#يد_القدر

الجزء الثالث

#يد_القدر
بقلم فردوس عبد اللطيف
الجزء الثالث
لي حبيب تحت التراب لست أعلم كيف حاله ولكني آعلم أن له إله هو أرحم عليه منا، ربي متعه بنور جنتك فگم أشتاقت عيني وروحي لرؤيته
أخــي ,,, وكيف لي ان اطفئ لهيب الشوق في صدري
ستظل ذكراك يا شهيد .. خالدة يا أخي رحمك الله
بعد استشهاد حيدر كرهت كلشي حلو بالدنيا او الحياة باكملها
لان فقدت حيدر ................. وبعد فتره بديت استرجع قوتي وأحاول انسى الي صار رجعت للمدرسه واحنا باقين في بيت جدي
ودرست الرابع والخامس السنين تركض كلامي مع حبيبي محمد صار اقل وهو هم قبل كان يجي لبيتنا من كان حيدر موجود لذلك جياته قلت
محمد ...سابين اشلونج
سابين اهلا محمد الحمد لله
محمد ... اهلي مسوين حفلة تخرجي من الجامعه تعالوا عدنه
سابين ...اعذرني ما اكدر اجي
محمد ...ليش سابين لحد يمته تبقين بالحزن لازم الحياة تستمر
سابين ...هذا حيدر لو نسيته
محمد ..ليش هيج تحجين اني ابد مانسيته هو بمعزه اخواني
واخو حبيبة كلبي
سابين ...اعذرني محمد صعب اجي وكلبي حزين
محمد ...ماشي حبيبتي براحتج
.........
جدي حبني اكثر وحده وخلالي غرفة بالبيت وكال اذا رجعوا اهلج للموصل بعد التحرير انت تبقين تدرسين عندي هنا
ووصى المديره علي لان يعرفها المدرسات كلهم يحبوني لان اني اصلا شاطره بدروسي اريد اطلع معدل
تحررت  اجزاء من الموصل تقريبا احنا بالأطراف ماما وبابا كونهم موظفين لازم يرجعون للدوام جدي تمسك بي وكال لازم تبقى تدرس عندي لان وصلت مرحله سادس واني هم ما فضلت اروح لبيتنا حتى لا اتذكر حيدر لان حياتنا وذكرياتنا كولها بالبيت صعب نمحيها بهالسهوله
مرحلة السادس مدرسين خصوصي وتركيز صعبة حيل واني هدفي اطلع معدل ...
اخوي انس اخذ بيت لوحده هو وزوجته واخذ اخواني سجاد وشهد عنده ويداومون بالمدرسه وهو متكفل بيهم لان ظروفنه تغيرت بعد ما تبهذلنا
كنت مهتمه بدراستي بس وملامحي تغيرت لان البنت بهذه المرحله شكلهه يبدي يتغير بس اني كنت حزينه ع طول
وكلما انسى اخوي تجي المنظمات ويرجعون يفتحون جروحي ...مرات من اشوفهم جايين احاول أتغيب حتى لا يشوفوني
مراسلاتي مع محمد قلت بس هو يحاول يرجعني لكن اني كنت ما اكدر انسى الحزن الي بداخلي لذلك كانت مشاعري
كولهه الم وحزن
مرحلة السادس ركزت بيهه ع المدرسة والدروس الخصوصي بحيث ارجع بالليل تعبانه حيل افتح فوني واشوف مسج من محمد
محمد ...الوووو وينج سابين ليش ماتجاوبين مشتاقلج حبي
سابين ... هلو حبيبي موتدري سادس ومجاي الحك توني رجعت ونعسانه لازم انام وراي كعده من الصبح
بالبيت ما كنت أتواجد كثير بسبب التركيز عالدروس
فد يوم كعدت الصبح ...ماكو صوت البيت هدوء مشيت دست ع طوقي انكسر
سابين يوووو هسه اشلون الم شعري ؟ بقى شعري مفتوح
طلعت من غرفتي جدو...جدو ..هدوء
وعثرت برجل شخص وكعت فوك ولد شاب ما اعرفه كاعد عالقنفه هو فز ووكعنه اثنينه بالأرض وصار فوكي فتح عيونه وباوعلي مخترع ...
