#يد_القدر
بقلمي فردوس عبد اللطيف
الجزء الرابع (حقيقية)
مسكينه غالية تاذت اتخربط وظعهم بيت عمتي وتاذو من مرض غالية بنت بعز شبابها كانت تنتظر مستقبل زاهر وامهه تتأمل تزوجها وتفرح بيها مثل باقي البنات لكن الي حدث بفعل فاعل والكل صار يشك بزهراء لكن ماكو دليل ومحد يكدر يحجي ...
بعد كم شهر صارت غالية ماتتقبل الاكل فقدت شهيتهه وبالحقيقة صارت مجنونه فقدت عقلها
بهالفتره خالتي ام زهراء توفت وانشغلنه معاها لان زهراء ماعدهه احد غير اخت وحده متزوجه بالسويد وبقت وحيده بهالدنيا
خيم الحزن ع زهراء بس احنا انشغلنا بغالية الي بعدهه شباب والي فقدت عقلها المسكينه وكانت امهه واخوتهه يموتون باليوم الف موته خصوصا من تشوف احد تملخ بنفسها ...
فد يوم كنا مجتمعين في بيت عمتي ام غالية وراحت عمتي لغرفة بنتها وما سمعنا الا صريخ
عمتي ام غالية يبووووووي لحكوني بنتي
لما ركضنا عمتي مغمى عليها وغالية ذابحه نفسها بسكين والدم عالارض وميته
ياربي منظر مرعب لحد الان من اتذكر ارجف ماكنت شايفة
دم وشخص مذبوح مثل الخروف ياربي شنو هالمنظر كلنه بقينا نصرخ ونلطم الا زهراء انتبهت عليها ما هتزلهه جفن
لا بجت ولا كأنه أمامها بشر مذبوحة ودمهه عالارض
تعبنه حيل وعمتي تاذت لان الموت اخذ بنتها الوحيده الي كانت قبل اربعه اشهر مابيهه شي شنو الي صار وهم دكول عمتي لو متمرضه او ميته بانفجار كان كلت قضاء الله وقدره لكن هيج موته كانت صعبه ع اهلها ولكن وجود الاهل والأقارب ومحاوله تصبيرهه لان مهما فعلنا فامر الله هو الغالب وهذا قدرهه ...الله يرحمها برحمته الواسعه هي فقدت عقلها وان شاء الله رب العالمين يغفرلهه
بعد الفاتحه رجعت لبيت جدو والدوام ونفس الروتين
محمد راسلني اشلونج سابينه أسف تاخرت عليج اراسلج
سابين ....هلو محمد لا عادي هي الحياة جاي تراوينه شغلات
ماكنا نتخيلهه يمكن نسمع بيهه او نشوفها بالافلام
محمد ...سوسو حبيبتي اخوي هيثم
سابين ...اشبي احجيلي
هيثم ...شحجيلج اخوي هيثم من رجع من الخارج كان مو طبيعي يتعاطى حبوب وتصرفاته ماموزونه
سابين ...ليش معالجتوا ؟
محمد ...شنعالجوا اذا هو مدمن البارحه تعارك مع شخص وارتكب جريمة قتل وقتله خلاص
سابين ...يايمه شنو هالمصيبه وتالي
محمد ... حاليا ابوي مخبي عند أقاربنا بس جاي يهددونه يلحكوا وين مايكون
سابين ...يعني يقتلوا
محمد ...هذا كلامهم او نكعد معاهم عشائريا ونتفاهم
سابين ...هي لازم تفضوهه عشائريا
محمد ...الله كريم باي حبي
سابين ...باي قلبي
بعد فتره اجوي ايمن وخواته يزورون قبر امهم وأبوهم
رجعت من الدوام وسلمت عليهم وغيرت ملابسي ونزلت
صبوا الغده وأكلنا وكملنا وطلبت من جدو اروح معاهم للمقبره ازور حيدر مشتاقتله
وافق جدو ورحنا لغرفتي نسولف اني والبنات
سابين ...احجيلي مرام اشلون فقدتوا امج وابوج
مرام ...بابا توفى بحادث سياره ....من خسرنا بابا امي تمرضت فتره عاشت وحيده مع ان احنا حولينهه بس تعرفين
مهما كان تشعر هي بعيده عنا لان بابا كان هو الي مشي البيت ورأيه هو الماشي
الوالده شافت صعوبة بتحمل المسوؤلية ... بعد فتره تعبت من مرضها ومع ان ايمن طبيب بس امر الله وقدره توفت الله يرحمهه برحمته الواسعه
سابين ....الله يرحمها
رِن تلفوني ....هذا عمو علي بتركيا
هلو عمو اشلونك حبيبي شخبارك
علي .....هلو سوسو اشلونج حبيبتي جدو اشلونه اهلج ابوج امج اخوتج
سابين ...كلهم بخير يسلمون عليك
عمو تدري منو يمنه
علي ... جاي اسمع صوت يمج منو
سابين ...ذولي حنين ومرام يسلمون عليك
علي ....الله سلميلي عليهم كثير واخبار اخوتهم مادام يمكم راح اتصل بيهم ....مع السلامه عمو
سابين ...الله معاك حبيبي
دخل ايمن .... ويامن كنتي تحجين وحبيبي
سابين هذا عمو علي
ايمن ... اي واشلونه وشخباره
سابين ...الحمد لله يسلم عليكم كولكم ...
