الجزء الخامس عشر
بقلم .... رشا الاسدي
من حجالي رائد عن قصته ويه زوجته ارتاحيت واتاكدت ان هو ما يحبها بعد ويحبني اي يحبني الي وبس .. اسعد ايام عشتها وياه بذيج الفتره حسيت براحه وامان وسعاده
بس ابني هو الي منقص عليه سعادتي اتمنى اشوفه واحضنه وارجعه لاحضاني بس صعب ... يمكن اذا اشوفه بمكان ما اعرفه حرموني منه حسبي الله ونعم الوكيل عليهم
جيرانا واقاربنا كلهم عرفو بيه مزوجه
امي كلتلهم مزوجه رجال جبير يشتغل تاجر من اهل الحله وعنده املاك و تجاره هنا بالبصره ويعرف زوج خالتها ابو وسام وصاه ع مره بس تعيش هنا كلما تصير عنده شغل بالبصره كون هي موجوده يمه وكله ع زينب
وهي مرتاحه وياه والحمدلله
مره اجت عمتي كريمه وجانت شايله بخاطرها شلون ما خبرناها ع زواجي وفهمتها امي الشغله صارت بسع وكلت ازوجها احسن من ظلتها هيج وهو خوش رجال ومريحها وماخاله محتاجه شي
عمه كريمه ... اي مبين عليها الراحه زنوبه مورده وصايره تخبل حبيبتي الله يسعدج ويهنيج
انه بتسمت الها وبستها
عمه كريمه ..، ماكلتلكم ذاك اليوم شفت مريه جيرانه بيتهم قريب ع بيت ابو علي وسولفتلي عليهم كالت هاي مرت علي شمسويه بيهم لاعبه لعب عرايك ومشاكل هي وياهم واخر شي بنولها مشتمل وحته بابها خارجي لاتدخل عليهم ولا يدخلون عليها بس همه ما يحجون جانو يخافون من الشماته بس من شفنه الباب الثاني يله عرفنا
وهاي اخته الثانيه ازوجت بقت بس الجبيره
امي .. وحسوني منو اله
عمه .. حسوني يم بيبيته وعمته همه جاي يربوه.. اله ابوه ما يدري عنه شي
كمت من يمهم ما تحملت خنكتني العبره ع ابني ظليت ابجي عليه وع حاله ماعندي وسيله غير الدعاء الله يرده الي
ومرت الايام والتهيت ويه رائد جان مثل الطفل المدلل بين ايديه
٣ ايام الي اعيش بيها وياه انسى بيها همي كله وانسه العالم الي عايشه بيه اعيش بعالمه هو وبس جنت اتعمد ازعل عليه حته يجي صالحني بطريقته الخاصه
صار وياي شخص ثاني غير الي جنت اعرفه صار كلشي بحياتي
كلما اصلي اندعي ربي يحمي وما يحرمني منه بيوم
بده العام الدراسي الجديد سنة ١٩٩٩ مصطفى صار بالسادس ومرتضى بالخامس علمي
طلبت من رائد اقدم ع دراسه خارجي ومادام مصطفى اخوي بالسادس ادرس وياه وافق وشجعني وكلي اي درس تحسين صعب عليج بس كولي اخليلج مدرس يدرسج وبديت ادرس واخويه مصطفى يساعدني
يوم من الايام بعد ما اجه رائد عليه خلصت وياه ايام العسل.. ثالث يوم محظره جنطتي وكاعده بالحديقه منتظره ابو عبدالله يجي ندعكت الباب
انه رحت افتح الباب واذا اشوف مره عمرها ب٦٥ جانت لابسه ستره وتنوره وشال شامرته ع شعرها يعني مرتبه
السلام عليكم .. وين رائد جوى؟؟
انه ضليت امتمت ما اعرف شرد عليها ... لا عيني مو بيت رائد هذا
هاي شبيج دصيحي لرائد
لا خاله انتي متوهمه يا رائد هذا.. غلطانه بالعنوان
بهلاثناء اجه ابو عبدالله هو هم تفاجئ .. ام خالد ( خالد ابنها الجبير)
اها ابو عبدالله شهلصدفه شجابك هنا
ظل ابوه عبدالله صافن ما يعرف شيكول
