#يد_القدر

الجزء الاول

#يد_القدر
بقلمي : فردوس عبد اللطيف
الجزء الاول
القدر هو ما كتبه وقدره الله لنا في حياتنا من افعال واقوال وكل ما يحدث معنا فهو مكتوب ومحسوم ومقدر لنا فقد كانت نتائج اختياراتنا فلا يجب ان نلوم القدر في اي شئ يحدث معنا
وكأنك في خلاف أبدي مع الحب.. إما أن تجد من يحبك وأنت لا تحبه ، أو أنك تحب من لا يحبك. ولو شاء القدر والتقيت بمن يحبك وتحبه، لا تحبكم الحياة معًا.
انا سابين نعم اسمي سابين اسم تركماني سموني اهلي ع اسم بيبيتي ام امي تركمانية
وسابين اسم نهر في سويسرا
مواليدي 1996 حاليا طالبة كلية الصيدلة مرحلة ثالثة ...مواصفاتي ..طويلة مربربة
عيوني كبار لونهم بني شعري تمري طويل
احب دراستي ومتعلقة بيها ومعدلاتي عالية
شخصيتي محبوبة ومجاملة واكيد اترك بصمه حلوه لكل من يتعرف علي
عائلتي تتكون من
بابا عامر وماما نوره ... ماما معلمة جامعية بابا موظف اخوي الكبير أنس مواليد 1988 طبيب عيون كمل كليته ويحب صديقته بالكلية وحايتزوجون
أنس حنين وطيب ودائما يكون بجانبي وما أتردد لحظه من احتاج اي شئ اطلبه منه وجوابه ع طول تدلل سابين الورده كم سابين عندي فديته دائما يشجعني بدراستي
ويدعوني ولولا مساعدته ما وصلت لهالمرحله ...
اخوي حيدر مواليد 1992 هذا الصديق الصدوق القريب لقلبي هو اكثر من اخ بل اقرب الي من ماما وبابا بحيث يفهمني من تعبير وجهي يفهم سعيده ام حزينه عندما اكون متضايقة هو يحلي مشاكلي ...
حيدر وصل مرحلة سادس وترك المدرسة مجان يحبهه ولا يحب يدرس ...يكول باجر عكبة نموت ليش نتعب نفسنه وعيونه وتقرى ...
واخت صغيره مواليد 2001اسمها شهد
وأخر العنقود سجاد مواليد 2006
نحن من شيعة الموصل ...يعز علي اتكلم بلهجة طائفية كلنا مسلمين ونعبد الله ونبينا واحد ولكن ....من الواجب اخبركم الأسباب الي غيرت مجرى حياتنا ...
راح نرجع للخلف كم سنه واحجيلكم قصتي والاحداث الي مريت بيها
من وعيت عالدنيا حياتنا عادية مثل اي عائلة عراقية بس الحقيقة والي لاحظته
اهتمام امي بينا قليل بس سوال بداخلي ولكن تفسيره صعب ...امي جميله جدا وجماله يوصفون بي وتزوجت والدي بسبب التقاليد لذلك حياتهم كانت بارده بس حكم العشره بينهم (دفو الحب والعشق ) اعتقد مفقود بعلاقتهم ...هذا تفسيري ...يمكن اني عاطفية اكثر من ماما واشوف علاقتهم بارده
كنت مرحلة رابع إعدادي الاولويه بحياتي هي الدراسة وتحديد المصير والمستقبل بهذه السنوات القادمه لكن مع الدراسه تحركت مشاعر العاطفة والحب بداخلي
نبض قلبي لشاب أسمة محمد ابن جيرانه
محمد صديق اخوي حيدر وع طول يلتقون واكيد من يجي حيدر يحجيلي عنه ومن خلال كلامه زاد تعلقي بمحمد وبنفس الوقت حسيت بي من نظراته ومن وكفته بالشارع ينتظر طلعتي للدوام ورجعتي للبيت وارتباكه من يشوفني لكن ماعنده الجرأة يكلمني
محمد ...اني محمد اعيش مع عائلتي المتكونه من والدي ووالدتي واحنا ثلاث ولد هيثم ومحمد واكرم وأربع بنات وحده اكبر مني والباقيات صغار ....والدي تاجر وعنده مجموعه محلات وبيهه فروع بالمحافظات
حاليا اني طالب وحبيت بنت جيرانه سابين
واخوهه حيدر صديقي العزيز ... اخلاصي بصداقتي مع حيدر صعب اروح من ظهره واعترف لسابين واكولهه احبج يعتبر هذا التصرف خيانه لذلك بقيت أرسل الهه مسجات من خلال ماسنجر ولكن هي ماتفتح ولا تقرى رسائلي وبقى كلبي معلق بحب سابين ولا أستطيع البوح بهذا الحب
............................
