#يد_القدر

الجزء السادس

#يد_القدر
بقلم فردوس عبد اللطيف
الجزء السادس
ماحسيت بالدنيا ...كعدت من النوم كانت الساعه 10 ونص
رحت للمطبخ كنت عطشانه ...
سابين ...هلو ايمن
ايمن ...هلو ...اشو كاعد ويباوع علي
سابين ...كعدت عالميز اشرب ماء وأيمن يباوع علي وبعيونه أسئلة ...
سابين ...سكتت اصلا مجاي اتذكر الي صار
وين جدو ؟
ايمن ..بالهول
سابين ..يي اني رايحه ...تريد شي ؟
ايمن ...لا سلامتج ..بس اذا صرتي زينه سويلي اكل
سابين ..اوك بس خلي اشوف جدو وارجع
رحت بالهول يم جدو ...هلو جدو هلو جدو
اشو مايرد السلام ووجهه ثكيل اشبي
ها جدو ..ها جدو
جدو اشبيك ليش ماتحجي وياي الله يخليك نزلت دموعي وبقيت ابجي
جدو ..اهلج عايفينج امانه عندي ...اذا مادكوليلي منو محمد الي تحجين بي ... والله الا أهدر دمج
انصدمت من كلامه بقيت ابجي ومخنوكه ما اكدر احجي
جدو ..يكولون زود الدلال يخرب ..واني دللتج الكل يحلمون بطولج ..كلمن يشوفج يتمنى تكونين من نصيبه
.....صفنت بوجه جدي ...والدموع تنزل ماكدرت احجي اي كلمه طلعت من يمه ركض واني ابجي ...شافني ايمن
ايمن ...اشبيج سابينه شكو
سابين ..ماكو شي مو جوعان امشي اسويلك اكل ...رحنا للمطبخ وسوينا عشا
دموعي تجري وكلام جدو يرن باذني ليش يحجي وياي هيج واشلون عرف.
سابين ...ايمن اريد أسالك سوال ...
ايمن ...كولي
سابين ... انت كلت لجدو ع محمد
ايمن ..اكيد لا ...لان انتي من وكعتي واني صيحت جدو
ومن اجه جدو كال اخذهه للغرفه
ايمن ...حاضر جدو
وانت كنتي تحجين محمد لا تعوفني وجدو سمعج
واني بقيت ساكت وغيرت الموضوع ووديتج لغرفتج لا تحجين بعد كلام زايد ... وجدو يغضب عليج
سابين ...ليش ولد عمي مو مثلك ؟
ايمن ...ههههههه اختلف كليا ...الحمد لله اكو احد مدحنا
سابين ...هذه حقيقة مو مجامله
كملت العشا وصبيته لأيمن
ايمن ...تعالي اكلي
سابين ...لا ايمن ما اشتهي
ايمن ...لعد اني هم مراح اكل
سابين ...صدكني ما اريد
ايمن ...لخاطري كعدي وأكلي
سابين ..كعدت وأُكلت مع ايمن
ايمن ..سوسو لو تجين يمي بالمشفى وكت الخفاره تشوفين قصص كثيره
تدرين ذاك اليوم جابولنا واحد زوجته طاعنته بالسكين يمكن خمس طعنات ... وجايبته بايدهه وتلطم عليه
سابين ... شطلع ؟
ايمن ..طلع الاخ متزوج عليها ورادت تادبه
سابين ... هههههه هم ضاربته وتلطم عليه الله يساعدكم ع هيج حوادث ..... وأنتو تسهرون بالليل حتى تعالجون المرضى ... حياتكم تعب
حاول ايمن يطلعني من جو الحزن الي اني بي ويلهيني بالسوالف ...واني كنت ابتسم مجامله ولكن كلبي مجروح
ايمن ... عندي سوال محرج شوية
سابين ..صفنت شكو ايمن
ايمن ...منو محمد وليش كتيلي لاتعوفني ...بس جاوبيني
صفنت بوجهه وعيونه تريد تأكلني
سابين ...ماكو شي ..مجرد احلام كوابيس
ايمن ..لا لا مستحيل ...احجي واني اساعدج كولي
سابين ...عوف ايديه وجعتني
ايمن ...أسف والله مو قصدي
دمعت عيوني وفتت للغرفه ،،،، محمد اخ ياكلبي ..ليش
احس مكسوره تعبانه ....والله انت كنت املي الوحيد بهالدنيا
وتالي كسرت كلبي .....
