عشقته حتى اذلني

سارة

الاب:سارة
الام:ساررررة!!!!
الاخوات:سسسسااااررررة!!!!!
سارة:شكو شبيكم دوختوا راسي ما تخلون احد ياخذ راحته ويغير ملابسه مثل ما يريد كلها تصيح عبالك بس اني اللي اتأخر
احمد:لا ابد احنا تأخرنا العفو ست سارة متكولين وراكم طريق ٥ ساعات حتى توصلون وبعدين المن هالكشخه كلها هو انتي اول ساعه بالسياره راح تسويلنا حفله وتضلين الطريق كله متخربطه وتردين من راسج
سارة:واذا يعني طريق طويل وبعيد يعني ما اتأنق هو اني اطلع للحديقه اغير ملابسي
-ديلا عيني الفاشونيستا مالتنا فضيها بابا صارله ساعه ينتظرجن انت وخواتج
-اووي فدوة صاير تكول بابا هاي من شوكت دروح اثردلك بلم ثريد واضربه انت مال بابا خلي الكلمات اللطيفه لاهلها انت ما تلوكلك هههههه ابو حلك
كام احمد من مكانه يركض وراي واني اركض بالطابق الثاني مال بيتنا نزلنا الدرج بكل سرعتنا وضحكتنا واصلة لسابع جار باخر درجه وطلع بابا من غرفته اللي بنهاية الدرج وطشششش
انلزكت بي
-بابا!!!اسفه والله شوف احمد بس يركض وراي
-احمد اني مو كايل لا تسوي هالسوالف ويه خواتك بابا يتأذون وهاي بعدها زعطوطه لا تحط عقلك وياها

-بابااا!!! هاي شنو زعلت
-لا تزعلين يلا زغيرتنا روحي شوفي خواتج كملوا استعجليهم ويلا للسياره
احمد: هههه هيج احسن الج يلا زعطوطتنا روحي
عيبت اله ومشيت لغرفة اخواتي الكبار لكيتهن مكملات وهم حصلت المقسوم من الرزاله قبل لا نطلع من البيت لان تأخرت هوايه هههه هو اني وين تأخرت بس بدلت اربع مرات ومكيجت وغسلت مرتين ولحد ما اختاريت حذائي وجنطتي ساعتين