ايمن اشو عيوني ياذوني تكدر تشوفهم
ايمن ....تعالي
سابين ...وكفت يمه احس كلبي زادت نبضاته ويريد يطلع من مكانه ... هذه اول مره اشعر بهيج شعور ...
تقرب يمي
ايمن باوعي علي ...يمين ...يسار
ارتاحي لان عيونج تعبانه حرامات ...ويضحك ...بقى ماسك وجهي ....واني ماعرفت شسوي
من باوعت لعيونه شفت بيهم حجي غريب
سابين ....شكرا دكتور
ايمن ...يد لل الحلو
ترك وجهي واني فتت للغرفة نمت ....
كعدت من النوم الوقت مغرب
اباوع بالتلفون اشو محمد ماحجه معاي ما اعرف ليش اشبي
مرام ...تعالي سوسو نحضر العشا
ايمن ....اجي وياكم ؟
سابين ...شتسوي مثلا ؟
ايمن ...اساعد ترى اني خوش شيف بالسلطات
هو وأخته يبتسمون دخلنا للمطبخ وكل واحد لزم شغله
اني اكلي الكبة والبورك وأيمن يسوي السلطه وحنين تثرم البصل للمخلمه ....انشغلت مع البنات وتلفوني ما فتحته ولا شفت محمد دازلي شي لو لا
حنين ...سوسو روحي فرشي السفره كلشي كمل
رحنا اني ومرام فرشنا السفره وصبينا العشا ...
لاحظت جدو متغير كلامه
سابين ...جدو اشبيك ؟
جدو ... سوسو ايمن مايندل البيت
سابين ... انت حفظه الطريق ...صار كم مره يجي ومايندل
كملنا العشا ورحنا للغرفة
جيت لغرفتي واباوع ع صوره حيدر باجر اجي اشوفك اخوي حبيبي ..شكد مشتاقتلك مرام من شافتني ابجي ظلت تبجي معاي حظنتني
مرام ...حبيبتي سوسو عيشي حياتج ما اكولج انسي بس شوفي مستقبلج
دخل ايمن.... هاي شكو صوتكم واصل لبره بجيكم مانريدكم تبجون هيج ...
مسحنا دموعنه وكعدنه وحاول ايمن يغير الموضوع
ايمن ...اني قفلت تصبحون ع خير
سابين ... خلي ننام تصبح ع خير
نمت مرتاحه لان باجر اروح لقبر اخوي واشكيله
حنين ...بنات كعدو جدو كاعد من وقت ورانا روحه للمقبره
كعدنا بدلنا بسرعه وأكلنا ريوك خفبف وطلعنا ...نسيت ادز رساله لمحمد اكوله احنا طالعين ....
بالطريق كظيناها سوالف وماحسينا الا واحنا بالمقبره
رحت ع قبر اخوي وحظنته ....دموعي تنزل بدون وعي
اخوي حيدر مشتاكتلك والله هواي ...دكوم يابعد اختك وكاننه هذا اول يوم يموت بي اخوي رجع الجرح بكلبي
وسام جرني من الكبر ...دكافي وحظني ...يكفي سابينه
سابين ... الله يخليك عوفني ترى حيدر كان مختلف عن الكل قريب لكلبي علاقتنه كانت غير
حنين... تعالي امشي حبيبتي امر الله لا اعتراض ع أمره واخذتني غسلنه ورجعت
عفية خلوني ابقى ريحته هنا ما اريد اروح ...بقيت احلفلهم من فتت يم القبر اشتميت ريحته نفسهه يعني موجود ويحس بي ريتك تكعد وتحجيلي
اخذوني كوه لقبر عمتي وزوجها ....
كملنا ورجعنا للبيت ...