بقيت الليل كوله سهرانه وماكدرت انام ...اتصلت بزينه
سابين ..الو هلو زينه اشلونج
زينه ..ماكو شي اسال عنج ...حبي سوسو اليوم شفت شاب يمكم بيتكم منو
سابين ...هذا ايمن ابن عمتي
زينه ... اي وشنو مؤهلاته ومرتبط لو لا اشبيج ماتتحركين شتنتظرين
سابين ...انت شكد بطرانه لو كلوبنا بايدينا كان قفلنا عليها
زينه ... باجر تعالي يمي
سابين ...اوك باجر اجي باي
صارت ب 4 الفجر جاي اغفى وانفتح الباب واني غمضت عيوني ...وكان جدو
جدو ...يباوع علي واني مغمضه وظل يحجي لوحده (ليش هيج جدو ؟ ليش بنتي ؟ هيج دمرني نفسج ودمرتيني وياج
سابين ....حسيت دموعي تنزل بدون صوت من وحدهه
ماتحملت كمت وحظنته ...
والله ماسويت شي جدو لاتعوفني الله يخليك ما اكدر ع زعلك
حظني وباس راسي
جدو ...رجعي نامي جدو
سابين ...تمددت ..جدو حبيبي باجر اريد اروح لبيت زينه لمايوصلون اهلي
جدو ...ديالى نامي
نمت وغفيت ماحسيت بالدنيا
كعدت الساعه 8 ونص ...رحت للمطبخ وسويت الشاي
وخليت الريوك ورحت اكعدهم
سابين ...جدو كوم كوم اكعد
ايمن بالهول ...ايمن كوم كوم ...كان اكو( كوشايه) يم ايمن مسكتها واكوله دكوم لو أضربك ...يالله كعد وفتح عيونه
ايمن ...تكدرين ؟
وضربته بيهه وانهزمت للمطبخ ...وهو لحكني ...شفت جدو
سابين ...جدو ايمن ما اعرف اشبي يركض وراي
بقينا نضحك اني وجدو واجه ايمن
ايمن ... وينج اني اعلمج ...
سابين ..جدوووو
جدو ...من هاي كعد اثاري ضربتي
بحياتي ايمن كان سعاده يمكن ما اشعر اتجاهه بالحب والعشق ولكن كان دوا لجروحي ...لان كنت مجروحه من محمد حيل وأفكر بي ...اشلون يكدر يتخلى عني بهالبساطه ...حاليا هو يمهه ويلمسها ويحظنهه معقوله هيج محمد وحبنا وابقى ابجي الليل بطوله ........
اليوم الثاني كعدت الصبح كملت شغلي طبخ وترتيب البيت
سابين ...جدو كملت شغل اكدر اروح لبيت زينه
جدو ...خلي ايمن يوصلج وبالرجعه اتصلي هو يجي عليج
سابين ...حاضر جدو ...ممكن استاذ ايمن توصلني
ايمن ... تفضلي حضره الأميره سابين خادمك بين يديك
سابين ... تدري ايمن جدو مقهور مني وشايل بكلبه مني أريدك تحجي معاه وتلين كلبه اكيد حايسمع منك
ايمن ... تدللين سوسو المهم علاقتج بمحمد انتهت وبعد ماترجعيله ؟
سابين ... هذا ماضي وانتهى وصدكني مامسويه غلط كوله مجرد بالتلفون
ايمن ..انتي حاليا اهتمي بدروسج وعوفي كولشي وراج
سابين وصلنه باي ...من اكمل اتصل بيك
سابين ...هلو زوزو
زينه ...هلو حبي والله هذا ابن عمتج مايتفوت حلووووو اخ لو مامخطوبه
سابين ...هههههه دفوتي جوه
دخلنا بيتهم وسولفنه وضحكنه ...من اروح يم زينه اشكيلهه همومي وهي تخفف عني الالم احس حمل ثقيل وانزاح عني
........
