#انتقام_من_يتيمة8
نزلنا جوه على امي وهي مثل ماكتلها سوت وباست رجليها امي تحجي وياها وهي منزلة راسها كعدت بصفها على الجرباية واني كعدت بالكرسي الي يمها امي هواي سألتها اسئلة
امي:شسمج يالجميلة
سجى: اباوع عليه اخاف منه.. سجى
امي:شحلاتج يالمزيونه كون جهال الغالي يطلعون مثلج ..هاي الي البارحه اجت امج لو شنهي
سجى:امي نطتج عمرها قبل 6سنوات الله يرحمها هاي مرة ابوية
امي:اي ياسبحان الله من صدك اني عرفتها من شكلها عمن شكلها مال صخلات وباوعت عليه امي وكامت تضحك واني ضحكت وي امي....باوعت على سجى لساها مدنجه راسها ومترفعه شمالج ياسجاوي اخافنج تحبيها تره هاي ماتحب هاي مال تعلكيها وي الصخلات شكلها ابد مو راحة ....باوعت امي الها تبجي باوعتلي شنهي مريتك زعلت لايمه شتزعل منج ..ولج انت شمالج
سجى:ماكو شي اشتاقيت لاهلي
امي:يالمزيونه جا احنه شنهو انا امج وهذا الغالي زوجج وحبيج وراح يصير كل عائلتج ..سجى كامت تشهك وتبجي حيل وحضنت امي ..
سجى:شكرا الج خالة
امي:شنهي خاله ولج انا امج
سجى:ابتسمت لان من صدك محتاجة ام او حنان ..ابتسمت وكتلها امي بس الدموع يصبن من كل مكان
عباس:شفت الموقف كدامي حسيت روحي غريب ..استخطيتها من صدك عفتهن وطلعت افتريت بالبيت ورحت يم المسبح الي راحتي هناك كمت اتذكر كل صورها وياي من يوم الي شفتها من دااحول الغراض وبالسجن ومن جانت كاعدة ومن لكيتها نايمة بالصندوك مال سيارة ومن مريضة وبيوم الزفة من صدك جانت فقيرة وحبابة ... و شبيه تره هي دعارة شكو مهتم الها .....
مر اسبوع كامل واني على نفس الحالة وياها اني انام جوه بالهول وهي بالغرفة لو ماصارت المشكلة وزواجي بيها صار رسمي لكنت طلكتها وشمرتها بالشارع لان نص بالي يمها انام بره غرفة امي علمود لاتحس على شئ وهي تنزل الصبح تسلم على امي وتسولف وياها بعدين تصعد للغرفة مااحتكيت بيها خلال هالاسبوع بس اطب ابدل واخذ ملابس هي كانها سكانة على الجرباية من اجي تتلفلف بالغطا وتبقى على الجرباية .....باليل طلعت من يم امي اجاني اتصال من المطار انه باجر لازم اروح الهم انتهت اجازتي رجعت على امي كتلها لازم اروح لبغداد امي خطيه ماحجت شي بس دعتلي ..رحت على الخدامة وصيتها على امي وكتلها اي شئ يصير هنا تتصل عليه بي صعدت ليفوك واول مرة بعد اسبوع اصعد ليفوك باليل شفتها وتفاجأت جانت لابسه شال وفارشة بالكاع شال وتصلي وتشهك وتبجي من طبيت سويت صوت بالباب لهذا نصت صوتها نزلت جنطتي من فوك ورتبت الملابس الي احتاجهن واخذت زيي نزلت ليجوه وهي بقت على وضع صلاتها اني تفاجأت هم دعارة وهم تصلي والله غريبه ياربي عسى ولعله الله هداها نزلت نمت ثلاث ساعات وبعدين كعدت سلمت على امي وبستها ودااطلع رجليه اخذتني الها اخذت من جوه جادر مال صلاة وسجادة صعدتهم الها لكيتها نايمة على السجادة ذبيت الجادر والسجادة يمها وطلعت ياربي بس لااكون ظالمها ...ياربي نور طريقي ..طلعت لبغداد بسيارتي وبديت شغلي بغداد بنفس البيت الي جنت بي رجعت بس هالمرة وياي صدقاني مو وحدي طبعا بالشغل المعاتبات لراسي من وره زواجي كدرت اتلافاها ومااعرف شلون خلصت منهم الي يزعل بجهه والي يعاتب بجهه اووو كومه هوسه فوك راسي رغم هذا ماانسى اتصل بالخدامة واسألها على امي جانت تكلي المدام ترعاها وتقصد سجى بس اني مااثق بيها وكتلها ممنوع يطب او يروح اي رجل للبيت وطبعا اني حاط كامرة مراقبة بره البيت ورابطها اون لاين بالمبايل علمود اعرف الي يدخلون والي يطلعون اخواني ماشاء الله ابد ميسألون عنها استغفر الله لو ماامي تريدهم وتنقهر من اطردهم جان ولاخليت واحد يدخل للبيت ....