من وصلنه للبيت لكيت البيت مليان ناس هواي ...اريد أفوت
انشلت رجلي شنو هالهوسه
ايمن ...نزلي سابين اشبيج
سابين ...ايمن شكو
ايمن ....دنزلي خلي نشوف شصاير
سابين ...الله يخليك حيدر مابي حيل ...حيدر هد حيلي بعد مابقى بي حيل
ايمن ...ماكو شي ان شاء الله
لزمني ايمن ونزلني لان رجلي انشلت
ما اريد ادخل خليني هنا فدوه ايمن روح شوف وتعال كولي
ايمن تعالي اني لازمج ...فتنا ...جدو واكف واكو تابوتين ؟؟؟
تخيلت كلشي بس ماتخيلتهم اباوع انس يشهك ويبجي
سابين صرخت منوووووو ذولي احجو منو ذولي
انس ...لج سابين ذولي اخوتج سجاد وشهد
سابين ...لا لا لا الله يخليك لا شبقالي
فتح التابوت ...سجاد وجهه نصه ...ولك سجودي ...رحت يم حيدر وعفتني ...كوم ولك ...وحضنته ويردون ياخذو واني مجلبة ...جرني ايمن ...عوفي كافي حرام عوفي
سابين ... ياحرام ...حرام عليهم يعوفوني ولك عافوني وحدي
شهد ايدهه ماكولفيناها لف وضليت اصرخ وابجي والطم وأنس يبجي ويحجي
جدو جر مني شهد ...ليش جدو خليهه يمي ماعندي غيرهه بس هالاخت ليش تاخذهه وحضنتهه حيل وجرجروني كوه للغرفة واني ما اقبل
ايمن حظني ...يكفي لخاطر الله
سابين ...صرخت بصوت ...الله يخليك ايمن داويهم لاتخليهم ياخذوهم ...هذا اخر شي اتذكره
ماحسيت الا واني راسي بحضن خالتي وامي كبالي تلطم وتصرخ ...صحيت وتذكرت سجاد وشهد وكعدت الطم ويه امي ...
سجاد وشهد يداومون بمدرسه وماجرين سياره تاخذهم للدوام
وياهم بالخط ابن مسوؤل (مدير مركز شوطة ) والارهابيين
مفخخين السياره وانفجرت وبيها الطلاب نصهم ماتو ومن ضمنهم ابن المسول واخوتي ماتو بعمل ارهابي جبان ...
كنت اسمع يكولون الأخوه أعز من الاب والام ...واني اكولكم نعم هذه حقيقة كنت اتمنى لو ميته معاهم
بقيت اسبوع لا اكل ولا عندي خلك افتح عيني
ضعفت حيل ...محمد مجان موجود كنت محتاجته بهذا الوقت
بس ايمن ما عافني وميخليني ابقى وحدي دائما يجي يمنه
تركت المدرسه ورسبت بذيج السنه ...امي وابوي بقو يمنه خمس شهور بس بيت عمتي راحو ...بعد هذه الفتره اهلي رجعو للموصل واني رجعت يم جدو مثل قبل ..اشتاق لاخواني ..ومن اشتاقلهم اروح لبيت انس واروح لغرفة شهد وسجاد وابقى ابجي ...لحد ما يبرد كلبي
يجي ابن اخوي ...عمه يكفي ...حبيبي يشبه حيدر بي من ابو انس ... اخوي سما عامر ع اسم ابوي
كنت احضره واكوله حيدر كان يحب شهوده واخذهه يمه بس اني مايحبني
عامر ... عمه اني احبج وابقى يمج
حياتي عموري خلي ننام بغرفة شهوده وسجاد بيهه ريحتهم
اليوم الثاني ...رجعت للبيت فتحت تلفوني لكيت محمد دازلي
رسائل
محمد ...اشلونج حبيبتي البقاء لله العوض بسلامتج ...أسف والله كنت خارج العراق جيت قبل يومين
واني اعتذر ما كنت موجود بمحنتج ولا كدرت اوكف معاج بهذه المصيبه ربي يرحمهم ويصبرج ع فراكهم
للحكاية بقيه
.............بقلم فردوس عبد اللطيف ............
أنت تقرأ
#يد_القدر
Storie d'amoreفتاة تعيش مع عائلتهه بالموصل من الطائفة الشيعية وتتعرض العائلة للتهجير بسبب احتلال الدواعش وتمر بصعوبات وألم وفراق لكن (سابين) تبقى صامدة وتصبر وتتوكل على الله تابعونا لنرى ما ذَا تخفي يد القدر لسابين