رجعت للبيت وشفت ماما وبابا وسلمت عليهم
سابين ...ماما ما اريد اروح للعرس
ام سابين ... بنتي انت بعز شبابج ميصير تدفنين روحج تعالي غيري جو بلكي نفسيتج ترتاح بعدين هذا زواج بنت عمتج اكيد حاتزعل اذا ماترحين
سابين .. شراح البس ما محضره اي فستان للحفله
ايمن ... بعد اذنج خالتي ممكن اخذ سابينه للسوك اشتريلها فستان للحفله واني هم اريد اخذ قاط
ام سابين ...اي ماماتي روحي ويه ايمن اني مالي خلك بكل شي
ايمن ...ها شكلتي
سابين ...ما اني اخجل اشتري كدام ايمن
ايمن ..لج اني عندي ذوق بالملابس النسائية
ام سابين ...روحي بدلي بسرعه والبسي ملابس مفرحه وعوفي الحزن
سابين ...اصلا الحزن ماعنده غيري
لبست قميص ليجوه الركبه والبطرون جينس وجاكيت كاوبوي وحذاء عسلي والقميص والشال عسلي
ايمن ...هاي شطالعه
سابين ...مو حلو
ايمن ...لا لا والله يخبل يالله امشي
صعدنا بالسياره ونزلنا بالسوق ونفتر
ايمن ...خو ماتعبني
سابين ...لا اكو بنت تتعب من السوق صح افترينا كل السوق لكن متعه التسوق
خلي نفوت بهذا المول كلش حلو
ايمن ...سوسو اشتري فستان من هنا لان ملابسهم حيل حلوه وأنيقة ومميزة
دورت والله لكيت فستان طويل مفتوح (فستان سهره للحفلات )
ايمن ..حلو هذا اخذي
سابين ...يعني حلووو
ايمن ...اكيد حلو عليج
سابين ...يعني اخذه ؟
ايمن ...لعد ليش جبتج هنا
اشترالي الفستان
ايمن ...تعالي اختارلج الحذاء ...واشترالي الحذاء والاكسسوارات ...كانت حلوه كثير
سابين ...بعد كافي اليوم خسرتك
ايمن ...تدلل بنت خالي
بعدهه اخذني لمدينه الالعاب صعدنه بكم لعبة وصارت ب 5 العصر
سابين يالى نرجع
ايمن ...لا اني اريد اشتري قاط وع ذوقج
واشترى قاط اسود وقميص كريمي وحذاء اسود وساعه
واشترى جيل واني اضحك عليه
ايمن ...ترى هو جل مو كرياتين ...شايفتني عبد الرحمن
     ضحكنه وطلعنه
ايمن ...سوسو شيعجبج تتعشين انت خطيه يوميه تتعبين وتسويلي اكل اليوم اني راح اعشيج ع ذوقي
اخذني للمطعم وتعشينا ....
بعدهه رجعنا للبيت الساعه 8 بالليل
سابين ...شنو رايج ماماتي بالأغراض
ام سابين ..الف عافية بنتي ان شاء الله يوم افرح بزواجج
نمنا من التعب نمت بدون ما افكر وابجي مثل كل ليله لان التهيت والتعب والفر بالسوق نساني همومي
كعدنه الصبح وسافرنا لبغداد ...ايمن نظراته غريبه يباوع علي بالمراية ...وفتح أغنية هيثم يوسف
(ياناس رحموا بحالي ..من ايدي راح الغالي ) واني اختنكت
فتحت الجامه وظليت ابجي
ايمن انتبه علي ابجي سد الاغنية ...وظل يتشاقى ويُقلد ويضحك ...بصراحه اني أحسده ع هالقابليه ...واني اصلا ما اعرف شنو سالفته
وصلنا لبيت عمتي فرحت بيهم لان البنات حنين ومرام تعودت عليهم كنت مشتاقتلهم ...بنات عمتي صديقاتي واخواتي احبهم كثير
استقبلونه بنات عمتي وبنات عمهم كلهم ملتمين  وماشاء الله كلهم كليات  واني كنت سادس من شفتهم قررت اكمل دراستي وادخل كلية واشوف حياتي  كافي الم لازم انتصر عالحزن بس لاحظت بابا معصب علي
