#الرحمه

البارت 4

#الرحمه

🌸🌸🌸رزان باسم 🌸🌸🌸

زهراء.... شفتها دخلت غرفتها و تركت الباب اشويه مفتوح.. استرقت النظر شفتها حطت اكل الها وكعدت تاكل..

  وره اشويه طلعت علاگه متروسه ادويه وما اعرف ايش.. اخذت علاجها ورجعت غسلت المواعين مالتها

ونشفتهم وخلتهن يمها.. الصراحة استغربت من تصرفها رغم ما جانت تاكل ويانه..

ولا يوم شفتها تاخذ علاج نادرا لان جانت محافظه على صحتها.. وحتى ذبلانه مو مثل قبل..

ظليت مستغربه عفتها ومشيت للمطبخ بس ظليت افكر بالموضوع.

كلت لازم كل يوم اتابعها واتابع تصرفاتها حتى اعرف ليش هيج تتصرف..

مرت الايام واني اشوف عمتي 24ساعه بغرفتها متطلع واحيانا الكاها تصلي وتظل هواي على السجاده..

زهراء... فد يوم كعدت الصبح سويت ريوك.. كلت خلي اشوف عمتي خطيه خاف تريد تتريك ويانه..

زهراء... دكيت الباب.!! ✊✊ ماكو رد
دخلت لكيتها تصلي   انتظرتها تخلص..
خلصت صلاه كتلها قبل الله..

ام كرار... منا ومنكم.. ها اكو شي صاير

زهراء... لا عمه بس ردتج تتريكين ويانه..

ام كرار... لا الف عافيه اني اكلت.. روحي تريكي..

زهراء... عمه شبيج انتي صايره متعجبيني اكو شي صاير ؟مريضه انتي؟ تره والله اني مثل بنتج بس كليلي ولا تقلقيني..

ام كرار... ليش انتي هم حبيتيني فد يوم حتى تسالين.. ؟

زهراء... مع الاسف عليج عمه والله انتي بحسبه امي صحيح مرات نتعارك وانضرب بس والله عمري ما كرهتج حاسبتج امي.

ام كرار... والله يا عمه ما اعرف شكلج! هسه روحي تريكي ومن تخلصين اريدج بموضوع..

زهراء... ماشي! رحت تريكت اني وامورة و خلصت سويت شغلي وخلصت كولشي ورحت نيمت امورة.. ورحت لعمتي.. دكيت الباب ✊✊

ام كرار... سمعت الباب يندك عرفتها زهراء.. كتلها ادخلي

زهراء.. سمحتلي ادخل.. دخلت كعدت يمها كتلها تفضلي عمه شردتي تحجين

ام كرار... راح احجي بس لا تقاطعيني.. شوفي يمه اني اسفه لان أذيتج هواي وسببتلج هواي مشاكل ويه رجلج وخليته يزوج عليج..

اتمنى تسامحيني بنتي محد دايم لذا اريد منج تسامحيني من كل كلبج خاف اموت وانتي ضايجه مني..

زهراء... لا تتاسفين عمه اني كتلج صحيح اضوج من تكومين تحجين عليه بس والله ما اكرهج اني حاسبتج مثل امي..

واذا على كرار اصلا كرار ميحبني ومن يوم ما جبت اميرة لحد هذا اليوم ما لزمها ولا حتى تقرب يمها ميحبها..