بس شفتها انعجبت بيها ودخلت بكلبي كلت هي هاي الي راح تكون شريكة حياتي وام اولادي حلوى ومثقفه ومن عائله
ثاني يوم حجيت ويه ابوها بالموضوع وكلي هاي هو بنتي الك وين الكه رجال احسن منك اصل وفصل والنعم منك
كتله لازم تتاكد من البنيه اخاف ماتقبل بيه رد علي كال احنه ماعدنه بنات يفرضن رئيهن الكلمه كلمتي انه بس انتضرني كم يوم احجي ويه الاهل واردلك خبر حته تجيب اهلك
انتظرت اسبوع يله رد علي وكلي جيب الاهل المهم اجو الاهل وتمت الخطبه
من اول يوم انتبهت عليها انه مفروض عليها من اول يوم نفرتني كلت يمكن تستحي وبعدها ماممتعوده علي
كلما اجليلها للبيت نفس الحاله ومرات ماتطلعلي بحجة عدها امتحان وحته من اطلع وياها للمطعم او حديقه جافة بتعاملها وياي لاتحجي ولاتهتم الي من احجي وياها
حسيت اكو شي بالموضوع
وراها بفتره كلت خلي اروحلها للكليه ورحت شفتها واكفه يم ولد انه استغربت وحسيت بالغيره والف فكره صارت براسي وتعوذت من الشيطان كلت لا يمكن زميلها
رحت يمهم شفتهم ارتبكو اثنينهم وعرفتني عليه كزميل
اخذتها للكافتريا وكعدنا حسيتها مرتبكه وبالها مو وياي وكل شوي اشوف نظرة عيونها تروح ليكدام
درت وجهي شفت نفس الولد الي جانت واكفه وياه هو راسا دار وجه
كوه سيطرت ع نفسي وسويت نفسي ما منتبه
رجعت وانه مكسور ومقهور كرهت نفسي ليش هذا حظي اول مره احب وحده وتطلع ما تحبني ومجبوره علي ظليت اجذب احساسي واكول لا ظلمتها يمكن ان بعد الضن اثم بس الليل كله مانمت من التفكير واحساس الخيانه صعب
تكمله الجزء الرابع عشر
ثاني يوم دزيت واحد يسال عليها وحجالي هي جانت عدها علاقه بشخص اسمه .... واهله جبروها تزوج واحد غيره لان مومن مستواهم الاجتماعي والمادي
انه من سمعت هذا الحجي لزمني ضغط والم براسي راد ينفجر اصعب لحظه مرت علي كرهت نفسي وكرهتها وبداخلي انه سبب هذا كله لو رايح بنفسي وحاجي وياها قبل لا افاتح ابوها ماجان هذا حالي
والمشكله الاكبر ما اكدر اعوفها مجبور ازوجها لان اذا تركتها اكيد راح يسالون عن السبب اذا اكلهم بتكم تحب غيري راح اجني عليها واكيد يموته ابوها واذا اكللهم انه ما اريدها راح اضيع حياتي ومستقبلي لان ابوها منصبه كلش جبير جان منصبه لواء بالجيش العراقي
بكلمه يصعدني لسابع سما وكلمه منه تنزلني لسابع ارض
اذا احجي وياها واصارحها بالموضع شكول الها تحبين غيري وشراح تكولي وما راح تنحل المشكله متت من التفكر والقلق وشلون راح اكمل باقي حياتي ويه وحده تخوني بيومها كمت اكسر اي شي اشوفه كدامي تميت الموت الف مرة ولا اعيش بهيج موقف ظليت ادخن واشرب في سبيل انسه بس مااكدر انسه
اذا عفتها معناها راح اعوف تعب السنين كله رتبتي ومكانتي واذا اظل وياها راح اظل عايش بشك طول عمري
صرت مثل بلاع الموس لاهو الكادر يطلعه ولا هو الي كادر يبلعه
ازوجنا وكلت بلكي الله يهديها وتحبني وانسى الي فات كله
بس نفس الحال واكثر جانت تنفر دايما مني كوى تنطيني الفراش وتخلقلي مشاكل ماكو يوم وياها ما سوتلي مشكله وعراك وصياح
كرهتها وكرهت كلشي بيها اسلوبها وغرورها ونظرتها للناس هذا ويع وهذا مو من مستواي وهذا وهذا وحته اهلي تحجي عليهم وتكول عنهم شروك وتتفاخر باهله احنه واحنه واحنه
