#يد_القدر

الجزء العاشر والاخير

#يد_القدر
بقلمي فردوس عبد اللطيف
الجزء العاشر والاخير
لما دخلت يم ايمن وكان تعبان وظعه محزن بس كان يريد يشوفني طلب منهم يبقوني لوحدي يمه
ايمن ...تقربي سوسو عندي كلام معاج
سابين ..تقربت واني ساكته كل الكلام الي بالدنيا توقف بذيج اللحظه ...بس اريد اسمع منه اي تبرير مقنع
أمسك ايدي
ايمن ...سابين سامحيني ... ياحبي والله احبج واموت عليج
كلبي بايدج
سابين ...قطعت كلامه وحجيت ...خاين خاين علمود زهراء الخاينه مثلك ...حقير نذل
ايمن ...اني كل الي كلتي والله ما استاهل حذائج ...سامحيني
سابين ...اثآر بوساتك على ركبتي وتالي دكولي اضحك عليج
وليش شسويتلك
ايمن ...ااااااخ
سابين ...شكو اشبيك اجيب الدكتور
ايمن ...لا ميحتاج سوسو شنو الي صار اني مجاي اتذكر شجابني هنا منو جابني وزهراء وينها ؟
سابين ...زهراء ماتت
ايمن ...تستاهل والطفل مات ؟
سابين ...لا بعيد عنه مامات اخذه ابوه وزهراء بقت جثتهه زوجها ماقبل يستلم جثتهه ويدفنهه
ودفنهه جدو وأنتو الجيش لكوكم ونقلوكم الى المشفى
ايمن ...سوسو سامحتيني ليش معصبه علي؟
سابين ...أسامحك بشرط
ايمن ...شرطي عمري الج
سابين ...كولي ليش سويت بي هيج
ايمن ...راح احجيلج الحقيقة ...اني ماخنت حيدر ولا اعرف زهراء قبل لا تتزوج
لكن الي صار فد يوم اتصلت بي زهراء واني اصلا قبل هذاك اليوم ماكنت اعرفها
وكالتلي (شوف اذا ما سويت الي اريده منك راح اسوي عمل لحبيبه كلبك سابين واخليهه تتخبل )
واني سويت لغيرهه قبل وتتذكر الي صار لغالية وخليتها تتخبل وتقتل نفسها واكيد سهله علي اخلي حبيبتك تلحكها
ايمن ...من سمعت كلامها تذكرت غالية والي صار بيهه وخفت عليج (والله نزلت دموعه وهو يحجي )
سابين ...ومن كل عقلك اصدك هذه التمثيلية ترى شايفيهه بالمسلسلات التركية
ايمن ...شوفي الموبايل
سابين ...ميحتاج ...وبعدين كمل
ايمن ...تاكدت من كلامهه وفعلا طلعت هي الي مسويه العمل لغالية وما كدر اي شيخ او سيد يفتحه وبقيت خايف عليج
طلبت مني اكولج اني خنت حيدر معاها حتى تحرك كلبج لان حبيتيني ورادت تخليج تعيشين بصراع مع نفسج لان حبيتي
الي خان اخوج
سابين ...وليش تريد تاذيني
ايمن ...ماعرفت السبب بس حسب تحليلي اولا الغيره غيرتهه منج واضحه وبعدين لان حيدر عافهه وماتزوجهه
.... ومن جابو التابوت مال حيدر صيحتي عليها امام الناس
لعلمج ...زهراء كانت عدهه علاقات مع ولد كثيرين مو بس الي عرف بي حيدر ...ولو هي ماتت الله يرحمها لكن هذا الي سمعته ...وحتى خالد من طلكها اكتشف عدهه سوالف والله واعلم. واعتقد حتى السحر الي سوته لأخته عرفو بيها هي
..............
دخلت الممرضة وانطته مهدئ حتى لا يتحرك
دخلو ماما وبابا وسلموا عليه وبابا يخزرني مجان راضي علي
ابو سابين ...يالى بنتي امشي جينا اني وامج ناخذج معانا للموصل
خليتهم يطلعون والتفتت على ايمن شفته نايم كتله
راح اروح بس كلبي عندك والله ما انساك للموت
بسته من خده ومن كصته وطلعت ...