سابين ....كلما اشوف محمد دكات كلبي تزيد وخطواتي تتعثر ...اوف شوكت حايحجي ويعترفلي ... وحتى لو يحاول يكلمني اكيد حا افشله احتراما لسمعه اهلي واخوي حيدر لان اكثر من مره كلي اي شي تسوي خلي اسمعه منج انتي انطيج الثقة لا تخسرين ثقتي .....ميصير اكلمه من وره اخوي حيدر ...لان حيدر متفهم وممكن
يزعل علي اذا سويت شئ من وره ظهره
رجعت للبيت واني مأيسه من محمد اكيد حايبقى طول العمر بس يباوعلي ويسلهملي بعيونه شوكت تجيله الجرأة
اخوي حيدر اخلاقة حلوه وطيب مواصفاته اسمراني وعيونه عسلية طوله 180 كشاخ مهتم بمظهره دائما انيق ومرتب ويهتم بتنسيق الألوان ودائما يحجيلي ع حبيبته بنت خالتي اسمهه زهراء ودائما يحجي وياها يمدحهه مافد يوم تكلم عنهه شي موزين ...لكن اني منتبهه عليهه احس من تصرفاتهه عدهه شئ مخفي كلبي ما مرتاحلهه بس طالما حيدر مقتنع بيهه هذا اختياره وربي يسعده
سابين ...حيدوري أشسويت اليوم بيت خالتي انت وزهراء وزهراء شسولفو
حيدر ...اثنين يحبون بعض شيسولفون مثلا (الجو جميل)
سابين ...هههههه حلوه هاي ...وانت ليش تضم عني
حيدر ...لج بعدج صغيره ع هالسوالف تريد اطلع عينج ..لج باعي ديري بالج تفكرين تحبين لوتصادقين
سابين ...حيدر حا اعترفلك بشي بس متردده
حيدر ... سدج امين لا تخافين سوسو خليني اعرف منج احسن من ما اسمعها من غيرج
سابين ... لا انت وين رحت ترى اني فقيره وبس اكو شي زغيروني
حيدر ....جرني من أذني وكلي وشنو هالشي الزغيروني ؟
سابين ...بصراحه اني معجبه بشخص انت تعرفه ...
حيدر ...ابتسم وكال زين أعرفة منو ؟
سابين ... صديقك محمد ....
حيدر ....ابتسم وكال واني اعرف بي يريدج بس كملي دراستج ترى مو عبالج اني غشيم ..بصراحه نعم الاختيار وهو مهتم بيج حسيت من لمعه عيونه من يشوفج صح هو يدنج راسه بس هو صديقي واعرف بي من ينحرج يبين عليه
ودائما يهتم من يسمع سيرتج
سابين ...ابتسمت ورجعت لغرفتي والسعاده
ملت كلبي حتى ما اعرف امشي من الفرح كمت اطفر ....صليت وكملت دراستي
كلت خلي اتصفح فوني
شفت مسج من محمد ...قبلت المراسلة
كاتبلي مساء الورد ...صعب اكولج الي في قلبي من اول مسج ولكن اكيد عيوني تتكلم ماينطق به فوأدي
سابين ....مساء النور ... اليوم كلمت اخوي حيدر ووافق ولكن كال لازم تكملين دراستج
محمد ...فديت الي تكمل دراستها ياعمري كنت انتظر هذا الرد من زمان
اووووف هسه الدنيا ضحكتلي ....
سابين ...ها محمد على كيفك بعدنه اول يوم
محمد ...لج اول ما فتحت عيني عالدنيا انت كبال عيني وكلبي يفرفح من اشوفج كاني شايف القمر
سابين ...احجيلي على دراستك دير بالك تتماهل بدروسك
محمد ...شي اكيد اريد اكمل دراستي بأسرع وقت حتى اتقدملج ياعمري وتصيرين من نصيبي
سابين ...الله كريم ...ترى الوقت متاخر ولازم انام وراي دوام الصبح باي
محمد ...باي يا احلى قمر
بعدهه نمت مرتاحه اول يوم اتكلم مع الانسان الي اختاره قلبي ياترى حايكون من نصيبي ام ان القدر يخفي لي امور ليس بالحسبان
سابين ...هلو حيدر ...اشرلي بايده وهو يسولف مع زهراء
حيدر ....باي زوزو ....هلو سابين شخبارج
سابين ....الحمد لله زينه انت شوكت حاتخطب زوزو
حيدر ماظل شي اتفقنا على كولشي ادعيلنه الله يتمم بخير
وانت شخبارج بالدراسة ؟
سابين ...الحمد لله اختك شطوره ولا تخاف عليها
مرت الايام وعلاقتي مع محمد مستمره لكن بس مراسلات
