#شاءت_الاقدار١١
#زينب_الموسوي#
في يوم جمعه الصبح دگت باب البيت ميلاد صارلها اكثر من شهر تركت البيت
ميلاد السلام عليكم
قيس وعليكم السلام خير شجابج
ميلاد اودع عمي مسافره لتركيا بعد يومين
سمعت جملتها وخرت عن طريقها واسندت ضهري للحايط مارديت عليها
بداخلي احس كلشي انهدم
دخلت بخطوات حزينه دخلت بعدها كانت مدنگه على ايد ابويه وتبوسها وگفت اسمع رغم نظرات مي الي تامرني اترك الصاله
ميلاد شلونك عمي صحتك شلونها
عمي ليش تركتي البيت وعايشه عد مره غريبه خيبتي كل ضني بيج
ميلاد عمي هيج احسن انتم مرتاحين واني مرتاحه وجايه اودعك واخذ الاذن منك
ابو قيس الاذن على شنو
ميلاد مسافره لتركيا ويه الدكتوره وبعد ماارجع ابريني الذمه يمكن بعد مااشوفك كلكم ابروني الذمه يمكن اذيتكم بدون قصد
دعاء وهذي الدكتوره عايشه لوحدها ماعدها رجل
ميلاد لا ماعدها عايشه لوحدها وراح تاخذني وياها
مي والله حظج گاعد تعيشين بتركيا ومتونسه انطينا من هذا الحظ اشويه
ميلاد انشاالله حظج احلى من حظي وديري بالج على نفسج وهذا رقم تلفوني جديد اخذيه يمكن تحتاجين شي وانتي دعاء اخذي الرقم حتى نتواصل واسمع اخباركم
مي شنو قصدج اعرف تريدين الرقم ياخذه قيس اعرفج واعرف الاعيبج
جايه هنا تقهريني شوفوني مسافره لتركيا وراح اعيش واتونس واتزوج بالخارج واني الي خسرت
قيس شخسرتي مي زواجنا قصدج شخسرتي بيه
مي ئي عيني تعصب وتعال اضربني راويها شلون انت محروگ گلبك عليها
قيس مي اصعدي لغرفتج واحترمي نفسج لاتتجاوزين
مي عمي تسمع قيس شلون مقهور وعصبي لان سمع راح تسافر وبعد ميشوفها اذا هو الليل كله مگابل الشباك يباوعها
قيس مي كلمه زايده كوليها وشوفي ردي شلون
ميلاد بچت مي بعد مصارت مناقشات حاده بيت عمي اني اعرف مي كلبها طيب وسبب تصرفها هو شعورها ان زواجها كان مجرد انتقام لقيس مني واكيد حبت قيس بعد مصار رجلها ودافع الغيره مخليها تصب غضبها عليه اني وگفت يمها
ميلاد مي تعالي شويه اريدج
اخذتها لغرفتنا القديمه
ميلاد لاتظلين تذكرين قيس بيه انتي تدرين كان يحبني وقبلتي تتزوجيه
اني رايحه ويمكن بعد مااشوفج انسيني ولاتذكريني گدامه
مي تعبت منه ويايه ومو ويايه
ميلاد اتحملي شويه وكل متصبرين تكبرين بنظره بمرور الايام ينساني مثل مااني نسيته
مي وانتي صدوگ نسيته
ميلاد طبعا لعد ليش مااخذته وراح اگولج خبر حصري بس الج
مي شنو الخبر
ميلاد الدكتوره لاگيتلي عريس بامريكا ادعيلي تصير قسمتي واخذه
مي ئي ولج احسنلج من سامي الحواسم اذا وصلتي ل امريكا خابريني
ميلاد اخابرج من تركيا بعد شتريدين وانتي هدي العصبيه وعيشي حياتج ترى قيس حباب وانتي حبابه
تباوسنا ورجعت داخل البيت بوست عمي وعمتي وطلعت بسرعه
قيس
دخلت مي وميلاد للبيت وبعدين طلعت ميلاد
قيس مي هذي اخر مره تجيبين طاري ميلاد گدامي
اخذتها من رگبتها وگفتها بالباب وميلاد دتطلع
قيس شوفي زين طلعت راحت بعد مالها وجود انسيها صارت ماضي وانتي مرتي وام جهالي وهي لاشي لاشيء سمعتيني
مي وليش تبچي
قيس ردي عليه افتهمتي لو لا
مي افتهمت
دفعتها عني طلعت من البيت
اخذت سيارتي افتر بشوارع بغداد لحد العصر
اخذني طريقي لمقام خضر الياس
اتصلت بدعاء گتلها انطيني رقم ميلاد
دعاء مي تخبلت من طلعت وتتصور انتوا سوا
قيس انطيني الرقم
اخذت الرقم اتصلت بميلاد
ميلاد الووو
قيس ميلاد انتي رايحه ويمكن بعد مااشوفج وتشوفيني جاوبيني على سوال واحد وخليني ارتاح
ميلاد اسال
قيس احجيلي الصار انتي وسامي شنو بينكم ليش بعتيني علموده وليش متزوجتيه
ميلاد قيس انت هسه رجل اختي وهذي الاسئله مو من حقك تعرف اجابتها
قيس تتصورين بهذا ااجواب رحمتيني بالعكس موتيني ادري اني رجل اختج وراح ارجع الليله مثل كل ليله ادللها واحضنها واتغزل بيها واتصورها انتي
جاوبيني ليش صرت رجل اختج
ميلاد ماادري كلشي قسمه ونصيب وهذي قسمتنا ارضى بيها وعيش
قيس عايش لكن اقرب للموت تدرين اني وين هسه
ميلاد وين انت
قيس يم النهر مقام خضر الياس تتذكرين
تتذكرين دموعنا وشموعنا هنا
تعالي شوفيني دموعي انخلطت بمي النهر ودي اصرخ اسمج واعاتب النهر مو كنا لبعض مو گعدنا يمك وراسها على اجتافي وعبايتها تغطينا بيها سوى منو الخان ميلاد
ميلاد قيس الي دتسويه ميفيد ارجع لمرتك وعيش حياتك وافرح بالطفل الجاي وسميه فقار مي تحبك ترى
قيس وانتي ميلاد تحبيني الله يخليج جاوببني
ميلاد لا مااحبك مااحبك مااحبك سمعت افتهمت اني خنتك وعرفت غيرك واحد واثنين مااستاهلك لاتهجم بيتك علمودي وتترك مي الي تحبك وتغار عليك عمرك ضاع
مع السلامه لاتتصل بعد
أنت تقرأ
شاءت الاقدار
Romanceقصه حب بين شاب من اصل فلسطيني يعيش في العراق وبنت عمه تصدم بجريمه اغتصاب وصعوبات اخرى القصه حقيقيه وجديده وقد تكون اخر قصه انشرها وذلك لظروف خاصه قد تطول وقد تقصر