طلعت لكيت بابا واحمد يتجادلون لان احمد معاند ما يرضى يروح ويانا وبابا يرزل بي وهو يريد يروح ويه امي  لاهلها طبعا واضح سبب روحته يريد يشوف هديل الخبله اني ادري شعاجبهم بيها هو وامي جنها زيتونة زوجة باباي طويله وضعيفه كلش شويه ويشدولها مغذي اوووي واني شعليه بيهم الله يهني سعيد بسعيده بس والله هديل خبيثة راح تغير احمد علينا
صعدت بالسياره وسديت الباب انتظرهم وهالمره همه تأخروا وطلعوا وحتى احمد وياهم الظاهر ارادة البابا فوق قانون الماما هههه امي صعدت كالبه وجهها وتدردم كعادتها من يوم عرفت بابا تصالح ويه جدي ويريد يشوفنا هي عاندت متروح ولذلك حدها ويانا لحد ما نوصل بيت جدي اهلها يعني نذبها يمهم ونطلع همزين شكد تحجي الله يساعدك بابا والله كنت اسولف بيني وبين نفسي وكاعده بالسيارة بالخانه الاخيرة وحدي لان اني اصغرهم نسيت اسولف الكم عني اني ساره صغيرة العائله او بالاحرى همه يشوفوني صغيره اني عمري ١٨ سنه واصغر اخواني خواتي مودة الجبيره عمرها ٢٦هاي المعقدة بالبيت والثانيه اسمها غدير عمرها٢٤هاي شويه احسن من مودة بس تقريبا هنه يتشابهن وقريبات لبعضهن كلش واحمد ٢١اخونا المخبل لا كذب هذا العزيز عند الكل من امي وهي نازله كلها تخدمه واني الاخيره بزر الكعده بابا مدللني دلال بنيه بالروضه مرات اضوج ومرات افرح لان يحبني يكولون اني ام السان بس اني اشوف نفسي طبيعيه وهمه اللي كلش معقدين بس احمد يتصرف طبيعي بيهم وصلنا بيت جدي ابو ماما همزين راح تنزل راسنا صدع من كثر الزن
- الله يساعدك ابو احمد شلون كضيت عمرك
كلت العباره واني دا اغير مكاني من الخانه الخلفيه للكرسي الامامي بمكان امي كعدت حصلت كفخه معدله على راسي هههه
ماما معصبه كانت عدها مشاكل قديمه ويه بيت جدو وهلى قولها بيبيتي كانت تلح وياها وصايرة مشكله جبيرة بينهن وعماتي ملتمات عليها ضارباتها الحق يقال لو اني بمكانهن جنت اسوي نفس الشي لان اعرفها لو حجت ما تسكت بعد وهي من هذاك اليوم رفضت ترجع لهناك وشرطها على بابا يجي وياها لبغداد ويعوف عائلته وناسه وجدي زعلان عليه من هذاك اليوم اني كنت لساني ما مولودة بس اخواتي الكبار يتذكرون بيت جدي شويه اني
همه ساكنين بوحدة من محافظات الجنوب واليوم احنا معزومين هناك لان بابا قبل فتره راح واستسمح جدي وتراضوا وهسه عازمينا على عرس بنت عمنا لابن عم اخر اووو شلون دوخه هاي كلها ماخذه اقارب بس امي غريبه بيهم وطبعا احنا خلفة الغريبه وعلى محبة امنا راح يحبونا يعني احتمال ننسحل ههههه
بابا ضل كل شويه يشدد علينا ما يطلع صوتنا وما نمشي بدون اذن ونلتزم كلش حتى بلبسنا لا شنو لبسنا حتى بالنفس خوفني منهم اكثر صرت اباوع لملابسي اني لابسه بنطرون بوري وقميص شويه طويل هاي استر شي عندي
ببداية الطريق واني بديت اتذمر وبابا يضحك عليه خواتي ساكتات مثل المقبره بالضبط هيج هدوئهن ممل واحمد حاط السماعات باذنه وصوت الاغاني تطلع من السياره من كثر ما عالي راح يطرش لما نوصل وبابا يسوق واني الوب اموت من السياره والمسافات البعيده بعدنا ما طلعنا بغداد اني بديت كل شويه اطلب انزل من السياره ومن يتلكانا ازدحام افتح الشباك واضل اسحب هوا اختنك من السياره وهاي حاله ملازمه الي من طفولتي
ضليت كل شويه لو انزل اغسل وجهي لو ارد من راسي وخواتي يتضجورون وابويه حار بيه واحمد ما يبطل نصبه كل شويه تجيني نوبه وارتاح شويه وارجع وتالي من التعب والنحول غفيت وما حسيت الا لما وصلنا وبابا كعدني خواتي نازلات واحمد واني بالسياره وحدي نزلت هوايه عالم ادري عمامي ٢ والثالث شهيد واولادهم هذوله البقيه منين البيت هوسه ناس كبار وصغار ابويه بعد ما صحيت عافني وراح يكمل سلامه اني نزلت اترنح دايخه ما ادري وين اروح محد انتبه عليه خواتي اشوفهم راحوا بعيد بغير جهة واني واكفه بمكاني اتقرب عليه شاب من الواكفين ووكف يمي ما يباوع الي وجهه عليهم ويحاجيني
-يلا امشي فوتي جوة خواتج راحوا الحكيهم
ضليت صافنه عليه هذا وياي يحجي هو ماكو غيري بس شبي ما يباوع الي ويحجي مثل الناس بين هاي اللحظات رجع بابا واخذني من ايدي قربني يمهم ويعرفهم عليه صح اني جريئة وما اخاف بس يبقى طبع البنيه بيه حياء بابا عرفني لجدي و لعمامي عمي ابو نذير وعمي خالد بوستهم عمي ابو نذير ضل يسولف وكلامه ما مترابط واني بس ابتسم مضطرة اجامله اخر شي اجا اول صوت سمعته هنا نفسه الشاب اللي حاير بس يريدني اروح للبيت جوه كلهم بالمضبف كملوا يلا الناس تعبانين خل يرتاحون
والحمد للله راحوا كلهم واني اتمشيت للبيت من بعيد البيت يبن جبير كلش وممشى كله ياس من الجهتين طويل يودي للبيت تعبت لما وصلت للباب الداخليه شنو هاي هذوله من الكراج للبيت هلكد بعيد اووف تعبت حسيت احد يمشي ورايه التفتت هذا نفسه الشاب تعداني وفات حتى بدون ما يباوع الي ادري هو واحد من ولد عمي الجبير ابو خضير بس هذا منو بيهم اوو عود على اساس اعرفهم هو اني حتى ما اعرف احد بالله هذني خواتي شلون عافوني ما اعتب عليهن قابل مودة خانم شيجي منها غير المغثة دومها هيج تعاملني ولا كأني اختهن وصلت للباب طلعت بنيه حلوة كلش شامره على راسها شال لابسه كلابيه مال بيت كلش بسيطه ضحكت على لبسها شلونه اني ما اعرف البس هيج ابد تقدمت وهي تبتسم وابتسامتها حلوة ومريحه وجهها حلو بوستني ورحبت بيه
-هلو اكيد انت سارة صارلي ساعه اسأل باخواتج ويكولون بره تعالي اني ريم بنت عمج ابو خضير
-اهلا وسهلا مو زين لكيت احد يستقبلني حتى خواتي عافوني واني دايخه وهذا اللي فات حتى ما دلاني اجيت اسأله بس ما يسوي واهس هذا شبي هيج ضايج متعارك ويه احد  لو شنو
-هههه معليج بيه تعالي فوتي جوة
عبرت وراها البيت كلش جبير طابقين الصاله كلش كلش جبيرة واثاثها مميز والوان جميله تلزم عدد جبير جانوا الكاعدين ضايعين بيها جدتي مره تعبانه وعمتي ام خضير وشابات اثنين بنات عمي ابو نذير وامهم واحنا وريم بعدين طلعت زوجة خضير من المطبخ واجوي عماتي اربعه كانوا يحضرون اكل كلهم سلمت عليهم كعدت عيني على هالبيت الجبير شنو هاي معقوله هاي كلها صاله باقي البيت شلون

