فاتوا ايام وبطلتنا لاهيه في بناء مستقبلها وتقرا لامتحاناتها وبطلنا مجووود الحلو الامافيش حد ماحباش يساند فيها ويشجع فيها ))
#بعد مرور اسبوعين
اليوم اخر يوم في الامتحانات
انا. "روحت من المدرسه نحس في جسمي مكسر وتعبااانه وراسي يوجع فيا وناقصه نوم ومخلطه عليا
بدلت حوايجي ونزلت فيها ماكله لين قريب تسممت وبعدها خشيت للدار درت تليفوني سايلنت ووصيت ماما ماتنوضنيش ..
#في مكان تاني
عند نور تكلم في ايه
ايه . مش عارفه جهاد بيطلع تو نشوفه
نور. حاولي بسرعه بري شوفيه ومادخليش فيك بتباتي والاء كملت اليوم نكسدوا مع بعض
ايه . باهي تو نشوفه يجيبنا
نور. باهي سلام
ايه. سلام
نور. "نتصل بيها الفرخه الاء ليا ساعه ماتردش مشيتلها "
نور. السلام عليكم
عميمه. اهلا وعليكم السلام
نور. كيف حالك اليوم عميمه
عميمه. الحمد لله
نور. عميمه الاء وين نتصل بيها ماتردش عليا
عميمه. والله من اول ماروحت خشت رقدت وانتي تعرفيها كان رقدت مش حتنوض
نور. اي غير البنات ابه وايلاف جايين بباتوا عندنا جيت بنقوللها
عميمه. خشي شوفيها
نور. "خشيت للدار لقيتها مظلمه فتحت الضي ولقيتها راقده "
نور. الاء الاء
انا.....
نور. الاء يافرخه نوضي
انا. هممم
نور. نوضي نبيك
انا. خيرك
نور. نوضي قبل بسرعه
انا. اووف اوفف ماتخليش حد يرقد
نور. نوضييي
انا. "نضت اتكيت "هاا
نور. جاوبتي
انا. اي
نور. ايه وايلاف بيجوا
انا. امتى
نور. توا كنت ننكلم في ايه قتلي تو نشوف جهاد
انا. بيقعدوا
نور. اي في حوشنا لكن
انا. في حوشكم لا لا تعالوا لحوشنا هني ناخذوا راحتنا اكتر بروحنا
نور. بري ملحي ديما في حوشكم اصلا حتى حوشنا فاضي ماما ماشيه لخالتي وبابا ماشي لصاحبه في الجبل واحمد في طرابلس وقصي وسامر مشوا مع ماما وامجد تو نلقوا وين نلصقوه
انا. هييييييي امجد يا حليلي
انا."جبدت تليفوني "14 مكالمه فائته من امجد
نور. ياحليلك
انا. نسيته مره وحده
نور. نوضي كلميه والحقيني
انا. "مشت نور واتصلت بامجد المره الاولى ماردش والتانيه ماردش والتالته في لخرها رد ..
امجد.ها شن تبي
انا. اسفه اسفه اسفه والله ماقصدي انت تعرف اني تعبانه وروحت رقدت طول
امجد. وين نصرفه اسفك هذا
انا. امجد حبيبي نعرف قلبك طيبت فمتكونش حقود هكي اخر مره
امجد. ع شان كلمة حبيبي بس والله والله لو تتكرر تشوفي شي تاني
انا. باهي خلاص اسفه اخر مره وتوا باي
امجد. وين وين
انا. نور تستنى فيا نعوضهالك هيا سلام "صكرت"
امجد."ماتخليش الوحد حتى يكمل كلامه "
انا. "ههههه ضحكت عليه نعرفه طيوب نضت جهزت روحي ومشيت لنور
نور . سااعه سااعه
انا. اللطف هما كلهم 5 دقائق خيرك
نور. اسمعي بتستعملي طرقك الخاصه
انا. في شني
نور. تكلمي حبيب القلب وتعطيه كلمات حلوات باش يمشي يجيبلنا عشاء وحاجات نسهروا عليها
انا. ههههه من عيوني
نور. اسمعي شوفيه في داره
انا. والله والله
نور. تي بري ناديه تو يطلعلك
انا. اووووف منك
نور. امشي جدري وتنفخ في وجهي تاني
انا. "مشيت طقيت ع الباب طقتين سمعته قال خش فتحت الباب شويه ودخلت راسي "
