عشقته حتى اذلني

خطوبة

غدير:
بعد ما رجعنا اول يوم من البستان كنت امشي وره اخواتي وشويه بعيده عنهن لمحت من بعيد ولد يمشون باتجاهنا واني كنت بعيده عنهم سرعت مشيتي لان اخاف وطبعي خجولة حاولت الحك بيهن بس كانوا بعيدات ووصلوا الولد قريب يمي ميزت ولد عمي جعفر ونذير وواحد ثالث ما اعرفه انتبهت على جعفر ضاج ويتأفف ونذير وهذاك الثاني عادي فاتوا من يمي دنكت اريد اتجاوزهم بسرعه بس جعفر صار مقابيلي وحجه بنتر واسلوب ما متعودة عليه
-لج انت ليش هنا شتسوين وحدج بالبستان بعد ما رديت انهد يحجي ...يلا استعجلي مشيتج والحكيهن ودير بالج اشوفج طالعه تره اذب قهري بيج فاهمه هالنوب ما لكوا بس انت يذبونج براسي شبيج صفنتي انت غبيه لو ما تسمعين يلا بسرعه كاعدة تتمندلين براحتج وحدج يلا ولي فضيها لا تضلين صافنه

كل هذا واني هم ضليت صافنه بوجهه شنو ذابيني براسه وشنو هالحجي عيوني غوركت وركضت للبيت هذا شبي مخبل اكيد ومنو كال اني اقبل بي
وصلت لاخواتي مودة انتبهت الي واجتني تركض وشافت جعفر من بعيد عرفت غثني بالكلام لان هذا طبعه جعفر كان خاطب ويحب خطيبته يموت عليها وقبل سنه ميته بحادث سيارة وهو حالته النفسيه تعبانه كلش اهله يكولون عنه مخبل وحتى الناس اللي تعرفهم يكولون مخبل هو صح يشتغل وسبع وكل شي عنده كامل واحلى واحد باولاد عمي ابو خضير او الاحلى بين كل شباب العشيرة بس عنده مشاكل نفسيه قويه كان والدي دائما يشكي بحالته وشلون مأذي اهله وكل الي حواليه خلاني ارجف من سمعت بمخطط جدي واهل بابا

اجتي مودة حضنتني واني ميته من البجي شنو كلامه وشنو معناه ابويه معقوله يقبل بهالكلام وشنو ينطيني لجعفر وهذوله جدي وجدتي شلون يرضوها واذا يحبون والدي صدك شلون يقبلون باذيته ببناته اخذتني مودة للبيت وهي تتعذر انه اني وكعت على رجلي وتوجعني مودة بيها محنة ام وعطف اب مو بس اخت صعدتني وغسلت الي وجهي واني ميته بالبجي وهي بس تسكت بيه وترفع معنوياتي وتريد تعرف اللي صار من سولفت الها يجت عليه ونزلت لوالدي وصعدت عيونها وارمه من البجي
متعاركه ويه عمتي سهيلة وويه جدتنا وبابا مسكتها وشويه وصعد بابا وطلع اخواتي وبقينا اني وهو وحدنا
-بنتي غدير انتي اعقل وحده ببناتي والاكثر هدوء والاكثر رقه وادري بيج عندج قلب ما شايلته وحده
-بابا كلام جعفر صدك

-بنتي احنا عائلة ومثل ما انت تحبين اخوانج اني احب اهلي افهميني ابن عمج محتاج مره عاقله تطلعه من اللي يعاني منه ادريج عاقله والكلام اللي راح اكوله اريدج تستوعبيه جدج شرطه الوحيد بالصلح جان ازوج بنيه من بناتي لولد عمها واخذ منهم مره لاحمد وحتى جدج بهاي يريد القرب بالعائلة ويكول اللي فات ما يمسحه وما يحنن قلب عائلتك علينا غير النسب
-وما لكيت غير هذا المخبل منهم تنطيني اله
-عيب بنتي اولا هو مو مخبل واصلا ما يشكي من شي بس مرات يتعب ومحتاج ينسى حتى تعدي ازمته
-ومنو كال اني اكدر اعيش وياه بابا ما شفته اليوم شلون يحجي وياي
-ميخالف حبيبتي هو ابن عمج واني متأكد منه ما راح يأذيج واصلا هو ما يأذي ومن يتعب يأذي نفسه ما يأذي اللي حواليه يا بنتي والله تكسبين اجرين بمكان الواحد اذا وافقتي الاول ترجعين العائله كلها مثل ما كانت والثاني تساعدين هالشاب واني متأكد منكم ترهمون لبعض واني اصلا رشحتج دون عن خواتج لان انت المناسبه اله
-بابا يعني تجبرني
-لا ابد انتظرج توافقين
-لعد اني ما موافقه
-خلص اذا هذا ردج اني ما اكدر احجي ولا اعترض واللي تحبيه يصير
طلع بابا بس حسيت بي مو مرتاح ومو راضي عن رفضي بس مستحيل اعيش ويه شخص مريض شنو ناقصني اني واخذه اشو حلوة وكل اللي يشوفوني يكولون عني حلوة اووف لو مو هالوزن الزايد جان صرت احلى اخواتي وما فكروا يذبوني هيج