سابين ...حظنت جدو حبيبي جدو اني حاروح مع بابا وماما للموصل بعد ما اتحمل
جدو ...حبيبتي ونور عيني اشلون تعوفيني بعد مانورتي بيتي
سابين ...جدو صحتي تعبانه واروح يم ماما تداريني واكيد راح اتصل بيك يوميه ...مو تضوج من مكالماتي
جدو ...اني اضوج من حبيبتي شمعه البيت ..روحي ارتاحي والله كريم
طلعت ويه اهلي بس دموعي تنزل بدون توقف ...وجدو هاي اول مره يتصل كل شويه يطمن علي ويوصي ابوي
جدو ...عامر ما اوصيك ديرو بالكم على سوسو
عامر ...صار بابا لا تخاف
..................
عامر ... بنتي اني عرفت كولشي هذا النذل سوى بيج هيج
وانتي بكل بساطه ترحين تتبرعين بكليتج اله حتى يعيش ويدوس عليج اكثر من الاول
حتى ما استأذنتي من عدنه اني ابوج كان المفروض تنطيني علم ...ليش بابا ...ليش هيج سويتي ؟ اريد تفسير منطقي
سابين ...كمت ابجي ... بابا انت جبرتني عالخطوبه وخليتوني اوافق غصبا عليه كنت مخيره بينه وبين شاكر لهذا انت الي خليتني بين خيارين يا ايمن او شاكر ...وفضلته هو على شاكر لا ن عرفته وتعودت علية
ودكولي ليش انطيته كليتي ؟ تدري ليش لان حبيته وتعلقت بي خلال فتره الخطوبه خلاني احبه واتعلق بي  ومع كل الي سوا اني أحبة أحبة
عامر ...اني اله اذا ما اخلي يندم ...والله الا ادمره
مكدرت احجي بس ابجي كظيت الطريق واني ابجي ...
وصلنا للبيت وهذه اول مره ادخل لبيتنا من طلعنه لحد هذه اللحظه ومن دخلت اوووووف رجعت الذكريات ودخلت وياي يمه هذه غرفه حيدر وهنا كان يكعد ويحجيلي اوووف وينك حيدر ليش عفتني ورحت ياخوي ؟
يايمه هنا سجاد كان يكعد وشهوده اوووف يا يمه بابا طلعني من هنا ما اتحمل بقيت ابجي واصرخ تذكرت وجودهم بقيت الطم وابجي  شنو الي صار بينا ليش هيج نفقد عزاز كوله بسبب الاٍرهاب واحنا شعلينه ... صوتهم بالبيت بابا طلعني دمروني ولكم فقدت 3 عزاز وهسه جايبيني هنا تردون تموتوني .....
عامر ...اشبيج سابين ؟
سابين ...بابا.روحي طالعه اختنكت
عامر ...سابين ظلت ترجف كول جسمها يرجف وترعش وتصيح حيدر ..حيدر .. شهد ...سجاد ... حيدر الله يخليك اختنكت ...
اخذني ابوي بالسياره وطلعنه من البيت اخذني لبيت اقاربنه بقينا كم ساعه وتالي رجعنا لبيت جدو
دخلت لبيت جدو شوية هدأت وسكتت
رجع جدو لكربلاء
جدو ...هلا بشمعة البيت نورتيني صدك البيت بلياج اظلم
سابين ...جدو حبيبي اختنكت بيتنا ما اكدر ادخل بي بعد
جدو ...حبيبتي ابقي هنا يمي مونستني اني وحيد وماعندي غيرج وجودج نورلي حياتي
جدو ...سوسو بنتي ايمن يريدج ويريد يخطبج ترى ذبحني كلسع يخابرني
سابين ...لا جدو ما اريده اني هسه مجروحه  المهم صحته اشلونهه ؟
جدو ...الحمد لله احسن يبين كليتج صحته
بقى ايمن يتصل وما اجاوبه ويدز رسائل وإشعار وأغاني حب وعتاب واني عايفته وما ارد
بس بيني وبينكم كنت انتظر رسائلة بفارغ الصبر
خليته فتره يتأذى لحد ما جدو قنعني ارد عليه
وفعلا جاوبته وكلبي كوله شوق لأيمن لان احبه وحبي اله ماينسي وما كدرت اطلعه من كلبي وبقى ايمن يتوسل ويترجاني اوافق عليه لان يريد يرجع يخطبني
سابين ... ايمن الموضوع مو بايدي انت تعرف بيد ابوي
بس أريدك تحجيلي انت شوكت حبيتني
ايمن ...بصراحه اني بالبداية ماكنت احبج وصار موقف اذكرج بي مره سالتج على محمد وانتي جاوبتي ان محمد يخاف عليج اكثر مني ..هذه الكلمه استفزتني وخلتني افكر انتقم منج لكرامتي لكن من خطبتج وتقربتلج حبيتج وحبيت طيبتج حبيت انوثتج انت اروع بنت عرفتها بحياتي ومامستعد اخسرج ...كافي سابين كافي بعد اريدج يمي اني محتاجج
محتاج حبج وحنانج حبيبتي وحبيبة عمري وما اسمحلج تصيرين لغيري ..
