A Home In His Arms COMPLETED (Published by PHR)

Chapter 23

NAPANGITI si Angela nang makita niyang dumaong na ang bangkang kinalululanan nina Dylan, Brandon, at Marko. Galing ang mga ito sa laot at nangisda. Sabado noon at wala siyang clinic kaya naroon siya at nag-aabang sa pagdaong ng mga ito. Napapalatak siya nang makitang naka-shorts na lang ang mga ito. Nagpapaligsahan yata ang mga ito kung sino ang may pinakamagandang katawan.

Nang tingnan niya si Marko ay napansin niyang bahagya na ring namumula ang balat nito dahil sa mahigit isang linggo na pananatili nito sa Catalina. Lalo na at palagi pang isinasama sa laot ng mga pinsan niya ang binata. Tapos na kasi ang pag-aani sa fruit farm kaya sa dagat naman naglalagi ang mga ito. Wala namang reklamo si Marko. Sa hapon ito dumadalaw sa bahay nila na siyempre pa ay kasama rin sina Brandon at Dylan. Si Charlie kasi ay napaluwas sa Maynila dahil sa emergency diumano sa restaurant nito.

Mabilis siyang lumapit sa bangka at kumapit doon. "Marami kayong huli?" nakangiting tanong niya sa mga ito.

"Suwerte yata si Marko, eh. Tuwing kasama namin sa laot ay maraming isda ang lumalapit sa lambat namin," nakangiting sagot ni Dylan sa kanya.

"'Buti pa ang mga isda nahuhumaling sa kaguwapuhan ko. Ewan ko ba 'yong isa riyan kung bakit hindi madala sa good looks," ani Marko na lumapit sa kinaroroonan niya. Napapitlag pa siya nang pasimpleng ipinatong nito ang isang kamay sa kamay niya. He squeezed her hand lightly ngunit kung umakto ito ay animo wala lang dito iyon. Pinagbigyan na niya ito, tutal naman ay minsan lang itong makalusot sa mga mata ng mga pinsan niya.

"Aw! Tanghaling-tapat, brod, dumidiskarte ka na agad. Take your hands off her, man. Akala mo makakaisa ka na, ha," natatawang sita ni Brandon.

Napapakamot sa ulong sumunod naman si Marko habang siya naman ay namumula ang mukha sa pagkapahiya. Ganoon kahigpit ang mga bantay niya.

"Kapag sinagot na ako ni Angela, lagot kayo lahat sa 'kin, lalo ka na, Brandon! Kawawa naman ang magiging anak mong babae sa sobrang higpit mo," tila naaasar na wika ni Marko na ikinatawa nilang tatlo.

"Dapat nga magpasalamat ka na si Brandon lang ang nakaharang sa daan mo. Dahil kung nagkataong naririto ang lahat ng binata, baka hindi mo na magawa ni sulyapan man lang si Angela," wika naman ni Dylan nang huminto na ang halakhakan.

"Eh, kung itanan ko na lang kaya si Angela? Tamang-tama dahil nasa helipad pa ang helicopter ko. Anytime, puwede kong itakas si Angela," sabi ni Marko bago siya kinindatan na nagpasikdo na naman sa dibdib niya.

"Gawin mo 'yan, pero magtago ka na sa baril ni Vladimir. Siguradong hindi n'on patatawarin ni dulo ng buhok mo," sagot ni Brandon.

Napapangiti na lang si Angela sa tinatakbo ng usapan ng mga ito. If Marko only knew, ramdam kasi niya na hindi na iba ang turing ng mga pinsan niya kay Marko. They were treating him as if he was one of them. And to her that was a good sign. Ang ibig sabihin lang niyon ay pasado si Marko sa panlasa ng mga ito.

Nagtira lang sila ng matatabang isda na iihawin nila sa cabin ni Brandon habang ang karamihan ng isda ay ibebenta nila kay Manang Luz—ang madalas bumili sa mga huli nilang isda. Itinitinda naman nito ang mga iyon sa Centro. Ang mga napagbebentahan nila sa isda ay iniipon nila at idino-donate sa simbahan ng Catalina. Bukod doon ay may kanya-kanya ring pinapaaral ang mga pinsan niya bukod pa sa mga batang nasa ilalim ng Valencia Foundation—isang nongovernment organization na ang layunin ay pag-aralin ang mahihirap na kabataan ng Catalina.

Sumama siya hanggang sa bahay ni Brandon. Umuwi naman si Dylan sa cabin nito para doon na maligo. Susunod na lang daw ito sa kanila. Naunang pumasok sa banyo si Brandon para maligo kaya naiwan sila ni Marko sa sala.

Tinangka nitong lumapit sa kinauupuan niyang bamboo sala set. "Hep! Amoy-isda ka, huwag kang lalapit sa 'kin."

"Honey naman, minsan na nga lang ako makawala sa mga mata ng mga pinsan mo, eh," mahinang wika nito bago naupo sa tabi niya.

"Anong honey? Huwag mo nga akong tawagin ng ganyan," kunwa ay sita niya pero lihim naman siyang kinilig.

Naging mapangahas na naman si Marko nang hawakan nito ang kamay niya. "Ang lapit-lapit mo pero pakiramdam ko, miss na miss na kita. Kung puwede nga lang na yakapin na kita ngayon, eh. I will hold you in my arms like there's no tomorrow," wika nito sa mahinang tinig at sa malamlam na mga mata.

"M-Marko..." Iyon lang ang tanging nasambit niya dahil natutunaw na siya sa paraan ng pagtingin nito sa kanya. She felt the tension in his hand, and it pleased her. Pakiramdam niya ay nasa init ng mga palad nito ang sinasabi nitong pagka-miss sa kanya.

"Angela, honey..." Marko moved closer to her. Oo, amoy-isda ito pero pakiramdam niya ay nangingibabaw pa rin ang natural na amoy nito. His distinct manly scent that made her shiver. And his eyes, he was looking at her intently as if he wanted to compel her to do as he whished. Ah, tila gusto niyang magpasailalim sa kapangyarihan nito at magpadala na lang sa agos kung saan man siya dalhin niyon.

Napalunok siya nang unti-unting lumapit ang mukha nito sa kanyang mukha. She knew he was going to kiss her and she was excited. Pero bago pa tuluyang dumampi ang mga labi nito sa mga labi niya ay narinig na nila ang pagbukas ng pinto ng banyo.

Marko sighed in frustration. "Mag-usap tayo mamaya. Please, I want to talk to you. Gagawa ako ng paraan para makapag-usap tayo, okay?" wika nito bago tumayo at mabilis na lumabas ng sala. Eksaktong paglabas ni Brandon sa sala ay nasa labas na ng cabin si Marko habang siya ay nagkunwaring abala sa pagbabasa ng magazine na nadampot niya sa mesita.

"Where's Marko?" tanong ni Brandon sa kanya.

"Baka nasa labas," wika niya na hindi ibinababa ang hawak na magazine na tumatakip sa mukha niya. Salamat sa magazine at naitago niyon ang pamumula ng mukha niya.

Nagulat siya nang bigla na lang mawala ang hawak niyang magazine. "Angela, baligtad ka na bang magbasa ng magazine ngayon?" nakangising tanong ni Brandon. Inayos muna nito ang magazine at saka nito iniabot sa kanya. Lalong nag-init ang mga pisngi niya dahil doon. Palpak pala ang cover-up niya.

Sa sobrang inis niya ay binilog niya ang magazine at inihampas iyon kay Brandon na humahalakhak pa.

e='margin-bww:?