#يد_القدر

الجزء الخامس

#يد_القدر
بقلمي فردوس عبد اللطيف
الجزء الخامس
من قريت رسالة محمد جاوبتة
سابين ...شكرا محمد اني تعبانه ومحتاجتك
قرى المسج ومجاوبني ...اني هم بقيت ماراسلته صحيح كنت محتاجته بهالفتره بس ما اعرف ظروفه
اتصل بي محمد بعد كم يوم ...بصراحه مجاوبته لان من كنت محتاجته مجان موجود ...طلعت بره بالحديقة افتر
رجعت دخلت اشتاقيت لبيت عمتي ...بصراحه ولمحمد
بس جرحي كان اكبر من اشتياقي ...كلما اتذكرهم تنزل دموعي ... يمكن احنا انهزمنه من داعش بس محد ينهزم من الموت والارهاب موجود بكل مكان بالعراق خسرتهم بعد ما نكسرت مره ثانية   حاولت اوكف على رجلي وارجع للمدرسة
...........
رِن تلفوني ...محمد
سابين ...الوووو
محمد ...هلو سابين اشلونج
سابين ...هلى بيك محمد الحمد لله
محمد .... انتي ضايجه مني ؟
سابين ...لا اني اعرف بيك كنت مسافر
محمد ... اني أسف ماكنت موجود بمصيبتج
سابين ...اني احبك وأعذرك  تكفيني جيتك من رجعت من سفرك ومن شفتك مخنوك قريت الحزن بعيونك وعرفت انت حزين معاي واخوتي اكيد انت تحبهم وتعزهم
محمد ...اشلون لعد مو احنا عشرة عمر ومتربين سوية
         والله أسف سابين مصيبتي اكبر مني
سابين ..خير شكو
محمد ....موتدرين باخوي هيثم من قتل شخص
سابين ...اي حجيتلي
محمد ... سامحيني حبيبتي انت حبي الاول والاخير
سابين ...افهم من كلامك اكو مصيبه تفرق بينا
        بس اذا تعوفني ما أسامحك
ظل يبجي ...واني هم بجيت
سابين ...احجي
محمد ...هما حاياخذون اخوي ولازم اخذ اختهم
سابين  سديت التلفون واني ما اعرف شاسوي ضربته بالأرض ...حبست صوتي وتمددت عالسرير وبقيت ابجي وابجي لحد مانهد حيلي ...تعبت يا دنيا والله اذيتيني
ما اعرف شسوي ...فتحت يوتيوب سمعت أغنية علي البدر
(يادنيا ليش اخذتي مني احباب وليش منهم حرمتيني ) وابجي
بصوت ناصي ...
اندك الباب ....سكتت ...امسح دموعي
دخل جدو ...هاي اشبيج سوده علي تبجين ..يانور عين جدو
شبيج ...؟
سابين ...ليش اني مامتت ؟ ليش
وحظنته
جدو ...وجدو شيسوي بلياج ياروحي
سابين ...تعبانه جدو
جدو ...اخذج ونطلع نفتر
سابين ...ابتسمت واني كلبي مكسور ...هناك مقوله تقول اذا انكسرت الثقة قل الاهتمام  واذا انكسر القلب مات الانسان
هزيت راسي يعني موافقة نطلع نفتر بس ماكو واهس ابدل
لبست عباية وطلعنا
جدو ...سوسو هسه يحسدوني جاي امشي مع القمر اوووف سوسو باعي الشباب اشلون يباوعون عليج لج انت قمر
سابين ...جدو جاي ترفع من معنوياتي
جدو ...حبيبتي اليوم مانرجع للبيت الا وانت تضحكين
فررني بمكانات هواية وين ما اروح اتذكر محمد وابجي واتذكر حيدر وابجي  ...وينك حيدر شوف اختك شجاي يصير بيهه من بعدك
سابين ... جدو تعبت خلي نرجع
رجعت نمت بس الحمد لله وجود جدو معاي هون علي ....
................
انقطعت اخبار محمد اسبوع كلما اجي عالفون اشوف ماكو محمد بس المصيبه الي اني بيهه كبيره نسيت نفسي نسيت كل مشاعر الحب بس بصراحه كنت محتاجته محتاجه وكفته بهيج ظرف
بعد اسبوع من الانقطاع اجاني مسج من محمد
(حبيبتي سابين اني أسف ...بس اني ما اكدر اخون وانت تدرين بي اني مستحيل اخون ...من كان المرحوم حيدر واني كنت محترم علاقتنا وعلاقة الجيره وصداقتي بحيدر وماتجاوزت بعلاقتي معاج بس بحدود الشرع مع انو انت اول حب بحياتي
ادفع الثمن دفعنا الهم فصل عشائري ومع هذا انفرض علينا لازم واحد من عدنه ياخذ اخت المقتول حتى تصير مصاهره وقرابة وتطفى الثأر العشائري ووقع الاختيار علي لازم اني اتزوج اخت المقتول وحكموا على بالموت من اللحظه الي اختاروني ان اتزوج اخت المقتول ...