...............................
وفعلا اجوي خطبوني وابوي يرفض وأكثر من مره يدز ناس
وبابا يرفض
ايمن ...جدو الله يخليك اذا خالي مايقبل يزوجني سابين ترى اموت ارجوك انت تاثر علية
جدو ... ها ولك نسيت كلامك من جيتني وكتلي ما اريدهه
ايمن ...جدو مو حجيتلك القصة حتى انت تريد تشلع كلبي
جدو ...حتى تعرف سابين جوهره ثمينه وغالية ع كلبي
ايمن ...جدو احبهه واموت عليهه والله احبهه وهي لو ما تحبني مجان انطتني كليتهه مع الي سويته بيها
جدو ...ما أوعدك بس اكولك اني راح احاول وانت تعرف خالك عامر عنيد ويسوي الي براسه
ايمن ...جدو كوله شيريد يدلل اخليهه بعيوني وأحافظ عليها
...........
جدو ...اشلونك عامر
عامر ...الحمد لله انت اشلونك بابا
جدو ...اني زعلان واذا تريد تفرحني وأرضى عنك وافق على زواج ايمن من سابين
عامر ...بابا مو على ايدك وانت اكثر واحد عشت وياهم وشفت الي سوا لبنتي
جدو ...خليك مسامح وكلبك ابيض وهو متندم وجاي يتوسل ولو ما يحبهه مجان يسوي هالشي
عامر ...بابا انت مقتنع اني مهما كان ما اخالف رايك انت ابوي ورضاك يهمني
جدو ...على ضمانتي هالمره لان واثق من ايمن وحبه لسابين بس الي صار كان درس قاسي والي حاولت تفرقهم اخذت جزائها من رب العالمين (لا يفلح الساحر حيث أتى )
عامر ...ماشي بابا بلغه اني موافق وانت وكيلهه
سابين انقبلت بكلية الصيدله وداومت بدت حياتي تتغير نحو الافضل بديت ارسم لنفسي مستقبل
اجوي وجابو النيشان وأيمن
ايمن ...حبيبتي مبروووك عليج اني
سابين ... ها ايمن ترى اغير راي
ايمن ..تسويهه معقوله
سابين ... كلشي توقع
ايمن ..تدرين احلى شي كليتج بجسمي تتنفس وياي انت حاليا داخل أحشائي ...وباسني وعيونه دمعت
والله احبج وما اكدر اعيش بدونج كولي مسامحتك
سابين ...سامحتك حبيبي
حددنا موعد العرس بالعطله
خلصت الامتحانات وأيمن انشلع كلبه رايح جاي لكربلاء
وجدو يضحك علينه وصار موعد العرس ورحنا لبغداد وجوي اهلي والتمينه ولبست فستان العرس وطلعت فد شي والكل انبهر بي لكن اني ميهمني راي الكل الي يهمني راي يموني واجه العريس لابس قاط اسود وطالع يخبل فديته
زفونه للفندق وأيمن طول الحفله يهددني ...
ايمن يهمس باذني اليوم انتقم منج اليوم اني اعلمج
اطلع القهر والاذيه
كنت خايفة حيل من صدك كل بنت تخاف اول ليله وخصوصا احنا علاقتنا صار بيهه فراق وألم لهذا من التمينه مره ثانية كانت باشتياق اكثر من المعتاد
دخلنا بالغرفه واني ارجف وخايفه وأيمن رفع وجهي لان كنت مدنكه وباسني من كصتي وحظني
ايمن ...احبج سابين اموت عليج انت روحي يابعد روحي انتضرت  كثير واليوم ما بيهه مجال
سابين ...لا عفية حباب
ايمن اليوم مابيهه حباب .....