انه لسه ماعرفت هي منو
كالت هسه شنو اظل واكفه بالباب
دخلها ابو عبدالله وكلي دخليها بالدوانيه هاي ام رائد
دخلت وابو عبدالله ظل كاعد بالحديقه
اول ما شافت البيت وكامت تفتر بيه بعدين بدت باسألتها
كلتلها انه ما اكدر اكلج عن شي اذا تردين سالي رائد
خوش اخابره لرائد واشوف وطلعت وركبت بسيارتها جانت هي تسوق سياره
ورجعت للبيت بس ما حجيت لامي عن شي العصر اتصل رائد
الوو ها زوزتي اليوم كبستج امي وظل يضحك
تضحك ها .. انه متت خوف وانته تضحك
رائد .. جاي اتخيل وجهج من شفتيها
انه جنت خايفه عليك .. شنو خابرتك وشنو كلتلها
رائد.. خابرتني وحجيتلها كلشي
اي شنو جانت ردة فعلها
رائد ..، عادي بس زعلت لان ماكلتلها وكالت تشوف يوم وتحي تزوركم
ها اي هلا بيها
انطيت خبر لامي
وراها بيومين اجت ام رائد لبيتنا جانت شخصيتها قويه والعز والترف مبين عليها
طلبت من امي ابقى انه وياها لوحدنه
ام رائد .. اي زينب تحبيه لرائد ابني مو
اي خاله احبه
رائد كلشي حجالي عنج صح انه ماحبيت طريقه زواجكم ووبالسر ومن دون علمي بس تبقى هاي حياته اهم شي هو مرتاح بحياته وتكونين انتي بت حلال وتريحيه وتهتمين بيه
انه سالت عنكم وكالو خوش بينيه واهلها زينين صح اكو فروق بينا بينكم مثلا مستواكم المادي ومذهبكم غير مذهبنا بس تبقى هاي امور خاصه بيكم
المهم القاضي راضي هواي مدحلي بيج الله يهنيكم
وصتني ما احجي عن زواجي منه
واستاذنت وراحت
كلامها اثر بيه وبالاخص مستواكم ومذهبكم بس ما كلت لامي اخاف تنقهر
المهم جانت بين فتره وفتره تتصل علي ومن اجه رائد للبصره عزمها ع غده اجت هي وياه وجنت مسويه دولمه ورائد كلي راح اشوي سمج
تغدينا وكملنا رائد راح نام بالغرفه
وبدت تعلق ع كلشي هذا ليش وهذا شنو احسها مامقتنعه بيه ومستصغرتني
بس انه كلت لازم اكسبها الي
بس شلون
خاله وجهج بيه هواي شعر وحواجبج ما مرتبات وشعرج طالع الشيب شعجب هيج هامله نفسج وانتي حلوى ما شاالله
ام رائد .. اي بالفعل اريد اروح للصالون فد يوم
افه عليج ترحين حلاقه وانه موجوده يمج
ام رائد.. شنو تعرفين
اي كلشي اعرف اليوم اله اطلعج عروس اخلي ابو رائد يطيح صفح
ام رائد .. يله الله وايدج
خابرت ع ام عبدالله وكلتلها دزيلي عبودي محتاجته واجه وصيته ع صبغ شعر وشغلات احتاجها
كعدت الها وحفيتلها وسويتها شيره لجسمها وصبغت شعرها وكصيته الها كصه حلوى وحطيتلها مكياج خفيف
وكفت كدام المرايه
ام رائد .. شنو هاي شسويه ياملعونه عاشت ايدج هاي وين جنتي عني من زمان
بعدج عمه ما شايفه شي يمته ما تردين تعالي هنا واله اطلعج عروسه
ام رائد .. يمه من سوالفج
رائد جان نايم كعد وشافها ظل يفرك بعيونه
هاي شنو يوم اليوم شفكج من بابا
ام رائد .. ولك استحي انه امك
رائد .. جا غير طالعه كيك
حسيتها ارتاحتلي وكل شوي تطل بالمرايه
صار العصر سويتلهم جاي وكعدنا نسولف وضحك وكالت يله تاخرت لازم اروح
من طلعت رائد كلي عفيه عليج هيج اريدج اهم شي امي