انا. احممم
امجد. لا مستحيل مش مصدق
انا. لا صدق
امجد. "قعد يمسح في عيونه ووجه مع ابتسامه عريضه "هههههه اهلا اهلا
انا. شن جوك
امجد. مستااااحش ومراااايف ونحبببب ومكبدددد
انا. الله هذا كله ومن تعيسة الحظ
امجد. وحده مشناها من طيحه
انا. اي وشن تاني
امجد. نحس في ربي يعاقب فيا بيها
انا. اي وبعدين
امجد. هلللبا كلام مانبيش نوجعلك راسك
انا. لا لا تي عااادي وجعك رااحه
امجد. ااااه يابنت عمي شن بنقولك
انا. اها وبنت عمي تاني اي كمل
امجد. فوق من هذا كله ماحصلتها الا بالسيف وهيا شايفه روحها عليا
انا. يا خساره باهي
امجد . دا انتي ماسمعتي شي
انا. الله سخفتني ولد عمي ياسر معاش نبي نسمع وجعتلي قلبي
امجد. ههههههههههههه
انا. لاباس ان شاء الله
امجد. منظرك ابداع
انا. عاش تكلمني مش شينك طيحه وشايفه روحي
امجد. اووو "ناض جاني كنت واقفه برا الباب بشويه "حبيبتي زعلت
انا. تبي تراضيني "وشبحتله ع جنب "
امجد. ياساتر يارب نوتيلا لا فكيني ماخاطريش نطلع
انا. لا لا مش نوتيلا برا جيبلنا عشي وجبلنا حاجات نسهروا عليها بناات عمتي جايات وبسرعه توا
امجد. قعدت النوتيلا ماتبيش
انا. هههه انت وضميرك
امجد. باهي باهي
انا. "قعمزت مع نور في الصاله "
نور. عاام
انا. شن واجعك نهدرز شويه
نور . نزل الحب فجأة
انا. المهم درت فايده
نور. "شبحتلي ع جنب بالللطف ان شاء الله "
شويه وجو البنات قعدنا نهدرزوا وركبنا لدار نور فوق باش ناخذوا راحتنا اكتر شويه ورن تليفوني كلهم سكتوا وشافولي لقيته امجد قمت راسي ضحكت ضحكه صفراء
ايه. منيي
ايلاف. خيره وجهك بدي اصفر
انا. "رجع يرن تاني "الو
امجد.. حبيبي انزلي خوذي الحاجات
انا. الحمد لله
امجد . خيرها هاذي
انا. ااه باهي الحمد لله كويسه
اامجد. وووه حصلتي نتخايل في منظرك وكيف يشوفولك
انا. مافيش تغطيه شويه ننزل تحت "صكرت"
ايه. مني
انا"قلبي والله كان عرفت ايه لما توريني "حلومه خالتي
نور . اي وخيرك ترعشي
انا. "الكلبه نور تعرف انه امجد "تستنى فيا خللي ننزل نشوفها
ايه . مااقتنعتش الصراحه
انا. "طنشتها ونزلت مستحيل تصدق حتقعد وراي لين تعرف نزلت لقيته طالع ومخللي الحاجات في المطبخ وكان في فازو نوتيلا عليه ورقه
"لعيونك الحلوات "وشويه ويخشوا
ايه. شن اديىري
انا. "بنموت بجلطه منهم دسيت الورقه وراي "وصينا امجد ع حاجات ولقيته جايبهم
ايه. وشن دسيتي وراك
انا. معليشي في تحقيق اني والا شني
ايه. لا مش في تحقيق لكن في حاجه وراك وماتبيناش نعرفوا واني متأكده ان الفرخه نور تعرف
انا. لا....."كيف جيت بنتكلم ااه الصدمه شلت كل خلايا جسمي "
....
يتبع للحلقه القادمه
نحبكممم هللبات بلييز نبي دعم شويه وتعليقات طوال مش يجنن يهببلل وبس.. الخ 😢🙈 وربي لا يحرمني من طلتكم
كاتبة الروايه لوليانا 💋💜
أنت تقرأ
حب بطعم النوتيلا
Randomرواية ليبية بقلمي الكاتبة الاء عبد الستار فتاة لا تؤمن بالحب وفجأة يظهر لها الهيام بذاته واسرها .. في كل مرة يهمس لها ب احبك يكاد قلبها ان يتوقف ظلت اسيرة عشقه .. حتى نهايتها ...
