الجزء الثالث عشر
اجه ابو عبدالله بسيارته جانت تكسي ورحنا انه وامي للبيت ابو عبدالله كال هذا بيتي مقابيلكم واي شي تحتاجوه اتصلي علي وهسه تجيكم ام عبدالله تساعدكم هي وعبودي
البيت مساحته صغيره حديقه صغيره وطابق واحد بيه صاله ومطبخ وغرفة نوم وجان ماثث بس يحتاج تنظيف
ونظفنا انه وامي واجت ام عبدالله ساعدتنا وما قصرت هي وابنها
منا لليل كملنا ورجعنا وصيت ابو عبدالله يجي علي ثاني يوم العصر
رحت ثاني يوم
اول ما وصلت سويت ترتيبات الغرفه الشموع والفرشه وبخرت البيت وحضرت اكل ولبست بدله حمره قصيره وتمكيجت ورتبت شعري وتعطرت وكعدت بالصاله شغلت التيفي وكعدت انتظر صارت بالعشره بالليل وماكو بديت انعس وهو ماكو غفيت وانه نايمه ع القنفه ما حسيت اله وايد تلعب بشعري فزيت لكيته رائد اباع ع الساعه ب ١١ اخذني للغرفه وخذ حاجته مني وراح سبح وكال يله زينب انه راجع لاهلي
وين تروح وانه شلون
رائد .. انتي تظلين هنا شعليج
بس انه اخاف ابات وحدي
رائد.. من شنو تخافين وما عليج شي قفلي البوب وابو عبدالله بيتهم كبالج انه موصيه واذا صار شي لا سامح الله بس اتصلي عليه وهو يجيج او مرته
منا ورايح تعودين نفسج تباتين لوحدج
طلع قفلت البوب وظليت وحدي خفت ظليت اتكلب ما اجالي نوم من الخوف ظايت افتر بالبيت اخر شي رحت للصاله وشغلت الفيديو جان وقت الكاسيتات خليت فيلم هندي جنت احب الافلام الهنديه ومانمت منا للفجر ويه الاذان صليت ونمت
ثاني يوم اجه الظهر وجايب غده وياه وظل لليل وياي وراح لاهله
واليوم البعده اجله العصر جان جايب ويه بدلت رقص مصريه وكلي لبسيها وركصي كتله ما اعرف اركص
كلي انه كم مره اكلج من اطلب منج شي ما تكللي ما .. ماتعرفين تتعلمين كتله صار
لبستها وشغلي اغاني وركصت اله جنت اعرف اركص اذكر من جنا صغار انه وفاطمه نشتري شرايط ونشغل المسجل بغرفتنا ونركص
وبات والفجر طلع لبغداد وكال هذا جدول جيتي الج كل اسبوعين واضح يمته ما تردين ترجعين لهلالج تتصلين بابو عبدالله
جان يروح لبغداد بسيارته
جانت علاقتي بيه رسميه هو يامر وانه انفذ بدون نقاش كانما انه جندي من جنوده لا يحجي ولا يسولف ولا ولا يبتسم حته
ظلينا ع هذا الحال فتره طويله بس خلال هاي افتره حسيت وياه احساس عمري ما حاسته جنت احبه مو بس احبه اعشقه واعشق كلشي بيه هدوؤه غضبه نظرة عيونه شخصيته هيبته كلشي بيه ع الرغم من طبيعة علاقتنا بس مرات ما اصدق انه زوجته وبين احضانه وامووت قهر اذا فكرت ان بيوم يعوفني لو يشوف غيري لو من اذكر كلام زوجته عنه
اتمنى يحس بيه انه احبه ويحبني بكد حبي اله
ويطلع مايحب زوجته
الاسبوعين الي انتضرهم بيه اليوم يمر علي سنه واحسبهم حساب علما يجي و٣ الايام الي وياه احسه دقايق بسرعه يخلص الوقت وياه
فد يوم اجه من بغداد ونفس جدول كل مره
اجه ثالث يوم العصر بيده فايل به اوراق خلاه ع المعرض..