هذا قدرنا كنت احلم باليوم الي اشوفج بي بالفستان الأبيض واجي اخذج من بيت اهلج وارفعج وادخلج بغرفة الزوجية
سامحيني يا اغلى من روحي ...يا ملاكي سابقى احبج الى اخر نفس بحياتي
احبج احبج ودموعي وكعت بين ايدي ...واني اوعدج اني حافظت ع سر علاقتنا ومحد عرف بيها ستبقين اغلى حبيبه
حبيبتي اعذريني اذا راح احظرج من فوني لان راح اتزوج وما اريد اخون نفسي قبل ما اخون زوجتي
سامحيني يا حبيبه عمري ...ستبقين اجمل ذكرى في حياتي )
وفعلا حظرني
وكعت عالارض ابجي والطم ...حتى انت محمد وين الحب ؟
وين كلامك ؟ وين وعدك ؟
نمت بالفراش المن اشكي همي حتى بيبيتي ميته لا اخت ولا عندي احد احجيله هموم الي بكلبي تهد جبال الموت اخذ مني
عزاز الكلب وحتى محمد استكثرته الدنيا علي ...المن عايشه
بعد منو بقالي تفكيري بيك يامحمد هو الي مهون علي فراك العزاز وتاليتهه تعوفني بهالبساطه
تمرضت مده اسبوع لا اكل ولا شرب مثل الناس ضعفت حيل تاذيت ....
جدو ....سوسو حبيبتي ليش نايمه كومي كعدي يمي تردين تطلعين مكان
سابين ...جدو مخنوكه اريد اروح لبيت صديقتي زينه
جدو ...ميخالف  بدلي واني اوديج
اخذني جدو لبيت صديقتي زينه .... بيت محمد كاعدين يم بيت زينه ...جيرانهم
دكيت الباب طلعتلي ام زينه وبوستني واني بالباب شفت محمد دست ع كلبي ودخلت للبيت ستلمتني زينه هيه اكبر مني بس راسبه وهي صديقتي وتعرف بقصتي مع محمد
ومخطوبه لابن جيرانهم
سابين ...هلو زوزو اشلونج
زينه ...لج سوسو هاي شصاير بيج
بجيت وحجيتلهه كولشي
زينه ... لوتدرين سوسو اهل محمد شسوو بي وغصبوا عالخطوبه ....بجيت من قهري
سابين ...ليش مو اخو ياخذهه ؟ ليش هو وأسماء يدفعون ثمن غلطه هيثم ...؟ احجي ليش....انت تعرفين الحب الاول ماينسي طول العمر
حظنتني وظلت تبجي وبأية
سابين ...اريد اروح هسه اهلي حايجون طلعت وشفت محمد
اختنكت اريد ارجع ادخل بيت زينه دموعي تنزل بسرعه
هسه امهه شدكول ليش رجعت واني جاي ابجي مشيت ومريت من يمه ...وأحس روحي ضلت يمه باوعت على ايده وشفت الحلقة ...استعجلت بخطواتي ومشيت وحسيته يمشي وراي استعجلت بخطواتي وامشي بسرعه وأحس بي يركض وراي ....نفسي انكطع اريد اتنفس ماكو هوه
بنيت أحلامي عليك وجتي وحده غيري تحققها رجعت الذكريات بفكري واني امشي وصلت قبل فرعنا ...اكو مثل تقاطع يطلع ع كل الأفرع
سمعت يصيح باسمي
سابين سابين ...جمدت بمكاني ...اجه وكف كبالي ...صارلي شهرين ماشايفته ...باوعتله متغير عيونه الحلوه ذبلانه ..سكتت وبس ابجي وصافنه عليه
محمد ...أسف
سابين ...يا أسف مو كلبي انكسر ...روح من كدامي
محمد ...ما اروح الا دكولين سامحتك
سابين .. مستحيل أسامحك انت دمرتني عيشتني بوهم
محمد ... خومو بيدي ابوي يكول اتبره منك والله كنت ميت ولا اسمعج دكولين خاين ...