سجى:بعد مادريت انه هو طالع بمهمة بغداد تمنيت انه اروح اشوف اهلي اعتنيت بأمه جانت تحبني خطيه جنت اوديها للتواليت وااغسللها وابدللها وطبخلها عرفت بيهامرض القلب تذكرت امي الله يرحمها كمت انام يمها بس مو على الجرباية بالكاع جبت فراش وانام.....
عباس:مر ثلاثة اسابيع على مهمتي امي صحتها زينه من كلام الخدامة... ابوها كم مرة يجيني اني اطرده مااهتم اله ولاالها ..خلص الشهر واخذت اجازة ورجعت للبيت...
رجعت ساعة ب11 الصبح شميت شئ غريب وطيب طبعا محد يعرف راح اجي وبما انه اني عندي المفاتيح محد يحس عليه طبيت من المطبخ مو من الصالة لكيت تشريب دجاج وتمن مسلوك على السنك جعت خربت من الجوع وجماله طلعت من بغداد بلا ريوك دخلت لغرفة امي وشفتها شحلاتها تضحك ووجها منور ولابسة لبس يجنن فرحت من شفت امي كاعدة بصفى سجى لابسة تراك خردلي يجنن عليها وشعرها مسويته ضفيرة وطويل وكذلة عندها تجنن هاي البنيه نفسها سجى اتفاجأت بالكل بالبيت حسيت اكو شئ متغير اول ماطبيت اتبدلت وجهه سجى الضاحك بخوف وكامت وكفت ونزلت راسها سلمت على امي بست راسها
وهي فرحت كلش بوججودي سجى رادت تطلع واني عيوني مفاركتها لسجى كالتلها امي صبي غده لرجلج يمه طلعت سجى تصب غده ماادري شتسوي امي كامت تحجيلي عنها وعن اخلاقها وشلون جانت تداريها وتمدح بيه وكالتلي نعم مااختاريت اني جذبتني وره دقايق اجت سجى وجانت لابسه شال وفد شئ طويل فوك التراك كالتلي الحمام جاهز اسبح بي امي كالتلي كوم اسبح وليدي رحت دااسبح فتت من يمها رجعت ليوره خوفها مو طبيعي مني طبت يم امي ماادري شكامن يحجن كملت سبح ونشفت شعري جان كلشي بالبيت نضيف ومرتب الخدامه متسوي هيج الا بأمر اكيد هاي سجى نزلت جوه يم امي سولفت وياها وره دقايق جابتلي الغدة الله صار شكد مماكل هيج اكل عزلت لامي مواعينها ونطتها اياه كالتلها يمه هذا بلادهن اكلي منه اني عيوني ماشلتها من عليها شلون تداري امي وشلون تراعيها بدينا ناكل امي كالتلها يمه اكلي شمالج متاكلين اني باوعت عليها كلتلها خاله مااشتهي
امي:شنهي يمه بس لاصايمة اليوم همات
سجى:اي خالة اليوم خميس لازم اصوم من رخصتج خاله
امي:يمه شحلاتها هالبنية اخلاق وجمال وديانه
عباس:اي يوم اي ..احجي وي نفسي شتعرفين يوم عنها هاي لو تصلي للموت متكفر عن ذنوبها اخ يوم اخ على نياتج ..اني اكل والاكل كلش عجبني عبالك صارلي سنين ماماكل ....
#