ظلينا سنه بغداد علما كملت دراستها وقررت نروح للبصره بلكي تنساه وتحبني وافتح صفحه جديده وياها
ما قبلت وعارضت ولما ابوها جان ما قبلت تروح للبصره
استقبلوها اهلي احسن استقبال بس للاسف ما شافو منها غير التكبر والغرور وعازله نفسها عنهم وتظل بغرفتها ما تطلع
هنا زادت المشاكل بيني وبينها والاكثر ويه امي وزوجات اخواني ع اتفه الاسباب وونظرتها الهم نظره دونيه
امي صح جانت شخصيتها قويه وهي صاحبة البيت وكلمتها الي تمش بس طيبه وصاحبة حق وتعامل جناينها مثل بناتها واكثر
جانت اذا تصرف ما عجبها تحجي تكول هذا شي غلط زوجات خواني متعودات عليها ويحترمونها ويسمعون كلامها يصحولها ماما
اله مرتي هواي مواقف الها ويه امي مو حلوى تلاسنها وترد عليها وتصيح بوجها ومرات تعوفها وتكوم وغيرها وغيرها
حطت راسي بالوحل ع الرغم مكانتي ومنصبي والناس تحسبلي الف حساب بس خلتني كدام اخوتي وزوجاتهم ما اسوي شي طيحت كرامت بالكاع اجنت استحي احط عيني بعين امي لو احد من اخواني
بس مره من المرات ما اتحملت صعدت امي تحجي وياها ما اعرف شنو صاير بوقتها
بغرفتنا قامت وطردتي امي من الغرفه انه بذيج الساعه ما ملكت اعصابي اجيت وكتلتها وطلعت ظيم كلبي كله وكلت الي يريد يصير يصر
كلتلي اله اندمك
خابرت لاهله كلتلهم هسه تجون تاخذوني ما اتحمل بعد
خابرالي ابوها كلي شنو صاير
كتله عمي حجي هواي ما ينحجي بالتلفون كال انه هسه جاي للبصره
اجه واهلي استقبلوه ورحبو بيه
حجيت الصار كله ما عجبه تصرفاتها وكال انه اتصرف وياها وادبها وكال صيحوها خلي تجي وخلي الكل الي بابيت يجي
نزلت واجت تبوسه ضربها راشدي ورزلها وطيح حظها كدام البيت كله وكلها هاي رباتي الج وهسه تعتذرين من عمتج وتبوسين ايدها
وراها امي كلتلي يمه شوفلها بيت وخلي تكعد وحدها هي ماعاجبها تكعد ويانه وانه هذا بيتي من يوم دخلته حولته من جنه الى جحيم واخاف تخرب جنايني عليه
وجبتها يمكم وكعدت بس ظلت هي هي نفس اسلوبها وياي ما تغير
كرهتها وماكو الها اي ذرت حب بداخل جنت احس بنفسي اتعس انسان رغم الفلوس والمنصب بس راحة بال ماكو
الي جان مصبرني ع هذا كله ومهون علي مصيبتي هو شي واحد
نظرة عيونج من اشوفج وانته جايه من الدوام اشوف وجهج من ترتبكين اول ما تشوفيني وتصير وجناتج حمر من الخجل احس انه لسه عايش كلشي بيج جان ماموجود بيها الخجل البراءة طولج وسمارج الساحر و عيونج العسلي جنت اشبهج بالممثله الهنديه الي جانت تطلع بفيلم الحيه
ماتدرين شصار بيه من ازوجتي ادمرت حيل
بس من طلكتي كلت هلمره ما اريد افوتج من ايدي لازم اخذج وخفت لا ترجعين لطليقج او تزوجين ثاني
لذلك سفرت ام سيف لبغداد يم اهله شرتيلها بيت يم بيت اخوها
وكلت خلي يفرغلي الجو وياج واعيش وياج الي ماعشته قبل
بس الظروف تمنعني اعرفج باهلي اخاف لايوصل الخبر الها ويضع كلشي من ايدي لان حياتي ومستقبلي كله بيد ابوها هذا الشي الي مصبرني عليها
بس لابد يجي يوم ويتغير الحال واعترف بيج كدام العالم كلها واكول هاي الي خذت قلبي هاي تاج راسي وام جهالي هاي حبيبتي ومرتي وامي وكلشي بالنسبه الي بس كولي يارب
يارب