بيش احلفلكم حسبالي حيدر اخوي العيون نفس العيون الوجه نفسه حيدر اريد اكوم دفعته ثكيل وزنه
سابين ...خنكتني
وخر عني هو هم كان مخترع
حا اكوم بس منو انتي ؟وشتسوين بيت جدي ؟
سابين ...اني سابين ودفعت ايده وهذا بيت جدي
ابتسم
جاي اروح للمطبخ بس الفضول خلاني ارجع
سابين ..انت منو حيدر اخوي اي انت حيدر
دمعت عينه وكال لا مو حيدر اني ايمن
سابين اني انصدمت ...منو ايمن ؟ ...بعدين تذكرت ابن عمتي زينب اسمه ايمن
سابين ...انت ابن عمتي زينب
ايمن ....وانتي
سابين ...اني اخت حيدر
ايمن ...باوعلي من فوك لجوه صدك ؟
سابين ...اي نعم واني اسفة تخيلتك اخوي حيدر
مرحبا ...اني ايمن طبيب ابن عمة سابين كنت جاي بزياره لقبروالدي  والدتي مع اخوتي ونزلنا لبيت جدو بكربلاء وطلعوا مع جدو واني بقيت لان كنت تعبان بس ماكنت متوقع اكو احد بالبيت كنت ماخذ راحتي ومتمدد عالقنفه ما اشوف الا احد اندعم بي وكع علي لا إراديا وكعنا اثنينا عالارض ومن ركزت شفت بنية جميله من صدمتي صفنت وبقيت ما اتحرك
ولحد ما دفعتني وسألتني وعرفت الحديث الي دار بينا
سابين ...ايمن بعمر حيدر اخوي نسخه من حيدر طوله وجماله بس اكو اختلاف بينهم (حيدر ) مالحكت اشوفة بلحية
وأيمن لحيته خفيفة وحيدر مكان مشعر لكن ايمن شعره كثيف
وأيمن بنفس عمر حيدر وعايشين ببغداد وجايين زياره لموتاهم ...تعرفت عليه
سابين ...همزين شفتك ابن عمتي لو شايفتك بالشارع مجان اعرفك .. ....طلعت من المكان وسمعت صوته ... سابين ...
التفتت عليه ونسيت شعري مفتوح
ايمن ...اكدر اكولج شغله ؟ والله صوته نفس صوت حيدر ...غريب افكر شنو هالتشابه البينهم
سابين ....تفضل ...
ايمن ...شعرج ضمي ولا تطلعينه
سابين ابتسمت وهزيت راسي بمعنى نعم ...تقربتله وكتله ايمن
ايمن ...ها امري بنت خالي طلبي
سابين ...مشتاكه لحيدر اريد تأخذني معاكم
ايمن ...من يجي جدي اساله
وهنا اني انصدمت ... صدك وين جدي ؟
ايمن ...راح هو واخوي وخواتي ..هسه يجون
سابين ...اوك
رحت لغرفتي ولبست حجابي ورجعت يمه لكيته نايم غافي
يمكن شفت بي حيدر بي
اجيت عليه وهو غفيان همست  ايمن ...ايمن وهو يعنعن بمعنى ها
شوكت جيتو ؟
ايمن ...الفجر
سابين ... ليش ؟
ايمن ...ذكرى وفاة امي
سابين ...ها اسفة
ايمن ...لا عادي
سابين ...تريد ماي ؟
ايمن ...اي والله
رحت سويتله شاي  وجبتله ماي وشاي ...هو يدخن
اني اباوع علية لان اشوف بي اخوي  حسيته حيدر ورجع مو ابن عمتي وهو كاعد يلعب بفونه
ايمن ....سابين وين خالي ؟
سابين ...رجعوا للموصل صارلهم شهرين
ايمن ...وأنس
سابين ....انس بكربلاء بس بعيد علينه
ايمن ...اشو انت ماعرفتيني شعجب حيدر مجان يحجيلكم عني. ؟
سابين ...انت تحجي قابل كنت وياه
ايمن ...اي وهذه صوره هم عندي
استغربت من شفت الصور وظليت ابجي وهو دمعت عيونه بس ظل يكابر وكال
ايمن ...يستاهل الشهاده والله رجل بمعنى الكلمه
سابين ...انت تشبه شبه مو طبيعي
واحنا كنا كاعدين نسولف ودخلوا علينه اخوة ايمن وجدي بصراحه ما اعرفهم ولا شايفتهم لان ماعدنه تواصل وياهم
وجدو حاجيلهم
اخوات ايمن ...مرام وحنين طالبات وحده بعمري والثانية خريجه كلية ومخطوبه واخو اسمه وسام مدرس بمدرسه وسام متزوج ويشبه ابوي
من دخلوا وكفت استقبلهم
جدو ...ها بابا سابينه كعدتي ؟ اني عفتج نايمه
سابين ...اي جدو كعدت
جدو ...وعرفتي أموني
سابين ..اي عرفته
جدو ...خوش وعرفني عالباقين ...
