عشقته حتى اذلني

متيمان في العشق

مودة
كانت خطوبة غدير والايام الي بعدها كلش متعبه بالنسبه الي لان امي انشغلت وياها والبيت وادارته كلها الي تعبت وفكري دائما مشدود ردنا يكون كل شي باكمل وجه ونفرح غدير اللي ما كدرت تحس بفرحه وهذا جعفر ما سهلها عليها

رحنا عدهم وبقينا من بداية الاسبوع لحد يوم الحنه الصبح ببيتهم اني بهاي الايام احبس روحي بالغرفه وانزل على كد الوجبات حتى لا التقي بخضير صارلي فيلم رعب اني اللي بعمري ما خايفه خضير خلاني اتختل

وبيوم كلت مو اني اللي طبعي انهزم واضم نفسي هو غلطان اني ما مسويه شي غلط نزلت بعد العشاء كانوا مجتمعين كلهم وضحك وسوالف كعدت وسهرت وياهم كالعاده عمتي سهيلة وزوجة خضير علياء ماكو خلصت السهرة وكل واحد راح لغرفته ضلينا اني وسارة وغدير وريم كاعدات كرزات وجبس وحبشكلات لطيفه اخذنا الواهس وصارت السهرة مطولة واحنا ضحك وسوالف اول وحدة انسحبت غدير لان جعفر اجا ومبين انزعج من كعدتنا طفرت وراحت كمت صعدت وراها اشوفها تلكاني خضير عالدرج اريد ارجع ما ترهم صعدت من يمه بدون كلام هو ما سوى شي بس كلمات قليله بصوت مسموع مو ناصي بس اخذت حيلي من خوفي لا احد سمعها ردت اكوم اكمز
-اي عفيه ضلي بالغرفه لا تطلعين اول وتالي تصيرين الي ويومها وين تنهزمين مني روحي ارجعي هناك لغرفتج وعدي ايام على اصابعج وتصيرين مرة الشيخ

نزلت اركض وراه نسيت غدير ونسيت نفسي هذا يريد يفضح نفسه ويفضحني كمت احجي بصوت ناصي
-خضير شنو بعقلك
-كل خير
-شنو كل خير كل عقلك انت
-وانت شايفتني اتشاقى وياج يعني
-اسمعني باجر نحجي بالموضوع هسه اخاف احد ينتبه لو يسمعنا باجر انتظرك بالبستان يم النهر بنفس المكان
ابتسم بوجهي
-انت كدها وتتواعدين لو بس لسان
-شوف اني اريد انهي الموضوع ونسده وباجر نتفاهم
-واني حاضر للي تأمرين بي بس كون من صدك تجين مو بس حجي لسان ونتفق على تفاصيل زواجنا
-خضير كافي عاد
-هو شنو اللي كافي يا عيونه لخضير

هزيت راسي بعدم رضا وكملت دربي هذا مو معقول ومو طبيعي الصدمه الاكبر انداريت لكيت مصعب بوجهي نازل ومبتسم يا ربي بس لا يكون سمعنا شسوي وشلون هذا ابن عمتي سهيلة واكيد سالفتنا راح توصلها اجيت اتخبل من التفكير اللي اكلني
دخلت للغرفة بمكان ما اهدئ اختي ردت احد يساعدني حتي اهدا جسمي يرجف كله رحت لفراشي بسرعه اتغطيت اريد اغفى اسمع غدير تبجي وانعصر قلبي عليها بس ما بيدي وياها شي انتظرت الصبح مو لان احب وهاي الخرابيط اريد اخلص نفسي وبس طلع الصبح ركضت للنهر اشوفه لخضير حضرت كل قوتي وبرودي ورزانتي المعهودة حتى اكدر ارده

وصلت هو سابقني ابتسم من شافني
-يا ربي شنو هالصبح اللي ببدايته اشوف هيج خلقه اروح فدوة لهالوجه
-خضيركتلك كافي شنو شبيك تخبلت
-حجايتج هاي  تدفعين عليها بس مو هسه محد كايل للشيخ هالكلمه راح افوتها هالمره