خطوات نحو الجحيم

البارت الحادي عشر

#خطوات_نحو_الجحيم

////بقلم الكاتبه زينب ماجد////

الحلقه_11

قفلت الاتصال.. لكيت رساله واصله من مخلد .. فتحتها وقريت..

( لا اعلم كيف اقول لك كل عام وانتي بخير لأني اراكِ الخير لكل عام .. اعتذر عن اللي حصل البارحه وسامحيني كلعاده)...

ابتسمت.. الى متى مخلد هذا اسلوبك.. تجرحني وتكولي اسف.. كتبتله..( شكرا.. وعادي ولا يهمك تعودنا)

ضميت موبايلي.. وشلت جنطتي رحنا نلعب اني وبنات خالتي. ونفتر.. وناكل موطه او ازبري لو نشتري قواطي عصير طبيعي

رجعنا لامي وخالاتي كاعدات يسولفن.. طلعت امي فطاير دجاج.. ووزعتلنا..

لجين:- فطاير .. هاي منين جبتو

الام:- سويناه بالبيت..

-شوكت شو حتى ما شمينا..

الام:- هو انتن تدرن بالدنيا لو كعدتن تلبخن وتحمرن.. تفصلن كلش

ندى:- لااا عاد خالتي ها اهانه.. احنه منلبخ نتجمل.  ها ومو عبالج مو جميلات بس هيج اضافه. 

لجين:- بالضبط .. نحن لا نحتاج المكياج بل المكياج يحتاج لما ليتزين بنا ههههههههههه

الام:- هههههههه مبين 3 ساعات المكياج يتزين بيجن  لو صابغه بيت هم اخلصه ب3 ساعات. 

لجين:- مديت راسي لبنات خالتي .. بنات مو كأن ترزلنه..

ساره:- عادي عادي المهم ناكل.. نترزل ننضرب المهم مكيجنا ولعبنا واكلنا .. ف اكلي واسكتي

لجين:- هههههههه هم صدوك.. ردت اكل وياهم مشتهين بس بقيت لازمه بطل ثلج الوّح بي حتى يموع واشرب شويه

كملو اكل ولمو الغراض .. كالت امي .. هسه فقرة الهدايا.. كلت اييي هاي الفقره الزينه.. وكمت عدلت ملابس

الام:- عابتلج يمشوه هشنو مشايفه

لجين:- ماما شايفه مشايفه الهدايا طعمها غير يلا طلعو طلعو هههههههه.. كلها بقت تضحك..

خالتي سعاد جايبتلي حذاء وجنطه لون نيلي مقدف.. وكالت اذا مو على كدج الحذاء علمود ارجعه..

شفته 38 فيت قياسي لبسته وخليت جنطته بايدي وتمشيت كالو كولش  حلو

خالتي سليمه جايبتلي فستان اسود قماشه خشن.. وبي لمع ذهبي كولش حبيته..

ندى جايبتلي دبدوب كبير.. ساره زجاجة روميو وجوليت يرقصون بوسط مي ولمع.. لينا قلاده عين سحريه.. ومينا ساعه فضيه

شكرتهم وبوستهم وصلت لماما.. 

الام:- ابوج دزلج هديتج بأيدي.. -فتحت علبه وطلعتلي كلاده ذهب- هاي صاغلجياها ابوج بايده..