سابين ...سديت حلكه ...وكتله لاتحجي هيج اني مسامحتك روح عوفني بس اذا صار بيك شي او حاولت تاذي نفسك مراح أسامحك ...من جاب سيرة الموت اخ الموت كرهت اسمه اخذ مني اغلى ثلاثة  اخ
مشيت وعفت محمد وهو هم راح تمشيت اكو مكان مثل النهر  بس الناس مسويته وكعدت هناك ...صفنت بهالدنيا ...اكيد تسالون نفسكم ليش ما افكر انتحر لان الي شفته مو قليل
بصراحه حاولت انتحر لكن تذكرت اني لازم ما انكسر امام الموت والي ينتحر يدخل جهنم يعني اخسر الدنيا والاخره
تعوذت من الشيطان وكمت ورجعت عالبيت ومن وصلت شفت امي حظنتها بقوه وبقيت ابجي وهي هم كامت تبجي
ام سابين ... عمي ابو عامر هالمره لازم اخذهه معاي ماتبقى هنا مابقى عندي احد بقيت وحيده
جدو ...لا سابينه مونستني هنا خليها تكمل السادس وبعدهه تجي وياج
سابين ...جدو يعني اكمل ؟
جدو ..اي ياروحي ليش ماتكملين اسويلج استضافه وكولي
بابا عامر حظني وسألني اشلونج ما اعرف اشبي والدي حزين بس ساكت والحزن مخيم ع عيونه
رحت سويتلهم غده
اجه ايمن واستقبلنا واجاني للمطبخ
ايمن ...اشلونج سوسو اشبيج ليش الحزن ؟
سابين ...ماكو شي خلي نصب الغده
اتصل وسام يجدو
وسام ...الو جدو دزيتلكم ايمن حتى تجون لعرس حنين انت وبيت خالي عامر والكل
جدو ...مبرووووك ان شاء الله يوم نشوف ولدهه
سابين ... جدو ما اريد اروح
جدو ...وين تبقين هنا اهلج هم حايجون
صفنت رحت لغرفتي مسكت التلفون فتحت الماسنجر
محمد داز مسج ( يامن كنتي .وستظلين عشقي اتمنى ان تغفري ذنبي أحبكي وحبك هو جريمتي وفرقتني عنك الايام والقدر . كنت كل ليلي اتخيل تجيني ..الله لا يوفق الي كان السبب بتفرقتنا وحرمنا من بعض ...أسف ..والله أسف احبج
بس اخوي اشلون انت جرّبْتَني  فقدان الاخ ...سامحيني وقدري وظعي ومسحي دمعتج اتمنى اشوفج احلى عروس ) هذه الرساله باقية بذاكرتي ابد ما انساها وحظرني بحيث مكدرت ارد عليه الي كاتبه زاد من وجعي بكل جزء من جسمي احس الدنيا افترت بي كلبي وكف وكعت عالارض
بعد ما كدرت اتحمل والله صعبه ...قبل كانت تمر الايام مايسال علي يخاف لا أمل منه والان حاضرني حتى ما يظلم زوجته ...صدك انجرحت وكلبي انكسر وعشت ايام صعبه
بس محمد كبر بعيني اكثر من قاطعني ومايحجي وياي
هذه كانت احلى صفة بمحمد (وفِي ومايخون ) وما انسى لو احب عشره يمكن اشوفه  كصديق ...
اتمنى محمد يقرى قصتي ويعرف ان هو حبي الاول والوحيد وماراح أنسا طول عمري ...يبقى الحب الاول بالذاكرة مهما مرت السنين واختلطت الذكريات
طلعت اسوي العشا ...صوت ايمن هزني  صوته رحت للغرفه وهو كان يحجي مع جدو يمكن ماتصدكون من اشوفه كاني شايفة حيدر بي مو اكثر وخصوصا من سمعت صوته
ايمن ...ها سابين اشبيج ؟
سابين لا ماكو شي بس اني كنت احس عيوني ووجهي تنمل
ايمن ...ممكن اكلمج بموضوع لوحدنا واذا جدو يقبل
جدو ماكو مانع
طلع جدو وبقينا لوحدنا ...أمسك ايدي ايمن وكعدني كباله
ايمن ...سوسو الي جاي تسوينه بنفسج حرام ...الي مات ..مات والحي ابقى من الميت وانت بعدج شباب اخوتج شهداء وانتي لازم تفتخرين
كمت وكفت ع حيلي والدمعه بعيني ...ايمن وكف كبالي
وصرخت ...ما اريد افتخر خلي يرجعون
ايمن ...لا تبجين يكفي وعلى صوته
سابين ...اني كنت عايشة علمود شخص وهو بعيني مات عوفني وكمت ابجي بحركه ...
حظني ايمن والله اني من حظنته بسبب النقص الي بداخلي وحاجتي لشخص يوكف وياي
انس ملتهي بحياته وماما وبابا شغلهم واني كنت وحيده وبازمه تعبت من شفت حضن ضمني حسيت بشتاء ودفو
كلبي خلص ....حضنته وكمت ابجي وكتله
سابين ....محمد الله يخليك لا تعوفني ..أبوس ايدك ..
هو شالني حسيت نفسي ارتفعت من الارض اغمى علي وفقدت الوعي  اتذكر نمت ع ايده  بعدهه ماحسيت
للحكاية بقيه
.........بقلم فردوس عبد اللطيف .........