اكثر من مره يطلب مني يتصل ويسمع صوتي بس اني ارفض لان اخجل ... لكن من الرسائل الموضوع عادي جدا حتى اهلي ميشكون بي بس اكيد مسجات محمد مستمره من الصبح لليل من صباح الخير لحد ماتصبحين على خير هذا وغير شعر الغزل والكلام الحلو والأغاني ...علاقتنا كانت بريئة وحب طاهر وحافظنه على صلة الجيره الي بينا وعلاقته باخوي
بالليل سمعت صوت حيدر يصيح ...طلعت من غرفتي وركضت خايفة ليش اخوي عصبي
سابين ...ها حيدوري اشبيك ؟ اخوي العزيز ليش تصيح ؟
حيدر ... مقهور حيل مسك ايدي (اختي اني ما احب الخيانه ...ليش..؟. ليش؟ ..يخونوني ؟ ) وسكت وعيونه حمر
سابين ... احجي حيدوري اني اختك وصديقتك احجيلي فدوه
حيدر ساكت بس يغلي احسه يريد ينفجر وقفل وميقبل يحجي
منو الي خانه من هاي اللحظه بدء حيدر يتغير صار انسان ثاني تغيرت كل تصرفاته من هذا اليوم بدت عقدته النفسية
حيدر ...سوسو عوفيني وروحي اريد ابقى لوحدي
سابين ...عفته ورحت راسلت محمد
الوووو محمد الحكني اخوي ما اعرف اشبي
محمد ...اشبي ؟
سابين ...هو ميقبل يحجيلي بس اعتقد زهراء هي المشكله
بس ميقبل يحجيلي
محمد ...عوفي اليوم وباجر احاول افتهم منه
سابين بس أعصابه منهاره خايفة لا يصير بي شي
محمد ...لا تخافين عليك حيدر رجل ويكدر يتحكم بعواطفة
اليوم الثاني اجه حيدر وشافني لازمه التلفون واراسل
حيدر ...ويامن جاي تتراسلين ؟ هذا محمد ؟
سابين ...ها اشبيك حيدر
حيدر ..لج يتكلم بعصبية ...بعد ممنوع تحجين ويه محمد ماكو حجي انهي كلشي ...من يخطبج ويجي يعقد يالى الج حق تحجين وياه
اني سكتت منا قشته خفت لا يحجي لاهلي ...لانه تغير وصار انسان عدائي وانطوائي ولا كأنه اخوي الي يحبني ويحترمني
بس المهم ما حجه لاهلي واحتفظ بالسر الي أمنته عليه
اني هم قللت كلامي مع محمد وصارت مراسلاتنه بس الصبح او تالي الليل حتى لا يضوج حيدر
اخوي الدكتور أنس خطب حبيبته وحددنه زواجه ...
بيوم زواج أنس التمت الاقارب والاصدقاء عدنه بالبيت وحفله الزواج كانت بالقاعه وكان يوم فرحه للكل لان اخوي الكبير حايتزوج حبيبته
زهراء كانت حاضره بعرس أنس اخوي ...شافوهه بيت عمتي وسالوا اخوي حيدر كدامي
وظل حيدر يمدحهه أمامهم لان يردون يخطبوهه لابنهم خالد
اني بقيت صافنه اشو حيدر ليش ما كللهم اني اريدهه ليش يضيعها من ايده وهو يحبها ؟. اكيد اكو سر بس ميقبل يحجيلي لازم اروح ع زهراء وافتهم منهه
سابين ...زهراء احجيلي ليش حيدر يفرط بيج
زهراء ... تبجي اخ الخيانه صعبه ماتراد كلشي ممكن تلكيله دوا الا الخيانه جرحها صعب يلجم
سابين ...يعني انت خنتي حيدر وهو لكفج وعرف بيج ومن هيج عافج ؟
ظلت تبجي وهزت راسهه يعني اي
سابين ...خالد خطبج وحيدر شجعه وكله انت خوش بنيه
زهراء ... هو يعرف بي خنته ،،، اخ يا سوسو والله ندمانة
خسرت حيدر واني احبه بسبب طيش
رجعت للبيت وشفت حيدر كاعد وعيونه مدمعه حظنته وهمست بأذنه الطيبون للطيبات ..اخوي لاتحزن مو من نصيبك وهدأ وابتسم
حيدر الله يسعدهه ماتفيدني
من يومهه بعد مجاب اسم زهراء ع لسانه ....
حبيبي محمد كمل كيمياء بس طبعا اكيد ماكو تعيين وبقى ينتظر التعيين ولو هو اشتغل مع ابو بس كان يحب يتعين بشهادته لان درس وتعب
بيوم 10/6/2014. ساعه 11 بالليل بدء الرمي والضرب عالموصل ...اتصلو بينا عمامي اطلعوا من المنطقة اطلعوا من الموصل ...
منطقتنا اغلبيتهم شيعه والكل انخبص كانو يوم القيامه
للحكاية بقية
..................بقلم فردوس عبد اللطيف .................