شاءت الاقدار

شاءت الاقدار ١٧

#شاءت_الاقدار١٧
#زينب_الموسوي
قيس رتبت احوالنا هنا الحكومه انطتنا بيت وتصرف النا مساعدات ورعايه للاطفال
وقتي بين المستشفى وبين الامور الحياة الثانيه
اخذت اجازه سوق واشتريت سياره
فقار وعمر بين ميلاد وبيني
والدكتوره فكتوريا ملاك بشري حقيقي
وميلاد ماعندي كلمه توصفها غير اخت وانسانه اي انسان بالدنيا يفتخر تكون بت عمه
وگفت ويه اختها ومااشتكت يوم وكل هذا عدها طموح تكمل دراسه بس تخلص العمليات
ميلاد الحياة هنا تاخذك متعرف ليلك من صبحك
ويمكن هذا شعوري اني يوم الي ياخذون مني عينه اتعب وترتفع درجة حرارتي ارجع للبيت تعبانه اتولى رعاية الاطفال الي صار عمرهم سنه وشهر
قيس يساعدني حتى بالطبخ ويدرس لغه ويشتغل مع رجال امريكي بورشة سيارات عرفته عليه الدكتوره
الدكتوره فكتوريا فهمتني بس تخلص العمليات ارجع اشتغل وادرس
هي حاليا متقاعده متگدر على الشغل
مااصدك اليل يجي وانام
قيس ها ميلاد اليوم هم عندج عينه
ميلاد بلي بيش الساعه البارحه رجعت من المستشفى
قيس بحدود ١٢مي نامت ورجعت
ميلاد خليتلك عشى ليش مماكل
قيس تعبت مي بس الله يدري صار شهريين اي تحسن مافي وياخذون بهالعينات وماادري وين تروح اكولج اخاف دوله ديبعون دمج واحنا مندري ههههه
ميلاد ههههه مو على اساس دم نادر اشو كله قهر وضيم يجوز لگوه محروك ميفيد
قيس الله يساعدج وانشاالله تصير الظروف احسن ومي واني نعوضج
ميلاد انشاالله اگولك اني طبخت وكملت وراح اخذ الاطفال ويايه مي تريدهم
قيس اوكي روحي الله وياج منو يوصلج
ميلاد الدكتوره ودتعلمني اسوق
اقفل الباب من تطلع للشغل ها

بالسياره ويه الدكتوره
اليوم السنافر وياج
ميلاد مي تريد تشوفهم
الدكتوره عندي خبر موزين الج
ميلاد شكو من الصبح
الدكتوره الاطباء البارحه فهموني مي بادي عدها سرطان بالامعاء
ميلاد ياحبيبتي ياعيوني منين اجاها السرطان
الدكتوره السرطان بادي من اثر العمليه بتركيا مكتشفيه ومحاجين
ميلاد صخام بوجهي شراح نسوي دكتوره فدوه اتبرعلها اني بامعاء
الدكتوره هو انتي لازم ياخذون خلايا منج اكثر يمكن تعالجها
ميلاد قيس يدري
الدكتوره محد يدري اني وانتي والاطباء يريدون يناقشون الموضوع وياكم
ميلاد تموت اذا عرفت وقيس يتخبل ياربي شنو هالمصير ليش هيج تعذبت
الدكتوره ئي والله خطيه شابه زغيره البارحه من شفتها معرفتها
وصلنا على المستشفى شفت مي
ميلاد هلو ام فقار ذوله اطفالج شوفيهم
مي حبايبي فدوه كبروا وسمنوا يمكن ميتذكروني
ميلاد شلون ميتذكروج امهم يعرفوج من الريحه
مر النهار عليه احاول اخفي دمعتي گدام مي واني اشوفها تباوع لاطفالها بنظرة يائس
قيس
الاطباء گالوا ان مي عدها تحسن في النخاع والحركه
لكن خلايا السرطان منتشره سمعت الخبر انضربت براسي حتى باب المستشفى ماندليته انهزمت ماواجهت مي طلعت افتر بالشوارع تعتصر قلبي حسرات
والغربه تطبق بيديها على احلامي
الامل يحتضر داخلي
وزوجتي حبيبتي ام اطفالي تصارع الموت
رجعت للبيت دخلت ميلاد منتظرتني
قيس عرفتي الاخبار
ميلاد مي عرفت شسوت
قيس انهزمت ماشفتها بعد مااگدر اواجه صعب
ميلاد الله يساعدها هي احنا عايشين وبصحتنا
قيس اريد حل ميلاد الله يخليج مااريد يجي باجر واصحى لنفس الواقع الالم بيه مو بيها ميلاد تدرين شديصير بيه احبها عفت كولشي علمودها ومستعد انطي عمري الها