رائد .. زينب اليوم ما ابات عندج ب ١٠ اطلع لبغداد
انه فتحت عيني عليه ردت اساله ليش وسكتت
رائد .. عندي مهمه وظروري باجر الصبح موجود
هزيت براسي وابتسمت
كملنا يومنه مثل كل مره جنت اتمنى الساعت توكف ما تمشي بس الوقت وياه ما احس بيه صارت بالعشره لبس ملابسه وكلي انه رايح خذاله بوسه وطلع بسيارته
انه دموعي كوه حابستهم بعيوني هو طلع وانه انجرت من البجي ظليت انحب رحت نمت بالفراش وطلعت قميص اله جنت ضامته وصورته وشبكتهم واشم بريحة قميصه وابجي ابجي لحدما شوي غمضت عيني وانه حاضنه القميص والصوره حسيت اكو احد واكف ع راسي
تكملة الجزء الثالث عشر
اكو احد واكف ع راسي كعدت
وشفت رائد هو بحالة استغراب شاف عيوني حمر ومورمه من البجي وحاضنه شي جره من ايدي شاف قميصه وصورته اجه كعد ع الجربايه وشبكني انه انفجرت من البجي اكثر ظل يمسح الدمع من عيوني
رائد ... زينب لهل الدرجه تحبيني وانه ما ادري
واكثر مما تصور انت اول حب بحياتي اول دكة قلب وللك انته روحي واغلى من روحي و انه اموت بلياك
رائد ... اوووف هذا كله وماتحجين ولج انه هم احبج واموت عليج
بس صدج الي قبل الزواج من ردت احجي وياج حسبالي انتي ماترديني ولج احبج
لزم ايدي وباسها وكلي كولي احبك رائد
اتقربت يم اذانه همست اله احبك واعشقك واهواك وانه مجنونه بحبك
رائد .. لا لا مامصدك اكيد انه بحلم
لا رائد انه الي بحلم اكرصني خلي اتاكد
كرصني وشبكته وظليت ابجي وهو هم دمعت عينه
اتنه شنو الي جابك
رائد .. نسيت اوراقي ع المعرض همزين نسيتهم وشفت حبج الي
يله حبيبي انه لازم اروح ديري بالج ع روحج وهاي دموعج ما اشوفها بعد ومن اوصل وافرغ اتصل بيج واريد كلشي تحجيلي شلون حبيتيني
وكفنا بالكراج وشبكني وحضنته حييل وظل يبوس بيه وراح
بوكتها انه طير وطاير بالسما معقوله يحبني ياربي ما ضاع صبري
ظليت اكمز من الفرح
جنت بوكتها اسعد وحده بالعالم الليل كله ما نمت كل كلمه حجيناها اذكرها واعيدها واذكر نظرات الي قبل من جنت طالبه ظليت للفجر ع هاي الحاله لحد مانمت
كعدت الصبح واحس براحه عمري ما حاستها بس احس اكو شي ناقصني ومنقص علي فرحتي
ابني ربي مثل ما حننت قلب رائد علي رجع وليدي لحضني يارب
رجعت للبيت وكل شوي اصفن واذكر لليله امس بس اذكرت مرته لعد هو موجان يحبها معقوله نساها لا ما معقوله هي حبه لاول
اتصل بيه العصر وطمني عليه و كلي راح اتصل بيج بالليل
اتصل بيه بليل جان التلفون بالدوانيه ومحد يدخللها فاخذت راحتي
رائد .. الو حبيبي مشتاقلج
يابعد عمري انه الاكثر
رائد .. زنوبتي كليلي احبك
احبببببك
رائد ... يابعد روحي الله لا يحرمني متنج زنوب اريد تحجيلي شلون ويمته حبيتني
حبيتك من اول ما شفتك وانه رايحه للدوام سحرتني بجمالك جنت من اشوفك يظل كلبي يدك حيل وما ادري شيصير بيه ويوم عن يوم احبك اكثر جنت الليل كله افكر بيك واتمنى تكون من نصيبي لحد ما دريت انته مزوج انقهرت وحاولت ابعد نفسي عنك واشيلك من بالي بس ما كدرت
رائد ... هذا الحب كله شايلته بقلبج الي وما تحجين
ما اكدر احجي صعبه عليه جنت اخاف
رائد .. منين تخافين حياتي
منك اخاف تصدني واخاف ع كرامتي واخاف من اهلي من كلشي اخاف والاكثر اخاف ع بيتك انته مزوج وعندك عائله
تصدك اتزوجت وانته ما رحت من بالي دائما افكر بيك واتعوذ من الشيطان واكول انه ع ذمة رجال حرام علي افكر بيك
رائد ..، يابعد عمري وروحي وحياتي وكل هلي وناسي
زنوب انه هم حبيتج كل شي بيج حبيته خجلج برائتج جمالج جنتي من تتعدين واشوفج انتي وصديقاتج مثل البدر وبين نجوم اشوف بتسامتح وانتي مدنكه راسج للكاع اشوف برائتج جنت احسج طفله بجسم مره
شفت بيج هواي صفات الي اتمناه تكون بشريكة حياتي
بس اخ لو ظروفي غير هاي الظروف جان ما خليت احد ياخذج غيري
وام سيف
رائد ... ام سيف خليني ناسيها ليش جبتي سيرتها
الله عليك احجيلي عنها