فات يومين وصار العرس وتونسنا بس كل اللي بالبيت يباوعولنا بحقد والاكثر انتبهت لجدي وجدتي منزعجين وبالطالعه والنازله يحجون على والدي كان مقرر نبقى اسبوع ٤ ايام ووالدي كال يلا نرجع منا عرفت بابا متعارك واعرف السبب اني صعدت اجمع بملابسي بجنطتي طبعا سارة يمي وبس تحجي داخ راسي من وراها ما تسكت تحجي عالكل واكثر واحد بالبيت تحجي عليه مصعب ابن عمي الثالث تموت منه اما الباقين مرتضى ومجتبى كلش عادي وياهم واشوفها منطلقه ويه البيت كله بس مصعب صارت تصيحله معصب وريم تضحك وتسكتها تكلها والله لو يسمعنا نصنف على اسمه الا يندمنا ويضحكن
بيوم السفر كل البيت يباوع الي بنضرة عتب وريم ما كدرت تسكت بس نزلت سارة كامت تحجي
-غدير انت ليش هيج سويتي يعني ما صدكنا عمي ابو احمد رجع يواصلنا وشفناكم ليش راح تكطعين صلة الرحم
-واني شلي دخل صلة الرحم مقطوعة من زمان وانتوا السبب ليش هسه تذبوها براسي بعدين عمتج سهيله خوش تريد صلة الرحم وفرضت علينا جعفر
-غدير يعني انت مستنكفه توافقين على جعفر وما اعرف شنو اللي وصلكم من افكار بس جعفر احسن واحد باخواني واحنهم وتمنيت لو توافقين بس الظاهر زوجة عمي ابو نذير راح تخلص بناتها براسنا سمعن انت رفضتي نطت من يمها وكالت اخذوا وحده من بناتي وهي بناتها وحدتهن مثل حية التبن تلدغ وتضم راسها جنت اتمنى انت بمكانهن
-ماكو نصيب وبالعافيه عليهن اني اخوج ما يريدني وكالها بلسانه واني الما يشتريني بغلا ما اشتريه حتى لو برخيص
-وانت تمشين بحجيه والله هو يجوز عصب عليج بس تره هو كلش خوش رجال مو لان اخويه امدح بي لا والله بس هاي بشهادة كل اللي يعرفوه وانت لو وافقتي راح تجبرين بخاطرنا كلنا وتكسرين عيون وتسدين حلوك تحجي عنه
سكتت ما جاوبتها وسحلت جنطتي اريد اطلع من الغرفه ثقيله وهاي ريم بس تحجي واني ضايجه وصلت الدرج يا ربي شلون انزلها صفنت لحظات لو اشمر ريم لو اشمر الجنطه اثنينهن راح يكولون مخبله يلا بلكت يبطلون مني وما يريدوني لابنهم المخبل قربت ايدي للجنطه سبقتني ايد رجال الها باوعت بوجهه جعفر عيونه الحلوة لونهم عسلي ووجهه الحنطي وملامحه الشرقيه يمكن تجذب اي مرأة بس اكيد مو اني وخصوصا بعد كلامه وياي شالها لجنطتي وسوه الدرج كمزتين واني كوه سحلتها من الباب لهنا نزل وعافها الي بنهاية الدرج وراح بدون حتى ما يلتفت الي
نزلت وراه واخذت الجنطه للسيارة واحمد يصعد بيهن ويحجي علينا شكد جايبين غراض وخضير واكف يمه يتشاقى الوحيد من اخوانه اللي بعيد كل البعد عن العصبيه صعدنا الجنط وكعدنا ننتظر بابا اجا وحركت سيارتنا واول مره بابا تنزل دموعه لان جدي وجدتي ما قبلوا يودعوه واني كنت السبب ورغم مساندة اخواني الي بالكلام وكلهم رحبوا بقراري بس شفت بعيونهم عتب على دموع بابا بعدها ما مشت السياره حجيت ما تحملت وتحديت خوفي وخجلي لاول مره
-بابا اوكف
-شنو بنتي نسيتي شي
-لا بابا اني موافقه اتزوج اللي تختاره انت وتشوفه مناسب
احمد اندار وكام يرزل بيه ومودة تكرص بايدي قوي وسارة الصدمة هي اقرب وصف لوصف ملامحها
وبابا يكلي انت مو مجبره واني اؤكد موافقتي اكثر من مره هنا اجا الشيخ خضير لان شافنا واكفين ما نمشي سأل والدي شنو سبب تأخرنا كاله والدي الموضوع واني من يمي حجيت وكتله موافقه ما اعرف منين جبت الجرأة ولا ليش هيج سويت يمكن القسمه والنصيب همه اللي خلوني احجي بحيث يمكن لو بالحلم واشوف نفسي بهاي الجرأة ما اصدك حلمي واكول هاي مو اني
-----
ها حبايب هذا بارت مفاجئ
واطلب منكم الدعاء تره اني محتاجته كلش ويكولون دعوة اربعين غريب مستجابة