عشقته حتى اذلني

ترابط

----------

غدير :
مرت ايام على رجوعنا من بيت جدي وامي ما قصرت وياي لما عرفت اللي صار اول يوم جانت تشد راسها وتولول وتلطم ثاني يوم شاددتني اصعد وانزل ترزلني حسيت اني مسويه جريمه تتعارك ويايه شوط ويه ابويه شوط صرت اتجنب الطلعه من غرفتي واخاف اشوفها وما انزل الا اسمع صوت بابا جاي وبالبيت هي كانت موضفه حتى اجازة اخذت وكل يوم تصعدلي تريدني اتراجع بقراري بس الموضوع انتهى ويمكن انسعد ويه جعفر شكو بي اهله كلهم يكولون زين وياهم معقوله يأذيني ما حبيته ولا عندي تجاهها ذرة مشاعر بس ابن عمي واختيار ابويه واني مو صغيرة هذا عمر الفتاة للزواج كملت كليتي شنو انتظر بعد

اخواتي ما اعرف شبيهن ساره هي اصلا عقلها ما يتناسب ويانا وعبالك من غير عالم بس هاي مودة شكد جنا قريبات وتنصحني من رجعنا عافتني وابتعدت احس بيها شي غريب وما اعرف شنو يمكن زعلت مني لان وافقت على جعفر او يمكن لان اني اصغر منها وراح اتزوج قبلها بس والله هي اختي واحلى مني واتمنالها الخير بكل لحضه
باليوم الرابع يأست امي مني وبطلت تزن وبدت تتبع غير اسلوب تحاول تستعطف بابا اللي يموت عليها واستخدمت اساليبها اللي اتعودنا عليها اضحك من اشوفها هيج

ترجع تذكره بالمشكلة القديمه وشلون اذوها اهله وتكله يأذون بنتي ومن هالسوالف مرات احس امي مسويه سحر اله بحيث هو بس تستخدم اسلوبها هذا ابويه اذا جان نار يصير رماد ويطفى كبل اخذها لغرفتهم والله اعلم شصار بعد ههههه ويكلك ليش ندور زواج اذا همه ما يستحون بس عقب هاي الليله الصدمة كعدت امي تحضر لزواجي وتحير شلون تجهز البيت وشنو تسوي حتى تستقبل المشيه ضلينا اني واخواتي باهتات عليها وعلى تصرفاتها صارلها كومه كالبتها مناحه ولطم معترضه وتبجي ومو قابله بموضوع الخطبه وبس سمعت بنهاية الاسبوع يجون انقلبت ١٨٠ درجه وصار العكس وابويه اللي قنعها الظاهر مو هي

تركض وتنظف وتسوي اكلات وحلويات وتضم اما اني جنت الضحيه بهاي الايام امي ويه تحضيراتها لخطوبتي رادت تحضرني ويا ريتها لو ناسيتني حرمتني من الاكل اسبوع كامل واني كلش اكل هوايه بحيث ردت اتخبل من وراها عيشتني عالشابورة التوست اليابس والجاي الاخضر من يوم الاثنين ليوم الجمعه اللي هو يوم خطوبتي واني هذا اكلي وبس ومن اجوع كلش وتنقهر تنطيني تفاحه ههههه اتوسل بيها اكل تريد تكتلني البيت كله دخل استنفار خواتي النهار كله يكربون مره يسوون اكل ومره حلويات واني بس اطلع من غرفتي ترجعني ركض حتى لا اضعف كدام الاكل واكل

مرت الايام وهي جهزت كل شي امي من النوع النادرة وسباعية وما يعصى عليها شي جهزت بيتنا من كل شي وحتى الكوشه حضرتها هي اخواني وابويه ينصبون عليها من تصعد على حافة الكرسي حتى تسويلي الزينه والكوشه يمكن اقرب وصف الها شباب دائم تبين بعمر ٣٠ وهي عمرها بالخمسينات جسمها رشيق وطويله جدا بس سارة طلعت عليها اني شايله ملامحها بس جسم بابا يمكن وهذا اللي يقهر ومودة هم حلوة بس مو بطول سارة جميله امنا جدا جدا مرات احسدها واحسد ابويه عليها هالحلوة هلكد تحبه وهو يشبه دامبي ههه لا شويه احلى من دامبي بس والدي احسن رجل بالدنيا واوفى واروع رجل واللي اتمناه جعفر يطلع مثله حتى لو قليل راضيه ما يهمني شلونه شكله ولا لان هو حلو وملامحه تموت لا واله يهمني طبعه اريد نسخه من والدي