ما اعرف اشبي يخزرني بعيونه واني من اشوفه هيج اخاف وأحاول أتهرب منه
راحو الولد للمطار يستقبلون بيت عمهم سبهان (عنده بنت وحده وولدين ) البنت تباوع ع ايمن وأيمن يبتسم ويعصب بنفس الوقت ما اعرف ليش وما افتهمت شنو الموضوع
حنين مخبوصه بعرسها وتتحظر متعرف تركز واني ومرام نساعدهه ونحضر أغراضها هاي الهوسه الصبح 
راحو يجهزون حنين بس اني كنت تعبانه جسمي ياذيني
وتعبانه فبقيت بالبيت رحت لغرفه مرام نمت
كعدت الساعه 9 من النوم والبيت فارغ وألم بطني خُف علي
رتبت البيت ونظفت وسويتلهم اكل طبخت التمن خليته عالنار وعفته يتهدر وفتت للغرفه
من بقيت لوحدي بقيت افكر بمحمد ...اكيد نساني وعايش حياته ...اني هم لازم انسى وأفكر بنفسي ومستقبلي
لكن المشكله كلبي عنده اشلون اكدر اسحب كلبي اشلون اكدر امسح من ذاكرتي أحلامنا سويه هو اول حب اخخخخ من الحب الاول لو تعرفون الوجع الي بكلبي ع محمد
الساعه 11 ونص
حضرت فستاني واغراضي للحفله لبست الملابس وفتحت شعري ورفعته بايدي ...كنت موظعيفة وأريد اضعف والفستان كان مليان وزني 65 وطولي 170 احس جسمي مو متناسق ....او تذكرت التمن ...ركضت وطلعت من الغرفه
وأيمن بوجهي ...انصدمت بي وفستاني كان ضيق ومخصر انحرجت ..بس لازم اروح للمطبخ
ما اعرف شاسوي ركضت طفيت التمن
وفتت جوه انتبهت ايمن وجهه اصفر حتى من اندعمت بي كان مو ع بعضه
غيرت ملابسي عالسريع كنت لابسه بجامه ورديه شفافه
طلعت من الغرفه ...ها ايمن اشلونك
ايمن ...هلا بيج
ايمن كانت حرارته مرتفعه
ايمن ...وديني للغرفه
سابين ...مو انت دكتور ليش ماتعالج نفسك ؟
مسكت ايده وصرت تحت كتفه ...ما شاء الله ثكيل ...ساعدته يدخل للغرفه ...تمدد بمكانه ...بس يَصْب عرق حرارته مرتفعه
سابين ...ايمن لازم تسبح بماي بارد. باوعت عليه ميكدر يروح وحده لازم اني أودي للحمام لان ماكو احد بالبيت
لزمته من ايده وكام وديته للحمام وفتحت الماي عليه
وطلعت من يمه بس اني تنكعت بالماي ملابسي وشعري  ورحت حضرت ملابسه
سابين ...ها كملت انطيته ملابسه ورحت عالممر
من طلع من الحمام شويه احسن وصحصح ويضحك
ظل يباوع علي من فوك لجوه
سابين ...وين تروح
ايمن وديني لغرفتي
وديته لغرفته ونام ارتاح بقيت صافنه عليه وهو نايم حسيته هو الدوه لجروحي
اباوع عليه شلون وجهه يخبل وعيونه منعسه
ايمن ...ممكن طلب سوسو ؟
سابين ... تفضل ابن عمتي
ايمن ... ممكن تفركين راسي
ترددت بالبدايه بعدين كلت ميخالف فركت راسه لحد مانام وعفته وطلعت من الغرفه وبوجهي بابا صار راسا
ابو سابين ...ولج حقيره شتسوين هنا بغرفة ايمن  وضربني راشدي ...لج متخلصنه  من محمد أفندي ادور ايمن
سابين ...والله بابا مامسويه شي
ابو سابين ...صرخ لازم واحد الايحجي ودفعني للغرفه واني ابجي ....
باوعت لنفسي بالمرايه شفت ملابسي تخيل وملابسي الداخليه مبينه
بقيت ابجي لحد ما غفيت
للحكايه بقيه
............بقلم فردوس عبد اللطيف ..............