سلمت عليهم وكعدنه نسولف واخذت البنات للمطبخ
حنين ...اني اطبخ وأنتو روحو رتبوا البيت ونظفوا
بدت مرام بالهول تعزل واني رحت لغرفتي ولكيت ايمن نايم ومبين عليه تعبان ....خليت كتبي عالميز وطلعت وسديت الباب ورجعت انظف مع مرام
كملنا شغلنا وصبينا الاكل
وسام اخو ايمن ....يابنات وين ايمن ؟
سابين ...نايم بغرفتي
ظلوا يضحكون
وسام ...ترى ايمن مامتعلم عالروحات والجيات تعبان من السفر
جدو .... سابين روحي كعدي ايمن
صفنت ع جدو ورحت لغرفتي حتى اكعده
فتت للغرفه وشفت تلفوني لكيت مسج من حبيبي محمد
محمد ...هلو حياتي اشلونج مشتاقلج شخبارج ليش هيج صايره ما تجاوبيني الا بعد فتره ...لو تدرين شكد مشتاق
سابين ...هلو حبيبي اشلونك اني الحمد لله بخير بس اعذرني عدنه خطار بيت عمتي وملتهيه وياهم
عفت التلفون عالميز....... ايمن ايمن يلى اكعد صبينا غده
وجدو يصيحك ماشبعت نوم
فتح عيونه وباوعلي ...شلت خاوليته من السرير مبلل السرير
لان المنشفة مبلله ماي وشعره مامنشفه هم المخده صايره ماي
ايمن ...رحت سبحت شفت غرفة خالي علي الي مايزال مسافر بتركيا
الغرفه كبيره ومرتبه بيهه سرير مريح وقنفة وتلفزيون وميز للدراسه الستائر ماروني بحيث من تطفيً الضوء تنام عالهدوء فتت بالسرير ريحه عطر تجنن والسرير مرتب ونظيف ويم السرير صوره الشهيد حيدر عالكومدي يم السرير ...عرفت هذه غرفة سابين ...خليت راسي عالمخده وشعري مبلل وغفيت
حسيت دخلت وحده تدردم ..ما فهمت غير كم كلمه
متخاف تتمرض نايم هيك وغطتني وصفنت بوجهي وراحت
ورجعت كعدتني للغده وطلعت
كمت اباوع عالغرفه شفت تلفون عالميز تواليت صفنت مكتوب (ميم القلب ) ابتسمت منو هذا القلب مشطت شعري ورحت والجماعه كاعدين ياكلون
ايمن ...أسف تاخرت عليكم
جدو ...تعال يموني تونه بدينا والجماعه جوعانين هههه
سابين ...كملنا اكل ورحنا للمطبخ نغسل المواعين
كنت واكفه عالسنك وأغني ( تسألني احبك ليش ؟ بعيني تعيش  ابدلك بأيش
اي حتى من اشتاق ؟ كوم اشواق ماحب فراق
وحدك مليت العين معقول احب اثنين
بعيوني انت اجمل حلم  للناس ما قلته )
وانتبهت ايمن يباوع علي
سابين فوت تعال دخل للمطبخ
ايمن ..سوسو ممكن اسالج سوال ؟ وتجاوبيني بصراحه
سابين ...اي احجي
ايمن ...منو م قلبي ؟
سابين ...صفنت وسكتت مكدرت احجي
ايمن ...ترى اني معلي بس تلفونج رِن رساله وانتبهت
سابين ...لا عادي هذه صديقتي