اليوم الثاني رجعنا للبيت واشتغلت الهلاهل
وحاليا اني حامل بولد ادعولي أولد بالسلامه وأيمن عايش بكليه وحده الي هي كليتي ومن يضوجني اكوله لو ادري ماتبرعتلك بكليتي ..هههههه
العصابه الي سرقوا سياره ايمن وقتلو زهراء واعتدو  عليها تم إلقاء القبض عليهم وتمت محاكمتهم واخذو جزائهم العادل
احب اوضح احنا انهزمنا من داعش ومن الوضع بمدينه الموصل ماخلصنا من الوجع والقدر الي دمرنا
بابا عامر توفى بعد شهرين من زواجي تاذيت كثير حتى فرحتي ماطولت رجعلي الحزن لان الوالد سند وظهر وبوفاة ابوي انكسر ظهري ودفنا بالموصل ...صحيح الدنيا ماتتوقف عند شخص معين وحتى لو عزيز
اتمنى من الي قرؤا قصتي يفهمو شي واحد عشته من خلال تجربتي ..ان الكلب مفتاحه الحب مو الشر ولا الخيانه واحنا مانكدر نسلم كلوبنا بيد الشخص الي يختاره كلبنه وإنما قدر وحكمه رب العالمين هي الي تتحكم بمستقبلنه
اني راضية بقسمتي والحمد لله ايمن صحيح عصبي لكن يهدأ بسرعه ويجي يراضيني واني بصراحه من الالم الي عشته ما احب المشاكل وإنما احب اعيش بسلام وهدوء
اني خسرت اخوتي وابوي والاخ والاب هما السند بالحياة
اتمنى من كل اخ وأب ان يتفهم اخته او بنته وما ياذيها
والاب اذا اجبر بنته على الزواج اكيد تهمه مصلحتهه
اما الام فدورهه مهم بحياة البنت ارجو من الامهات ان تكون صديقة لبنتهه وتتفهم مشاعرهه
امي بعد مافقدت اخواني الثلاثة صارت عباره عن عيون تبحث على ريحة اخوتي بي وباخوي انس
هذا قدر وحكم رب العالمين والحمد لله على كل حال
..................
هذا الكلام متوجه الكم من سابين

اتمنى من كل من قره قصتي انو بلبدايه القدر هو الي لعب بحياتي وكتب قصتي ولازم نؤمن  باانو قدرنا مكتوب ولازم نصبر على كل مصيبه اني صح مريت باايام صعبه ولحظات  صبرت ولحضات لا جنت ابجي واحجي على قدري وحضي مضى عمري بلموصل تعلقت بيها واني منها والها انتمي وافتخر و الطائفية هي جانت السبب الي فرق بيني وبين اخواني واني عشت ويا اهل الموصل والجنوب وهما كلوبهم واحد على الاخر مايفرقنا مذهب فقدت اخواني  الله يرحمهم تعبت بعدهم حتى الى الان اني ما رحت للموصل لان ذكرياتي راح ترجع الزمن كسر ضهري باابويا وهو الشي الي مايتعوض اما محمد فهو صديق عزيز اتمنى له حيات ولا احسن .... واتمنى يقرى القصة ويشوف سابين شكد تاذت مو بس هو ............ ايمن حبيبي وحياتي احيانا احس كل الي صار حتى اخذو ومع العلم اني وايمن حتى بااحتفالت الااهل ماجتمعنا من قبل جمعنا القدر زهراء الله يسامحها
..................النهاية ................
حبايبي اتمنى ان القصة عجبتكم وشفتو صبر ومسامحه سابين صحيح تاذت هواي ولكن الله يعطينا صبر على كد المصيبة والحياة تمشي وتسير بنا بقطار العمر اتمنى أخذتوا العبره من القصة اكيد فهمتو
ان الموت علينا حق وماتدري نفس باي ارض تموت
حتى وان هربنا فان أقدارنا تلاحقنا
(يدرككم الموت وان كُنتُم في بروج مشيده ) و
الي يمشي بطريق السحر اكيد ميكدر يستمر لان الله بالمرصاد وشفتو نهاية زهراء وياريت الي يقرى يفهم ويتعض وأود اعلامكم ان القصة حقيقية مية بالمئة
ترقبوني بقصة جديده كاتبتكم ...فردوس عبد اللطيف ...