الجدة:يمه الفرح دخل بيتنا عكب سنين زعل تعالن حبوبه اكعدن جاي ليش مبعدات عني اريد املي شوفي من بنواتنا
مودة ساكته كالعاده غدير لاول مره تتجاوز مودة وتحكمها وكامت كعدت يم بيبي طبعا هي نضرها ضعيف وكل شويه تسأل عمتي سهيله حلوات البنوات ويشبهون امهن لو ابوهن
طبعا عمتي سهيلة كاعده يمها وتكلها اي ولا وم تحجي اي كلمه ثانيه وعبالك كاعدين على رمشها كثر ما ضايجه هههه
كل عمري من اسوي وكاحه لو اضوج امي تصيحلي سهيلة واخيرا شفتها اللي يشبهوني بيها واخيرا التقينا بشنو اشبهها ما ادري بس لازم اعرف اشوفها هي الكل بالكل والبيت كله يسألها اذا مو عن شغله بالبيت يسألوها عن رايها شخصيتها بارزة عكس خواتها هي اللي سببت مشكله ويه امي وهي السبب بابعادنا
تغدينا بيومها اللكمه كوه تنزل لان بس النسوان ويانا وكلها صافنه علينا اني احاول اكون هادئة
شويه وخلص الغدا وكل الموجودين راحوا بقينا احنا وجدتي وعائلة عمي ابو خضير وهنا دخلوا الزلم من المضيف للبيت شفت بابا واحمد شكد ممكن الانسان يسيطر على نفسه هذا سؤال دائما اساله لنفسي لان اني اتصنعت الهدوء شكم ساعه حسيت حياتي ممله وما بيها طعم
بس شفت بابا ركضت عليه استقبلته وبدون توقف اسأله سؤال وره الثاني لحد ما انتبهت واحد وياه شويه ويكتلني بس يابه شلون عيون ونضره شريرة فديتها اني  يشبه الاشرار اليطلعون بافلام كارتون هههه ما اعرف ليش دائما عيونهم حلوة
سكتت وهو بس يخزر بيه واني درت نفسي ورجعت هذوله شبيهم ويانا معقولة يكرهونا لهالدرجة بس جدتي وريم يضحكون ويانا والباقين كلها خازرتنا شلوو راح نكضي اسبوع هنا ما ادري وينج ماما وتشوفيهم من هاي ما تريدنا نجي لهنا