ايمن ...ها اوك
سابين ...خلي اغلس ...ايمن كلت أجدى اجي معاكم للمقبره لو لا
ايمن ..وافق جدو
سابين شكرا ايمن
ايمن ولو تدللين بنت خالي
رحت لغرفتي وحجيت لمرام ع محمد وعلاقتنه واخوي حيدر كان يعرف بعلاقتنا ومحمد يريد يخطبني بس بالوقت المناسب
مرام ...والله تستاهلين بنت خالي
بعدها جتي حنين وأيمن وبقينا نسولف ونضحك وسهرنه لحد ما قفلنه ونعسنه
ايمن يالى اروح انام وأنتو بنات
حنين ..مكانه هنا يم سابين تصبح ع خير
ايمن تصبحون ع خير
هاي اول مره انام هيج نومه من بعد وفاة حيدر ...
كعدت الصبح رحت للدوام ...بالرجعه شفت محمد منتظرني
تمشينا سويه بس مبتعدين
محمد ..اشلونج سابين مشتاقلج كثير بس والله مشغول وآسف
سابين ... لا عادي معذور اكيد مو بيدك
محمد ...محتاجه شي حبي ؟
سابين ...لا سلامتك
محمد ...انت روحي واني باقي انتظرج لحد ماتدخلين للبيت
سابين ...ابتسمت وكملت طريقي للبيت ...لما وصلت شفت ايمن واكف بره ...هلو
ايمن ...هلو
سابين اشو طالع بره شكو ؟
ايمن ...دا انتظرج سوسو ممكن سوال
سابين ....تفضل
ايمن ...منو هذا الي كنتي تتكلمين معاه ؟
سابين ...سكتت ...بعدين كلت خلي اجاوبه ...هذا صديق حيدر الله يرحمو
ايمن ...وشيريد منج
سابين ...شنو تحقيق ..ممكن تفسحلي الطريق اريد أفوت تعبانه
ايمن ...أسف بس والله اني اخاف عليج
سابين ...الولد الي شفته هم يخاف علي
أنصدم وظل يباوع علي واني ابتسمت وفتت
من دخلت للبيت ...هلو جدو
جدو اهلا سابينه
سابين ...اشبيك جدو اشو ضايج
جدو غالية متعاركه ويه زهراء وصايره مشكله بيتهم وتعرفين خالد زوج زهراء ما موجود دائما بالشغل ولازم اني احل مشاكلهم لما رحت اليوم اشو غالية مو طبيعية ما اعرف اشبيها تملخ بروحها وتمشع شعرها وحتى خطيبها أكرم م  تريد تحجي وياه وآخر شي مفوته القلم بعينهه وديناها
للسيد يقرى عليها اني وأيمن رحنا
سابين ... خطية جدو ليش هيج صار بيهه
ايمن ... سابينه مسويلهه عمل بإثم ميت حسب ما كالو الساده لان وديناها لأكثر من واحد
سابين ومالهه علاج
جدو ..هذا العمل ما اله علاج البنية ياما تنجن ولو هي تقريبا مثل المجنونه او تموت حتى أكرم خطيبها وابن عمتها من تسمع باسمه تتخبل وماتريد تسمع سيرته
سابين ...الله يلطف بحالهه وحال امهه مسكينه هالجمال كوله وهيج يصير بيهه
للحكاية بقية
...........بقلم فردوس عبد اللطيف .............